Isaya 22 - Luganuzi Luswanu Kuli Wanhu Wose 2002

Nghani yo Mulungu kuli Yelusalemi

¹ Ayi nayo yo nghani yo Mulungu kuli lilolo lyo wugubulilwe. Ta munonjelaje, alu mwina nghanici yono yikuleka wose mukunozeza wuhembi wenyu mucanyha ye matembe ge zikaya?

² Hambi nha nghuwona likaya lyose limemile sasamo ya nyhenze ne nyemo mbaha. I wanhu wako wono wafwa mu cipango co wulugu, si wawulagwa no wulugu yaye.

³ Langa walongola wako wose watiza, ninga kanyhi wose wakatekwa hamba si wasuma kuguma songa monga yaye.

⁴ Alu ta, mundekaje niwalilile ko wusungu wanhu wangu wose wono wakondya kufwa, hamba mulece kusindamika yaye.

⁵ Hambi ali nha lyo lizuwa lye mahwele, no wusumwe, hamonga no woga wuwaha, mwi'lolo lyo wugubulilwe. Hambi u Muwaha Mulungu we mihanga, nha yo yacileteye. Alu lanje, sunga ne majinji ge likaya lyetu, gose gakondya kumwaguka, ne mazi ge cililo cetu co kulondola wutazi, ne matunda nhondo gakubocelela.

⁶ Wakawa kuza wasilikale wakulawa ku yisi ya Elamu, wapandile mu zifwalasi, wahabatize ne mapinde gawo, hamonga ne zisonga zayo. Nawo wasilikale wanya ku yisi ya Kili, nhavivyo, nawo wena ne zingula zawo.

⁷ Ne lilolo liswanu lya Yuda, lyono lina moso mwinji, likamema matuka menji muno go wulugu. Ne wasilikale wono wali wali mucanyha ye zifwalasi, wakawa wemile ha mwande ye milango ye likaya lya Yelusalemi.

⁸ Ne vilungo vyose vya Yuda, vikawa vyakondya kumalika. Na zizo zali zeza kwijela, nanye mukavisola vitwalo vye milewo vya mwi'kaya lya mu mbago.

⁹ Mukagawona ne majinji ga Yelusalemi, mono gasakwaga gazengwe kanyhi.

¹⁰ Mukazisunjilila zikaya zose za mwi'kaya lya Yelusalemi, na zinji za muli zikaya zizo, mukazimwagula ho musole mabwe gayo muzenjele majinji mono gali gamwaguce.

¹¹ Na hanyuma kanyhi, mukanoza lilamba haciligati ye likaya, ho lyambe malenga gono gahulumaga gakulawa mwi'lamba lye katali. Ninga hamba nhavivyo, anye si mwamuhulika Mulungu yaye, mono yaziwikaniza zose zizo ku wulawa katali, no kuzileka zijele.

¹² Nayo Muwaha Mulungu we mihanga, yamucemenyi ho mulile ko wukalale, mucete mitwe yenyu, muvwale magunila.

¹³ Ninga anye, mukaseka no kusangalala. Mukawulaga ngholo, hamonga ne zing'ombe ho mulye, mukang'wa muno muno divayi sunga mukagala. Hanyuma mukawa kutya, “Kaa! Lekata cilye, cing'we! Hambi mitondo nha cofwa.”

¹⁴ Muwaha Mulungu we mihanga, yakanonjela yakatya, “Hamba si wolonenelelwa lukulu u wubi wuwu, sunga kono walafwila. Ane yo nene no Muwaha Mulungu we mihanga, vyo nghutya.”

Nghani yo Mulungu kuli Shebina

¹⁵ Muwaha Mulungu we mihanga, yakanonjela nha vyono mbite kuli Shebina, u mulanjilizi muwaha we viya vye kaya yo wutemi, nghamulonjele nitye,

¹⁶ “Alu mwene wukwihwesa gwegwe wuli nani? Na cono coleka wisesese citenjelo mu mabwe mu matunda, gwegwe go mweneco, cicici?

¹⁷ Heya, wali wuwe mbeka wuli munhu we'lumbo, na we vilungo ninga 'lu, Muwaha Mulungu kokusola yakugumile kutali muno.

¹⁸ Mbeka kokutondola nha mupila wo kubana, yakutaje ku yisi ngazi muno. Nagwe kolofwila kuko du, behi ne matuka gako go wulugu gono wukwidunhumulila. Hambi nha wukuyikoza cevu kaya yo muwaha wako.

¹⁹ Nayo Muwaha Mulungu kolokuwusiza wuwaha wako wo wulanjilizi we kaya yakwe, yakuwinje na mu mulimo wako.

²⁰ “Muwaha Mulungu yakamulonjela Shebina yakamutya, Na zizi kolo zikwijela, ane nolomutuma mwitumami wangu Eliyakimu u mwana wa Hilikiya.

²¹ Nomuvwika yuyo Eliyakimu i vivwalo vyako vyo witumami, hamonga no musipi wayo, niwe kumupela wulajilize wo mulimo wono agwe wali kwituma. Nayo kokwihwana sogo yo munhu muli wanhu wa Yelusalemi na Yuda.

²² Nomupela wulajilize wose yawe hasi yo mutemi, u mwana wa Dawudi. Mwene yo kokamisa zifunguwo zose ze nyumba ya Dawudi. Nayo hono yadigula, hasina munhu mono kodinda, na hone yadinda, hasina munhu mono kodigula.

²³ Nane nomusikamya nha musumali mutowelwe hanhu, nayo kowa wo mwamulizo we lilumbo kuli we mhuga yakwe wose.

²⁴ “Ninga kanyhi i wanduguze, hamonga na wose wono wamwitumbiye ku visakwa, awo wose wowa mutegulo wakwe. Wokwisomeka muli mwene, wawe kuninyina nhe zimheyo, ne mahali, ne zinhambiko vyono vininyinaga mu visomeko!

²⁵ Ninga kolo zizi zikwijela, u musumali wono wali wuwambile muno, wolohogoha, wuwe kugwa. Na wuwo wo wolowa wo mudumo wa vyose vyono vyali vitumbice mumo.” Yo nene Muwaha Mulungu vyo nghutya.