Isaya 3 - Luganuzi Luswanu Kuli Wanhu Wose 2002

Wutilibulwe wa mu Yelusalemi

¹ Lanje ta! Muwaha Mulungu, u Muwaha Mulungu u Mudaha vyose, u Mulungu we mihanga, yakuwawusiza vinhu vyose vyono wetumbiye Yelusalemi na Yuda. Kowawusiza zindigwa ne malenga gawo,

² hamonga ne wanhu we nghakamo, ne wasilikale wawo vitung'ati, ne mahakimu wawo, ne wawizi wawo, ne watowa cisangu wawo, ne walongola wawo we selikali,

³ ne wasilikale wo wulugu, ne walongola wawo, ne wanyamhala wawo, hamonga ne waganga wose we cihalahala.

⁴ Muwaha Mulungu kolowawika wadodo wo wawe watemi wawo heya, i wana wagalika wo wolowatema.

⁵ Nawo wanhu wolowa kwigaza munhu no muyagwe. I wadodo wolowabedegala wawaha, nawo wono wabedegaywe, hamba si wolowapela cogopo wono wena lilumbo.

⁶ Na mu vilo vivyo, wanhu we mhuga monga, wolomuhagula yumonga wa muli wene, wawe kumutya, “Agwe muyetu wina mwenda wo kuvwala, holeka ase cakuwika wuwe mulongola wetu mu vilo vivi vye magazo.”

⁷ Ninga nayo kolowapitula yawe kutya, “Nye, ane nalema! Hambi'ne nha si nosuma kumutazenyi cinji. Ku kaya yangu, nha kusina ndigwa yo yose, hamba vivwalo. Holeka mulece kumbika niwe mulongola wenyu!”

⁸ Heya, mbeka, Yelusalemi yongomezwa! Nayo Yuda yikuvulumuka! Ku soko vyono mu zinghani zawo na mu metumo gawo, wamubedegalaga Muwaha Mulungu, no kumutovula calinze.

⁹ No wuhijila-mbejele wawo, wukuwa kuwahomelela weneco. Sunga no wubi wawo, nha wuli calinze, nha vyono wanhu wa Sodoma wetuma. Holeka wokongomezwa, no wongomezwe wuwo, weletela weneco.

¹⁰ Ninga wanhu we ling'ani, wolowa wasangalaye, ne zinghani zose, zolowa swanu du kuli wene. Nawo, wolosangalalila kuli ze metumo gawo.

¹¹ Ninga woyi he, kuli wanhu wabi, hambi nha wolopegwa wulipicizwe, nha vyono wene nawo wawatendelaga vibi wayawo.

¹² Nawo wanhu wangu wokwigalilwa ne wana, ne wacekulu wo wolowatema. Nye nyo wanhu wangu, i walongola wenyu wakumwajilizenyi, ho mulece kuyiwona nzila yono munojeye muyikole.

Muwaha Mulungu yakuwaling'aniza wanhu wakwe

¹³ Muwaha Mulungu, yewikanize ho yalonje calo, yewikanize ho yawaling'anize wanhu wakwe.

¹⁴ Muwaha Mulungu, yakuwacema wanyamhala we wanhu wakwe, hamonga ne walongola we wanhu wakwe, ho yawaling'anize. Nayo yakuwasitaka yakutya, “Yo nyenye mono mwapumha migunda ye mizabibu, ne zikaya zenyu, zimemile vinhu vyono mwawaboka waciwa.

¹⁵ “Ninga hamba si yili ling'ani kuli'nye, ho muwabanghanize wanhu wangu ko kuwewonela waciwa. Ane yo nene Muwaha Mulungu u Mudaha vyose, u Mulungu we mihanga yo nizilonjile zizi.”

Suguzi kuli Wacekulu wa mu Yelusalemi

¹⁶ Muwaha Mulungu yakutya, “Lanje ta, i wacekulu wa mu Yelusalemi vyono wewoni! Wajendaga wagalamice mhula zawo mucanyha. Nhondo zose wekalaga wakukonyeza, ne meso gawo go wulembule. Wajendaga wakunyata, ne zimbilili zawo zikulila.

¹⁷ Ninga 'gwe, wugole du, nane nowatonhya. Nowaceta zimvwili mu mitwe yawo, niwalece wena mikulungu.”

¹⁸ Lizuwa likuza, lono Muwaha Mulungu, kolowawusiza i wacekulu wose wa Yelusalemi, i vinhu vyose vyono vikuwapela wiwoni. Kolowawusiza wihambo wono wakuvwala mu migulu yawo, na mu mitwe yawo, na mu zi singo zawo,

¹⁹ hamonga na mu miwoko yawo. Kolowawusiza sunga ne vitambala vyawo vyono wegubicizaga ku wusu,

²⁰ hamonga ne zi kofiya zawo, ne zimhiji zawo zono wavwalaga mu zi mhukumhuku ze miwoko yawo, na mu viwino vyawo.

²¹ Hamonga ne zi nyamwidole zawo, zono wavwalaga mu vidole vyawo, na zono wavwalaga mu mhula zawo.

²² Nowawusiza hamonga ne vivwalo vyawo viswanu, i myenda ye mawala ne mitote, ne magawoni, ne mikoba midodo ya mu mawoko,

²³ hamonga ne vilole vyawo vyo kwilanjila, ne vitambala vye bafuta vye mafuwa, ne mikumbo miwaha, hamonga ne vitambala vitali vyono wegubicizaga ku wusu.

²⁴ No munungho mubi, wolohomela ha wibaka vye mhunjile swanu. Woleka wuvwala misipi miswanu, langa wovwala milejehe. No wuwe wo kuwa na mvwili swanu mu mitwe yawo, alu wowa na mikulungu. Nawo mu wuvwala myenda yo wulenzi, alu wovwala masambi-sambi du. No wuswanu wawo wose ku wulangwe, wogaluka cevu!

²⁵ Nawo wanhu wa mwi'kaya, sunga ne wanhu we vilungo, wose wowulagwa ku wulugu.

²⁶ Nayo milango ye likaya, yokalala no kulila. Ne likaya lyokwihwana no mucekulu mulekwa mono yekaye hasi mu manghundi.