Isaya 18 - Luganuzi Luswanu Kuli Wanhu Wose 2002

Mulungu koyilipiciza yisi ya Kushi

¹ Ale, kuko ku nhumbi ye makolongo ga Kushi, ko yili yisi yono kosuma kuhulika mulilo we mabawa.

² Kushi yono yikutuma watumwa wakuziza mwi'kolongo lya Nile, wapandile mu zingalawa zono nozwe ne madete-lulenga. Ale muwuye kwenyu mbela, anye nyo watumwa wapelu-pelu ku lumangho! Mubite ku yisi yenyu yono yili haciligati ye makolongo, kuli likungugo lyenyu lye nghakamo ne vilungo. Kuli wanhu wenyu watali, we miwili yono yitelemeye, wono yinze yose yikuwogopa muno.

³ Ale, ta, muhulicize anye wose mono mwikaye mono'nze! Hono muwone bendela yenulwa mucanyha mu vizuli vye matunda, ale mulanje! Kanyhi mweze muyihulicize ne ndulele kolo yeza kutowa!

⁴ Muwaha Mulungu yanonjela yakatya, “Ane nolanga hasi mhola mhola ku wulawa ku wulanga, nha vyono wubuhe wugwizaga ku cilo mu madaha ge nhwanga, nzelu nhe lizuwa vyono ling'alalaga mu mapango ge misi.

⁵ Na lono zabibu zikali nadudulwa, lono wuluwa wayo wakung'unhika, ne zabibu zapya, walugu wolokuza wawongomeze Wakushi musunho du, kotya munhu mono yakutema vinghonyi vye vivunda vye zabibu no mumaje.

⁶ Ne mivimba ye wasilikale wawo, yolekwa yiligwe ne zindeje hamonga ne malimu ga mu mbago. Mwi'pango lye cibahu, zindeje zowalya, na mu cipango ce cifuku woligwa ne malimu.”

⁷ Ninga vilo vyokuza, vyono Muwaha Mulungu kolowa kubocela kanyhi vilavywa ku wulawa mu yisi yiyi yono yili haciligati ye makolongo, yisi ye nghungugo ye nghakamo, kanyhi yili vilungo, ye wanhu watali, we miwili yono yitelemeye, wono yinze yose yikuwogopa wene. Nawo wolokuza kwi'tunda lya Sayuni, i hanhu hono Muwaha Mulungu we Mihanga, yakuwa kuhembwa.