Isaya 26 - Luganuzi Luswanu Kuli Wanhu Wose 2002

Mulungu kowapela wanhu wakwe wusume

¹ Lizuwa lyolokuza, lono wanhu wololwimba lwimbo aluno mu yisi ya Yuda; Likaya lyetu, lye 'kaya lye vilungo!

² Holeka 'lu digulenyi milango, ho linjile likungugo lye ling'ani, likungugo lyono wanhu walyo wetumaga ze mbeka.

³ Gwe go Muwaha Mulungu, kuwapelaga mulamu wono wukwilaniciye, i wanhu wono wuhile wawo wose wuli kuli'gwe kanyhi wakwitumbiye gwegwe.

⁴ Mumwitumbile Muwaha Mulungu cibitilila hambi nha yo mukamisi wetu vilo vyose.

⁵ Nha yakondya kuwanyetya i wedunhumuzi, ne makaya gawo gono wekalaga, Mulungu yakondya kugongomeza, ne majinji gayo kakondya kugatulanjiza gawa manghundi.

⁶ Na wa walya wono wewonelwaga, alu wakugakanyanjila mucanyha yago wakugasambanjiza hasi ye magulu gawo.

⁷ Gwe go Muwaha Mulungu, kuyitelemezaga nzila ye wanhu we ling'ani, wawa kukola mu nzila yo wuhihi.

⁸ Ase cikutyatya zo wuhile wako, kanyhi cikwitumbiye gwegwe, agwe yo gwegwe mono kucikwilanicizaga vyose vyono cikwilowa.

⁹ Nane nikalaga nghukwihwesa gwegwe du cilo cose kwe nhumbula yangu yose, nagwe kolo wukuyiling'aniza yinze hamonga ne wanhu wayo, baho ho wolomanyila ze ling'ani yako vyono yinha.

¹⁰ Hamba yiwe agwe wuli lusungu kuli wanhu wabi, ninga wene hamba si wamanyaga yaye ku wituma ze ling'ani. Hamba wawe luno, wali mu yisi ye wanhu we ling'ani, ninga wene vyo wakali kwituma zo wubi, hamba si wakusacila lukulu kuzimanya zo wuwaha wako.

¹¹ Ne walugu wako nawo, hamba si wakumanya yaye nha vyono kowalipiciza. Gwe go Muwaha Mulungu, wuwakozaje cevu, wuwalece wenjile mu magayo go wulipicizwe wono wuwawikanizize. Ninga 'gwe, wuwalajile zo wendo wako kuli wanhu wako.

¹² Gwe go Muwaha Mulungu, kocimotya mu milimo yetu yose, hambi nha yo soko ye metumo gako.

¹³ Gwe go Muwaha Mulungu, go Mulungu wetu, nha cali citemigwe ne wanhu wanji, ninga agwe yo gwegwe du wuli wene, yo wuli Muwaha Mulungu wetu.

¹⁴ Ninga 'lu wawo wose wakondya kufwa, hamba si wowumipa kanyhi myuhe yawo hamba si yozuka yaye, hambi agwe nha wakondya kuwalipiciza no kuwongomezeza lukulu. Hasina kanyhi hamba yunji mono kowakumbucila.

¹⁵ Gwe go Muwaha Mulungu, walinjifya likungugo lyetu, wayigazimhya ne mipaka ye yisi yetu mbavu zose, ne nghani yiyi yo yikupelile lilumbo yiwaha.

¹⁶ Gwe go Muwaha Mulungu, wawalipiciza wanhu wako nawo wakahidimbala kukulomba ko wusungu wuwaha muno.

¹⁷ Gwe go Muwaha Mulungu wacilizya muno, nha vyono kalilaga ko wusungu mucekulu mono yali mu nghunga yo lusawo.

¹⁸ Nase cali cili mu wusungu, cali cili mu nghunga yo lusawo, ninga hamba kulela cinji co cose. Cali cisina vilungo vyo kusumila mu yisi yetu holeka hamba si ciketuma cinji co cose.

¹⁹ Ninga wanhu wa muli wanhu wetu wono wafwa, awo langa wolozuka kanyhi! Ne miwili yawo yilawumipa kanyhi. Na wose wono wagonile mu vitenjelo, wolokwinuka wawe kwimba na nyemo. Hambi Muwaha Mulugu nha kolowazukula wose wono wafwa katali, wowa nha buhe yono yiyisangalazaga yisi.

Wuling'anizwe no wuzuce

²⁰ Nye nyo wanhu wangu, alu mwinjile mu zikaya zenyu, mwidindile mumo. Mwihundice mumo cidaha, sunga likuwo lyo Mulungu lipulute.

²¹ Hambi Muwaha Mulungu nha yakuza yakulawa ku wulanga ku wikalo wakwe, ho yawalipicize wanhu we yinze ku soko yo wubi wawo. No wuwulaji wose wono wetumwaga cinyele mono'nze, wose wololajilwa cagalanze. Ne yinze nayo, hamba si yolowahundika yaye wose wono wawulagwa.