Isaya 20 - Luganuzi Luswanu Kuli Wanhu Wose 2002

I citanjilo co Muwizi Isaya, lono yali Cipwi

¹ Saligoni u mutemi wa Ashuli, yakamulajiliza musilikale muwaha we wasilikale we Waashuli wo wulugu, wabite wakayihome Ashidodi likaya lye Wafilisiti.

² Na mu mapango gago, Muwaha Mulungu yakamulonjela Isaya u mwana wa Amozi, yavule vilatu vyakwe ne myenda yakwe ye ligunila, vyono yali yavwalile. Nayo Isaya yakahulika, yakawa kuvula nha vyono yalonjelwa, yakawa kujenda cipwi kanyhi yasina vilatu.

³ Nalyo likaya lya Ashidodi lyaza kutekwa, Muwaha Mulungu yakatya, “U mwitumami wangu Isaya mu myaka midatu yali jenda cipwi kanyhi yasina vilatu. Holeka cicino co citanjilo cono cikulajila zono zowejelela we zi'si za Misili na Kushi.

⁴ Hambi u mutemi wa Ashuli nha vyo kowategula wali cipwi, i wafungwa wono yawateka ku wulawa mu zi'si zizi zi nyejete Kushi na Misili. Nawo i wazelelo hamonga ne wakombi, wose wojenda wali cipwi, kanyhi wasina malatu, akuno ne madako gawo gali cipwi, ho wawakoze soni Wamisili.

⁵ Na wose wono wayitumbiye Kushi, no kwilumbila Misili, woloyilajila mbeka yawo kono ko yili, hambi witumbilo wawo nha wakondya kuhodanjika.

⁶ Ne lizuwa lilyo kolo likuza, i wanhu wono wekalaga mu mhwani ye yisi ye Wafilisiti, wololonga watye, ‘Alu mulanje ta, zono ziwejeleye i wanhu wono cali ciwetumbiye ho wacitaze mu miwoko yo mutemi Waashuli alu mwene mbeka ho cosuma wule kupona?’ ”