Isaya 28 - Luganuzi Luswanu Kuli Wanhu Wose 2002

Suguzi kuli Wutemi wo lubavu lwa kusumuka

¹ Woyi hee, kuli wutemi wa Isilayeli, hambi nha wongomela! No lukumyo lwayo lukuwomba nhe mikumbo ye maluwa yono wavwalile mu mitwe yawo, iwalongola wang'wela wo wujimbi. I mitwe yawo yo widunhumuzi, mhola, webace mafuta ge mhunjile swanu ninga i wanhu weneco, walabalaye hasi so cigalo co wujimbi.

² Ninga 'gwe, walekaje, hambi Muwaha Mulungu, nha yena yunji mono yuli vilungo, we citung'ati, mono kowahoma. Yuyo, kokuza nho mukukunzo we mvula ye mabwe, nho mukukunzo we malenga menji, nago goyigubika yisi yose.

³ No widunhumuzi we walongola wang'wela, wo 'jimbi, wokanyanjizwa hasi.

⁴ No lukumyo lono luwombile lwe walongola wedunhumuzi, lokwajililila lukulu, hambi nha lolagala nhe malimbuko ge mana go mukuyu, gono wagalizaga na lono gakali napililicila.

⁵ Ninga lizuwa lyokuza, lyono Muwaha Mulungu we mihanga kolowa nho mukumbo we maluwa we nhojo kuli wanhu wakwe wono wasigaye.

⁶ Kolowapela mahala go wuling'anizi kuli wose wono wena mulimo wo wuhakimu. Kanyhi kolowapela vilungo, wose wono wakwituma mulimo wo wulindilizi we milango ye likaya, ho lilece kuhomwa ne walugu.

Isaya ne Wawizi wagalo 'jimbi wa ku Yuda

⁷ Sunga ne wawizi, hamonga ne wakohani, wose wakupebesuka so ngholwe yo wujimbi. Hambi nha wang'wa muno wujimbi, nhondo sunga wakolwa, weza kwikobala hamba kumanya yaye. I wakohani wagalile muno muno, sunga luno, weza si wakuwumanya no wugubulilwe, wono Mulungu yakuwagubulila. Nawo wakohani nhavivyo, weza wang'wela muno wo wujimbi, sunga nhondo weza kulemwa no kulamula vyalo vyono wakuletelwa.

⁸ Ne zimeza zono wakwitumamila lono wakung'wa wujimbi wawo, nha zimemile madeko du, hasina hamba hanji haswanu hono hasigaye.

⁹ Sunga nalu, wakung'ung'ulicila wakutya, “Alu, mwene nye, nani 'lo mono yamunozize munhu yuyu, yehwese nha vyono mwene kosuma kwijiza munhu yunji? Hamba nani mono yakuzisaka zinghani zakwe? Hambi zinghani zakwe, nha ziwanojeye i wana wagalika du, wono wakali kongha!

¹⁰ Hambi nha yakujela kucijiza ase nha wana wadodo, nghani kwa nghani, lucilili kwa lucilili, lisomo kwe 'somo hanyuma aci na aci.”

¹¹ Ninga mulanjilile! Hono mulece kuhulika 'ne zono nghulonga, u Mulungu kowetumamila i wajenzi, walongane nanye mu nonga njenzi ho wamufundenyi.

¹² Hambi Mulungu nha yamupelenyi anye wose wucehe, hamonga no wumoteswe, ninga anye mukalema kumuhulika.

¹³ Na yiyi yo yikuleka Muwaha Mulungu yakumwijizenyi nghani kwa nghani, lucilili kwa lucilili, lisomo kwe 'somo. Nanye ho muwe kwikobazanga magulu lono mukujenda. Na mu wikobaze wenyu, motuga nghomele, mogwizwa, na hanyuma musolwe nha muli wafungwa'

Libwe lye nhuzi so Sayuni

¹⁴ Ale ta, muhulicize zono Muwaha Mulungu yakumulonjelenyi, anye nyo wanhu wedunhumuzi, mono muwatemile wanhu wangu mu Yelusalemi.

¹⁵ Hambi 'nye nha mukwilumba mukutya vyono mwakondya kwilumbaniza ne lifwa, hamonga ne yisi ye wafu. Na kanyhi mwitumbiliye lukulu nha vyono wongomele si wolomuzizenyi yaye, vyono anye mwitumbiye wulambi wenyu hamonga no wukoci wenyu, mukutya wuwo wo womuponyenyi.

¹⁶ Ninga 'lu, muhulicize zono Muwaha Mulungu yakumulonjelenyi yakutya, “Alu nane nghuwika mu Sayuni musinji wono wuli vilungo, kanyhi wukamile. Kanyhi nghuwika ne libwe lye nhuzi lyo wuguzi wukamu, lyono lyowa lyandicigwe zinghani azi, ‘Wihuwilo wono wukamile, wina no wukangalizi.’

¹⁷ “No wiling'ano, wowa wo mulejehe wo kujelela musinji wuwo, nawo wihuwilwa cowa co cijelelo cayo co wima.” Ne mvula ye mabwe yolowuwusiza lukulu wutizizo we walambi wose, nalyo lihwazi lyolohuluma mucanyha yo wihundiko wawo liwuhodanje.

¹⁸ Ne cilagane cenyu cono mwali mwalagana ne lifwa, hamonga ne yisi ye wafu, vyose vyowembulwa, hamba si vyokwima yaye. Ne lihuhuji kolo lyeza kuza, lyolomusumenyi.

¹⁹ Lyolomuzizenyi kali kenji nhondo zose hakali mitondo. Nanye mowa munojeye muwe no wukangalizi misi ne cilo. Ne nghani yo yose yono yolawa kuli Mulungu, yowa no wogofye wuwaha!

²⁰ Hambi nha mowa mwihwanile mbazi yo munhu mono yakujela kugona mu citanda cifupi muno, cono si yakusuma hamba kutambaliza ne migulu yakwe, no kwifunika bulanjeti lisisili lyono si likukwila hamba kumugubika muwili wakwe wose.

²¹ Ninga mumanye nha vyono Muwaha Mulungu kolewana, nha vyono yetuma kwi'tunda lya Pelazimu, na mwi'lolo lya Gibeyoni. Ho yetume zono yakuhila mweneco. Yetume metumo gakwe majenzi go wizine nha vyono gokwijela. Kanyhi kofisiliza litumo lyakwe, lyo wizine.

²² Holeka mulece kuwubedegala wusugule wangu wono nghumusugulenyi! Na mbeka hono muwubedegale, mumanye nha vyono kowa kukamu muno kuli'nye ku wupone. Hambi 'ne nha nakondya kuzihulika nha vyono Muwaha Mulungu, koyongomeza yisi yose.

Lihala lyo Mulungu

²³ Nalu, muhulicize ta zono nghulonga, nghutya nhavi, “Muzitejelezaje viswanu zono nghumulonjelenyi.”

²⁴ Hambi nha hasina mulimi mono kalimaga cibitilila no kuwikaniza mugunda wakwe ku wupanhe.

²⁵ Langa kolo yawuwikaniza yakondya, kahadikaga lulo baho du ne zimbeyu ze zimboga, nha vyono nandala, ne binzali ne jila. Kanyhi kahadikaga wuhemba ne shayili mu micilili. Hanyuma kanyhi ho kawa kuhadika vilimwa vinji vinji kawa kuvipilimya mu mwalambalo wo mugunda wakwe.

²⁶ Kanyhi mwene yakuwa yamanyile nha vyono yimunojeye yetume mulimo wakwe, hambi Mulungu nha yakondya kumwijiza.

²⁷ Kanyhi hamba si kazikung'unhaga na nhumbi nandala zakwe hamba jila, ho ziwuswe mu mabada gayo, langa ketumamilaga du nghome yono yikwilaniciye.

²⁸ Hamba wuhemba nawo si kowupondanga caka caka du mu cuga, langa kowutowa nha vyono yinojeye hamba si kowusajinhya yaye.

²⁹ Ninga wumanye nha vyono, mahala gaga gose, galawaga kuli Muwaha Mulungu we mihanga. Ne mahweso gakwe go ge cihalahala muno muno, kanyhi nhondo zose gena cambuzi ciwaha.