Isaya 17 - Luganuzi Luswanu Kuli Wanhu Wose 2002

Mulungu koloyilipiciza Siliya na Isilayeli

¹ Muwaha Mulungu yakutya, “Alu ku wulawa lulu, Damesiki si lyolowa yikaya liwaha kanyhi, langa lyowa yilundo du lye matongo.

² Nago makaya ga Siliya, gowa nyika du cibitilila. Howa wudimilo wa ngholo na ng'ombe, hamba hasina mono koloziwinga mumo kanyhi.

³ Nawo Isilayeli wolowa wasina mudimi, nayo Damesiki yolowusizwa wutemi wayo. Nawo wanhu wa Siliya wono wolowa wasigaye, wolowa mu cevu ciwaha nhe wanhu wa Isilayeli. Ane yo nene Muwaha Mulungu we Mihanga, vyo nghutya.”

⁴ Muwaha Mulungu yakutya, “Lizuwa likuza lyono Isilayeli yolowusizwa wuwaha wayo. No wugoli wayo wologaluka wuwe wuciwa.

⁵ Nayo Isilayeli, kolowa yehwanile mugunda wono wakondya kududulwa, walekwa wusina cinji, nho mugunda wono wuli mwi'lolo lya Lefayimu wono wakondya kuhalalizwa mahalalwa, alu wekala wusina cinji.

⁶ Nawo Waisilayeli wolosigala wacefu muno muno, wolowa nho mubici wo muzeyituni wono wakondya kuhepwa mana gose, alu gasigala mejete hamba madatu du ku cinang'anang'a co mubici, hamba mana macefu du gono gasigaye mu manhambi ga mu sika-sika du yo mubici. Ane yo nene Muwaha Mulungu, u Mulungu we Waisilayeli, vyo nghutya.”

⁷ Ne lizuwa lilyo kolo likuza, i wanhu wolomuwuyila Muwumbi wawo u Mulungu mono yelile wa Isilayeli wakulondola wutazi.

⁸ Hamba si wolowika kanyhi witumbilo wawo mu vikumbicilo vyono wavizenga weneco ne miwoko yawo, hamba kwitumbila mu vihwani vyawo vyono wavisesa weneco, nha cinji vihwani vyo mulungu we cicekulu Ashela, hamonga ne vikumbicilo vyawo vyo kufusiza wuvumba.

⁹ Ne lizuwa lilyo kolo likuza, i makaya gose gono gena magomawakali, gololekwa matongo, nhe makaya ge Wahivi na ge Waamoli, gono wagaleka lono wawatizaga i wanhu wa Isilayeli.

¹⁰ Gwe Isilayeli! Mbeka wamusemwa Mulungu mono kakuponyaga, kanyhi mono kakucitilaga nhe litalawe lyono lili vilungo. Alu wahadika mibici mu busitani siwanulwe, ho wuwe kuyihemba milungu mijenzi.

¹¹ Ninga wukumbucile nha vyono, mibici yiyo, hamba yiwe yikutula, no kulavya wuluwa wayo hakali mitondo muno, ninga agwe hamba si kodudula cinji yaye muli yene. Langa gowa magaziko no wusungu wuwaha wono si wulamalika yaye.

I makungugo malugu gakusumwa

¹² I makungugo ge vilungo gali mu wugazi, gakukoloma nhe lizozo lye lilenga vyono lizozaga, gehwanile nho witoweze we mawingo mawaha ge lilenga.

¹³ Makungugo gozoza nhe lizozo lye mawingo mawaha ge lilenga, ninga Mulungu kogatacila, nago gotiziza kutali. Gopemheluswa nhe manghundi mucanyha ye matunda, kotya mawaje mu civulavumbi.

¹⁴ Na mwi'pango lye cinyamihe galetaga wogofye. Ninga kolo wukwela, hodu nago gawa kuwuka. Nalyo lilyo lyo lifungu lyo munhu wo wose mono yakusaka kuyiteka yisi yetu.