Isaya 2 - Luganuzi Luswanu Kuli Wanhu Wose 2002

Mulamu we cibitilila

¹ Azi zo nghani zono Mulungu yamulonjela Isaya u mwana wa Amozi, za kuli Yuda na Yelusalemi.

² Mu vilo vyono vikuza litunda lyono lizenjigwe Nyumba yo Mulungu, lyolosikamya mucanyha ye matunda lyolokwinulwa kuciza vigongo vyose, ne makungugo gose golokuza kuli lyene,

³ nawo wanhu wolowa kutya, “Alenyi cibite kwi'tunda ku Nyumba yo Mulungu, ku Nyumba yo Mulungu we Waisilayeli. Mwene nayo kocijiza zono yakuhila ase cizitume. Nase cojendela mu zinzila zakwe zono kohagula mwene. Hambi wulajilize wo Muwaha Mulungu, nha wulawaga ku Yelusalemi kalongaga ne wanhu wakwe ku wulawa ku Sayuni.”

⁴ Kololamula zo wiwanganile we makungugo mawaha. Nawo wolotyana mimaje yawo yiwe masili, ne migoha yawo yiwe mimaje yo kududulila. Ne makungugo hamba si golokwihoma yaye, hamba kwiwikaniza so wihomi kanyhi.

⁵ Holeka anye nyo wana wa Yakobo, kenhenyi cijendele mu wuzelu wono Muwaha Mulungu yakucipela.

Widunhumuzi wose wolokogomezwa

⁶ Gwe go Mulungu, hongo wakondya kuwaleka wanhu wako du, i wana wana Yakobo! Vyono yisi yawo luno, yakondya kumema myoto yono yilawile kucilima, hamonga no wutowa visangu nhe Wafilisiti. Wanhu wako watyatya myoto ye cijenzi.

⁷ Ne yisi yawo kumbe ho yimemile fweza na zahabu, ne viwutwa vyawo si vimalikaga yaye. Ne yisi yawo yimemile fwalasi, ne matuka gawo go wulugu menji muno hamba si gakuwala yaye.

⁸ Ninga kanyhi yisi yawo yimemile vihwani vye milungu, nawo wakuvihemba vinhu vyono wenozeza weneco kwe miwoko yawo.

⁹ Ninga 'gwe walekaje! Hambi wose nha wolonyetwa, no kukozwa cevu. Holeka go Muwaha Mulungu, wulece kuwanenela!

¹⁰ Ninga lizuwa lyolokuza, lono wolowa kwinjila mu mapango, na mu mapalika ge mabwe mawaha ga mu matunda, wanji wolowa kuhimba mina wenjile, ho weponye ne likuwo lyo Muwaha Mulungu, wakujela kwihundika ha vilungo vyakwe no lukumyo lwakwe!

¹¹ Kanyhi lizuwa likuza, lono wiwoni wo munhu wolomalika, no widunhumuzi wo munhu wolokongomezwa. No Muwaha Mulungu du, yo kolopegwa lukumyo yali wene.

¹² Na mwizuwa lilyo Muwaha Mulungu u Mudaha vyose, u Mulngu we Mihanga, kolowanyetya wose we vilungo, na wose i wewoni, hamonga ne wevuni wose.

¹³ Koloyibenanjiza ne mibici yose mitali ye mihagata yono yili ku Lebanoni, sunga ne mibici yose ye minghola, yono yili mu yisi ya Bashani.

¹⁴ Ne matunda gose matali, ne vigongo vyose, mwene kolo gakumulanga hawe wuhihi,

¹⁵ hamonga ne minala yose mitali ne magomawakali gayo.

¹⁶ Kolozidodomeza mu malenga zingalawa zimbaha kanyhi swanu.

¹⁷ No wiwoni wo munhu, baho langa ho wulamalicila, no widunhumuzi nawo, baho ho wolokogomezezwa lukulu.

¹⁸ Avi navyo i vihwani, nhondo ho vyolokwajililila lukulu. No Muwaha Mulungu du, u Mudaha vyose, yo kolopegwa lukumyo yali wene.

¹⁹ Wanhu wolotiza, wawe kwinjila mu mapango na mu mabwe mawaha ga mu matunda, na wanji wolohimba mina hasi, wenjile ho weponye ne likuwo lyo Muwaha Mulungu, wakujela kwihundika ha vilungo vyakwe no lukumyo lwakwe, lono mwene yeza kuza kuyisinjisa yinze.

²⁰ Ne lizuwa lilyo lilawa kuza, i wanhu wologagumilila mafuto ne mabudibudi, vihwani vyawo vye zahabu na vye zifweza, vyono wali wenozeze, ho wavihembe.

²¹ No Muwaha Mulungu kolo yakuza, kuloyicicimya yinze, i wanhu wolotiza, wawe kwinjila mu mapango na mu mapalika ge mabwe mawaha ga mu matunda, na wanji wolowa kuhimba mina hasi wenjile, ho weponye ne likuwo lyo Muwaha Mulungu, wakujela kwihundika ha vilungo vyakwe, no lukumyo lwakwe.

²² Mulecele lukulu kumwitumbila munhu mono wumi wakwe wudumaga nha wehele. Hambi nha si yakwiliye cinji?