Isaya 25 - Luganuzi Luswanu Kuli Wanhu Wose 2002

Lwimbo lo Lukumyo

¹ Gwe go Muwaha Mulungu, yo gwegwe go Mulungu wangu. Nane nokupela cogopo, no kulikumya litagwa lyako. Hambi nha wetuma metumo go wizine kugafisiliza ko wihuwilwa i mahweso gako gono wagawikaniza ku wulawa katali na katali.

² Kugakumulanga makaya kugaleka matongo, kugongomeza ne magomawakali gawo sunga ne makaya go wutemi gose, gono walugu wagazenga, gose gamwagucila lukulu cibitilila.

³ Ne wanhu we makungugo ge vilungo wokukumya gwegwe ne makaya ge makungugo gose magazi, gokogopa gwegwe.

⁴ I waciwa hamonga na wono wasina wutazi wose wakutiziza kuli'gwe nawo wakuwa wapolile mu vilo vyo wugaye. Kuwacitilaga mu mubeho yo mukukunzo, kanyhi kuwacehezaga mu mbeho mwi'zuwa likali. Ne wanhu wagazi, wahungucilaga, wenha libeho likali lyo mukukunzo.

⁵ Wenha i hanhu hakavu, hono mvula yikali si natonya vilo vinji. Ninga 'gwe go Muwaha Mulungu, wakondya kuwanyamaza i walugu wetu, waganyamaza mazozo ge wanhu wagazi, nha vyono mavunde gapozaga livuce lya mwi'zuwa likali.

Mulungu yakuwikaniza Ndigwa

⁶ Nayo Muwaha Mulungu we mihanga, kolowikaniza ndigwa mwi'tunda lili lya Sayuni, so makungugo gose ga mono'nze. Ndigwa yono yolowa ndigwa swanu muno, hamonga na divayi swanu muno.

⁷ Nayo baho kololiwusa kamonga likukuwi lyo wukalale lyono lyaninyinaga mucanyha ye makungugo gose.

⁸ Muwaha Mulungu kololiwusiza lukulu lifwa cibitilila! Kanyhi kolopatila lukulu mahozi mu meso ge wanhu wose, no kuwawusiza cevu wanhu wakwe, cono wali wakondya kukozwa mu yinze yose. Muwaha Mulungu mweneco yo yazilonga zizi!

⁹ Nazo zizi kolo zejela, wanhu wose wololonga watye, “Mbeka, heya! Ayu yo Mulungu wetu! Nase comwitumbila mwene, nayo nha yaciponya. Mwene yo Muwaha Mulungu! Nase cakondya kumwitumbila. Nase luno cisangalaye muno, kanyhi cina nyemo mbaha, vyono mwene yakondya kuciponya.”

Mulungu koyilipiciza Mowabu

¹⁰ Muwaha Mulungu kolicitila litunda lya Sayuni, ninga i wanhu wa Mowabu, wokanyanjizwa ho hasi, nha vyono wagakanyanjilaga mabeleje gawa suji.

¹¹ Nawo woloyigolola miwoko yawo nha wanhu wono wakuhila kwitiba mwi'lamba. Ninga Mulungu kolowanyetya, ne miwoko yawo yiwe yisina vilungo kanyhi.

¹² Mulungu kologongomeza magomawakali ga Mowabu, hamonga ne majinji gawo matali, yagagwise sunga ho hasi, gawe manghundi.