Isaya 19 - Luganuzi Luswanu Kuli Wanhu Wose 2002

Mulungu koyilipiciza yisi ya Misili

¹ Ayi yo nghani ya kuli yisi ya Misili. Muwaha Mulungu kokuza ku Misili, yapandile mwi'vunde lyono likumangha. Ne vihwani vya Misili, vikucicima hali mwene, ne wanhu wa Misili vilungo vyawo vyodejepa.

² Muwaha Mulungu yakutya, “Nosagahiza wulugu mu yisi ya Misili, wehome Wamisili wose weneco kwa weneco, nawo wokwihoma nduguye no nduguye, munhu no mwikalani muyagwe. Nago makaya, gokwihoma yikaya ne likaya liyagwe, wutemi no wutemi wuyagwe.

³ Nowudumuciza wuhile we mahweso ge Wamisili, nolihodanga ne lihala lyawo. Nawo wolondola wutazi kuli vihwani vyawo, wokwitoweleza visangu mu waganga, wowuza mahweso kuli myuhe ye wafu.

⁴ Nane nowakombola Wamisili mu miwoko yo munhu mono yali jila, kuli mutemi mukali mono kowatema. Ane yo nene Muwaha Mulungu, vyo nghutya.”

⁵ Ne likolongo lye Nile, malenga golocepuka, ne likolongo lyolojendelela kunyala mhola mhola.

⁶ Ne vikololozi vidodo dodo vye likolongo, navyo vyowa kunyala mhola mhola. Nago madete-lulenga hamonga ne madulwe, gowomba.

⁷ Navyo vilimwa vyose vyono vihadikwe mu nyenje ye likolongo lya Nile, vyonyala no kupemheluswa ne mbeho.

⁸ Ne wanhu wose wono wetumbiye wanimula somba mumo mwi'kolongo lya Nile, wowona wusungu no kulila. Zindowano zawo hamonga ne zinyavu zawo, zowa nghani ya bwete.

⁹ Nawo wono wahonaga myenda ye bafuta wotukuwikwa mitima yawo.

¹⁰ Nawo i wahoni we myenda, hamonga na wono wali mbali ku milimo, vilungo vyawo vyodejepa kanyhi wokalazwa.

¹¹ Nawo i walongola wa mwi'kaya lya Sayuni, mbeka walele! Hambi nha wakubocela wulanjizwe wo wulele we wanhu we mahala wa Misili! Ku sokoci wakwijelela kumulonjela mutemi, nha vyono wene wo wahazi we walimu we katali, hamonga ne watemi?

¹² Nagwe Falawo u mutemi wa Misili, wali hayi lu i wanyamhala wako wasugu? Na lunji wali wasume kukulonjela ze mahweso go Muwaha Mulungu we Mihanga, zono yakuyihweseza Misili.

¹³ I walongola wa Zowani na Mempisi wose walele. Hambi nha wo wali wetumbiywe nha vyono wo wolitonga likungugo, ninga alu walyajiliza.

¹⁴ Ninga Muwaha Mulungu, yo yawanoza wawe no wulanjizi wo wajilizi. Holeka nayo Misili, zose zono yikwituma, yikwituma kotya munhu mono yagalile wujimbi, mono yakupebesuka no kutelela mu madeko gakwe mweneco.

¹⁵ Na mumo mu Misili, hasina munhu mugoli hamba muciwa, munhu we lilumbo hamba mono siyamanyice, mono kosuma kulavya wutazi.

Misili yolomuhemba Muwaha Mulungu

¹⁶ Ninga vilo vyokuza, vyono i wanhu wa Misili, wolowa wali cevu, wokwihwana we cicekulu. Hambi nha wocicima ko woga kolo wakuwona Muwaha Mulungu we Mihanga yakuwugolosa muwoko wakwe yawalipicize.

¹⁷ Nawo wanhu wa Misili, Yuda yowa kuwogofya muno muno mu mapango gose, kolo wakukumbucizwa zo wulipicizwe, wono Muwaha Mulungu we Mihanga yawawikanizize.

¹⁸ Ne vilo vivyo kolo vikuza, nonga ye Cihebelaniya yowa kulongwa mu makaya mahano ge Wamisili. Ne wanhu wolokwilahiziza mwi'tagwa lyo Muwaha Mulungu we Mihanga. Ne likaya limonga lya mu makaya gago, lyocemwa “Likaya lye Lizuwa.”

¹⁹ Ne vilo vivyo kolo vyafika, i cikumbicilo co Muwaha Mulungu, colozengwa mu yisi ya Misili, hamonga ne lisumbili lye libwe ilisiwanulile nene mu mipaka ya Misili.

²⁰ Naco cowa co citanjilo co Muwaha Mulungu we Mihanga kuko ku Misili. Na kolo wanhu wakwiwonelwa kuko, ho wamucemeleze Muwaha Mulungu ho watuje wutazi, nayo Muwaha Mulungu komutegula yunji yawaponye.

²¹ Nayo Muwaha Mulungu kokwilajila kuli Wamisili. Nawo womumanya wawe kumuhemba mwene. Ho wasume kumulavizya vilavywa ne makumbiko. Wolomwihuwiza, wetume nha vyono wehuwize.

²² Alu Muwaha Mulungu kowalipiciza Wamisili. Ninga kanyhi kowaponya. Nawo womuwuyila mwene, nayo kowuhulika wolombe wawo no kuwaponya.

²³ Na kolo vilo vivyo vyakondya kufika, holowa na nzila mbaha nyejete haciligati ya Misili na Ashuli. Ne wanhu wono wali mu zisi zizo zinyejete, wowa kujenda wakuyumba-yumba mu zinzila zizo zinyejete, ne makungugo mejete, gohemba hamonga.

²⁴ Na kolo vilo vivyo vikuza, Isilayeli kokwilunza na Misili na Ashuli. Ne makungugo gaga madatu, zolowa wulugutwe wono wolowaziza yinze yose.

²⁵ Nayo Muwaha Mulungu we Mihanga kolowalugutiza, yakutya, “Nomulugutizenyi anye nyo Wamisili nyo wanhu wangu, nanye nyo Waashuli, mono namuwumbenyi, hamonga nanye Isilayeli, nyo wanhu wangu wahagulwa.”