Isaya 16 - Luganuzi Luswanu Kuli Wanhu Wose 2002

Mowabu yisina kanyhi witumbilo

¹ Anye nyo wanhu wa Mowabu, ku wulawa mu cikaya ca Sela mu nyika, ale mutegulilenyi ngholo, mukamupele cipegwa mutemi mono yatemile lulu mu Yelusalemi.

² Nawo walindiye ha nhumbi ye likolongo lya Alinoni, wakupilima-pilima wenha zindeje zono wazikumuliye manhuli gazo.

³ Nawo wakuwalonjela wanhu wa Yuda wakutya, “Ale mucilonjele zono citume. Mucicitile nho mubici wono wukung'unhice mahamha gayo mu misi mugati, mucilece cicehe mu mubeho wenyu. Hambi ase nha cili wahamizi, holeka muciwice i hanhu hono munhu yunji si kosuma kuciwona.

⁴ Mucilece cikale mono yisi yenyu. Kanyhi mucicitile kuli wose wono wosaka kucongomeza.” Wukunhulangwe hamonga no wongomezwe, vyose vyolopuluta, na wawo nawo wono wakuyihodanga yisi, nawo nhavivilvya wolopuluta.

⁵ Hanyuma ya zizo, yunji wa muli wana wa Dawudi, yo kolowa mutemi. Nayo mutemi yuyo, kolowatema wanhu ko wihuwilwa na ko wendo. Nayo kanyhi kolowa mupelu ku wituma zo wiling'ano, kanyhi kolosaka ling'ani du yo yitumwe mu wutemi wakwe.

⁶ Nawo i wanhu wa Yuda wolotya, “Nase cihulice nha vyono wanhu wa Mowabu wewoni muno. Kanyhi cimanyile, nha vyono wedunhumuzi muno, kanyhi wevuni, na kumbe no widunhumuzi wawo ho wa bwete du.”

⁷ Ninga 'gwe walekaje! Wololila ku soko ye magayo gono wakugaya. Na wose wololila kolo wakukumbucila ndigwa swanu yono walizaga mwi'kaya lya Kili-helesi, no witumbilo wawo wowuka.

⁸ Ne migunda yono yili behi na Heshiboni, hamonga ne migunda ye mizabibu, yono yili ku Sibuma, yono yalavyaga divayi, yono wetumamilaga watemi we zinghungugo zose, alu yakondya kuhodanjika. Mu mapango ganji, mizabibu yiyo yikatandala sunga ko kwi'kaya lya Yezeli, sunga ku lubavu lwa kucilima mu nyika, na ku lubavu lwa kumwezi, ku nhumbi nzagwe ye Lilenga lyo Mwino.

⁹ Alu nane nghuyililila Yezeli. Ne mahozi gangu gakusulula so Heshiboni na Eleyale. Hambi nha kusina ndudula yono yowasangalaza wanhu.

¹⁰ Alu hasina hamba munhu monga, mono yayisangalaliye migunda yono yifisize muno. Hasina hamba munhu monga mono yakwimba hamba mono yena nyemo ku soko ye migunda yiyo ye mizabibu. Hasina hamba munhu monga mono yakukobonga zabibu yatuje divayi, ne lizozo lye nyemo, lyaduma.

¹¹ Holeka nane nghuzizidika muno ko wukalale ku soko ya Mowabu, kanyhi nghuwona wusungu ku soko ya Kili-helesi.

¹² Nawo wanhu wa Mowabu kolo wakwijela wakubita kwi'tunda lyawo wakahembe, wenjile mu wuhembelo wawo walombe, no wulombe wawo hamba si wohulikwa yaye.

¹³ Ayi yo nghani yono Muwaha Mulungu yalonga kuli Mowabu katali.

¹⁴ Ninga kanyhi aluno Muwaha Mulungu yakutya, “Na mu myaka midatu du, sawo yose ya Mowabu, yowa yamalika. Ne wanhu wakwe wose wofwa, langa wosigala wanhu wacefu du, ninga nawo wawo wono wosigala, wowa wasoceye muno.”