Isaya 24 - Luganuzi Luswanu Kuli Wanhu Wose 2002

Muwaha Mulungu koloyilipiciza yinze

¹ Muwaha Mulungu koloyihodanga yinze no kuyileka yili bwete. Koloyipitula yinze no kuweyagaza wanhu wayo.

² Ne wanhu wose wolokwiyagazwa, i wakohani hamonga ne wanhu. Watumwa, hamonga ne wawaha wawo. Wono wakugula, hamonga na wono wakuguza. Wono wakwazima, hamonga na wono wakuwazima. Iwagoli, hamonga ne waciwa.

³ Yinze yolokwiyagazwa no kongomezwa. Muwaha Mulungu yo yalonjile, na vyo zowa zinha.

⁴ Yinze yikukalala no kunyala, ne yinze yose yikutimba, yinze hamonga no wulanga, vyose vikusakala.

⁵ Ne wanhu wakondya kuyavufya yinze, so wubena malajilizo go Mulungu, no kudelengula cilagane cono yacinoza, ho cikale cibitilila.

⁶ Holeka nayo Mulungu yayilijita yinze. Ne wanhu nhondo wakulipicizizwa mu metumo gawo weneco. Na muli wawo, wacefu du wono wasigala womi.

⁷ Ne migunda ye mizabibu yeza kunyala, ne divayi nayo yikuwa nyhefu. Ne wanhu wose wono wali wasangalaye alu wasina nyemo kanyhi.

⁸ Ne lizi lye nyemo lyanyamala no wuvina we zindonondo wawuka, nawo wutowe we zing'oma, alu waduma.

⁹ Nalu, hawa hasina kanyhi wimbe wo wusangalale ku soko ye divayi, hasina hamba munhu monga mono yakuyisangalalila divayi muzinzi wayo.

¹⁰ Na mwi'kaya namo, mweza mumemile wuwulaji, sunga ne wanhu weza kwidindila mu zikaya zawo ho weponye.

¹¹ Ne wanhu nawo wakulila mu zinzila, vyono heza hasina kanyhi divayi. Ne nyemo yawo yawucila lukulu, no wusangalale wakondya kuwuswa mu'si.

¹² Ne likaya lyasigala matongo du, ne milango yayo yakondya kubenanjizwa.

¹³ Na zizi zo zoyijelela yinze yose mu zinghungugo zose. Yokwihwana no mudumo we nhwanga, lono mizeyituni yakondya kukong'onhwa mu mibici yayo, no kuhalaliza zabibu zose mu mizabibu yayo.

¹⁴ Nawo wono walasigala, wolowa kwimba ko wusangalale. Na wono wolowa wekaye ku lubavu lwa kumwezi, wologanula zo wuwaha wo Muwaha Mulungu vyono winha,

¹⁵ nawo wono wekaye ku lubavu lwa kucilima, wolomukumya mwene. Nawo i wanhu wono wekaye mu mwalambalo we lilenga, wolomukumya Muwaha Mulungu, u Mulungu wa Isilayeli.

¹⁶ Nawo we ma'si go kutali mono'nze, wolozihulika zinyimbo zo kumukumya Isilayeli, nghungugo ye ling'ani. Ninga hamba nhavivyo, ane nha sina witumbilo! Nghuganda! Nawo i wagaluci vyo wakucila kungaluka du, no wukonji wawo wukucila kuwa wubi muno muno.

¹⁷ Alu muhulicizaje ta anye wose! Howuli wogofywe ne makweme, hamonga ne mitego vikumulindilenyi nyenye.

¹⁸ No munhu wo wose mono kolojela kwiponya mu wogofywe, kologwila mwi'kweme. No munhu wo wose mono kolojela kwiponya mwi'kweme, kolokwibatwa no mutego. Ne malenga menji ge mvula, golotonya ku wulawa ku wulanga. Ne misinji ye yinze yolosinjisika.

¹⁹ Yinze yolopanduka no kubenanjika hamonga no kudemuka yiwe mwazi.

²⁰ Ne yinze yoloyumba-yumba nho mugalo 'jimbi no kupemheluswa nha cibanda mu mbeho yo mukukunzo. Nayo yinze yikuvunwa no wubi wayo, na mwi'zuwa linji yologwa hasi, hamba si yolokwinucila lukulu kanyhi.

²¹ Nalyo lizuwa likuza, lono Muwaha Mulungu kolowalipiciza mapuga ge wawaha, gono gali kucanyha, hamonga ne watemi we yinze wono wali mono'nze.

²² Mulungu kolowakonghola hamonga watemi wose nha wafungwa wono wali mwi'kweme. Kolowadindila mu jela wekale mumo, sunga lizuwa lyawo lyo wulipicizwe lize lifice.

²³ Nawo mwezi wolotukuwala, ne lizuwa nalyo hamba si lyolowalika yaye. Hambi u Muwaha Mulungu we mihanga, nha kolowa yo mutemi. Nayo kolotema mu Yelusalemi, mwi'tunda lya Sayuni, ne walongola wose we wanhu, wololuwona lukumyo lwakwe.