Isaya 21 - Luganuzi Luswanu Kuli Wanhu Wose 2002

Wugubulilwe wo wugwe wa Babiloni.

¹ Ayi yo nghani ya kuli Babiloni. Ale, wongomele wokuza ku wulawa mu yisi yo kogofya. Nawo wokuza nha civulavumbi cono cikufwagula nyika cikulowoka.

² Ane niwuwona wugubulilwe we metumo go wukali, wugubulilwe wo wugaluci no wongomezwe. Lipuga lye wasilikale wa Elamu, likuhoma! Lipuga lye wasilikale wa Mediya, nalyo ligapilime makaya! Alu langa Mulungu kogawusiza lukulu magazo gono galetwa na Babiloni.

³ Nane, zizo zono nghaziwona no kuzihulika mu wugubulilwe, zikamhela woga hamonga no wusungu, wusungu wono wihwanile no wusungu wo mucekulu hono yali mu nghunga yo lusawo.

⁴ Mutwe wangu wukutama, nane nghucicima so woga. Nali nindiye cizuwa cigwile, ninga hamba nhavivyo, si nambulila cinji, langa woga du.

⁵ Na mumo mu wugubulilwe, ndigwa yiwa kutengwa, ne masambi-sambi gakutandikwa hasi, i wajenzi ho wekalile. Alu wakulya akuno wakung'wa. Na hanyuma hadodo, musilikale muwaha we wasilikale, kawa kucema nhinicizo yakutya, “Nye walume! Ale, muwikanize luno zingula zenyu!”

⁶ Hanyuma nayo Muwaha Mulungu kawa kunonjela yakutya, “Ale, wubite wukawice mulindilizi, wumulonjele yazilonje zono yakuziwona.

⁷ Hono yawe yakuwona wanhu wakuza wapandile fwalasi, wakujenda wejete wejete, na hone wanhu wanji nawo wapandile mu ndogowe na mu zingamiya, ale, yimunojeye yasuguce muno.”

⁸ Nayo mulindilizi yakulonga yehindile yakutya, “Ane nali nimile bahano mu wudumi, misi ne cilo.”

⁹ Ninga kwa nhinicizo, niwa kuwawona wakuza! Wanhu wapandile fwalasi wakujenda wepanhame wejete wejete. Mulindilizi yakulonga zono yawene, yakutya, “Babiloni yakondya kugwa! Sunga ne vihwani vyose vyono wavihembaga, vyakondya kugwa hasi vyabenanjika.”

¹⁰ Nye nyo Waisilayeli, mo wanhu wangu, mwali mwikaye mukukuzulwa nho 'hemba. Ninga aluno nakondya kumulonjelenyi nghani swanu, yono niyihulice kuli Muwaha Mulungu we mihanga u Mulungu wa Isilayeli.

Nghani kuli Edomu

¹¹ Ayi nayo yo nghani kuli Edomu. Ko yuli munhu yunji mono yakunyhemeleza ku wulawa Seyili, yakutya, “Gwe mulindilizi, alu wusiku ho wokwela nili lo? Ta wunonjele, ho wokwela nili?”

¹² Nane nghamupitula nghatya, “Wusiku weza behi no kwela, ninga hamba nhavivyo, i cilo cokuza kanyhi. Holeka nagwe, hono wuwe wukusaka kuwuza, ale, nhondo wuze du wuwuze kanyhi.”

Nghani kuli Alabiya

¹³ Ayi nayo yo nghani kuli Alabiya. Alu anye nyo wanhu wa Dedani, alo wanani lo wono wasitile nghambi yawo mu nyika nyhiwa, ya Alabiya,

¹⁴ ale muwapelaje malenga wang'we wanhu wono wakaluce, wono wakumuzizenyi. Nanye nyo wanhu we yisi ya Tema, nanye muwapele ndigwa walye wawo watizizi.

¹⁵ Hambi wanhu nha wakutiza ho weponye no mumaje wono wakondya kuwikanizwa ho wuwawulaje, no wupinde wono wuwikanizwe wugume, hamonga ne zimbali zose zo wulugu.

¹⁶ Hanyuma Muwaha Mulungu yakanonjela yakatya, “Lono mwaka wumonga du wukali namalika, i nhojo ya Kedali yomalika.

¹⁷ Hamba yiwe i wanhu waguma wupinde wa Kedali, wo wanhu wono vitung'ati muno, ninga hamba nhavivyo, wacefu muno muno wa muli wene wo wosigala. Ane yo nene no Muwaha Mulungu, u Mulungu we Waisilayeli vyo nghutya.”