Isaya 15 - Luganuzi Luswanu Kuli Wanhu Wose 2002

Mulungu koyongomeza yisi ya Mowabu

¹ Ayi yo nghani yono yalongwa kuli Mowabu. Makaya ga Ali na Kili, gakondya kongomezwa mu cilo cimonga, ne yisi ya Mowabu yakondya kugwilwa ne cinyamazi ciwaha muno.

² Nawo wanhu wa Diboni wakubita kulilila mu cigongo mucanyha. Wanhu wa Mowabu nawo wakulila ko wukalale ku soko ye makaya ga Nebo na Medeba, waceta ne mitwe yawo ne zindevu zawo ko wusungu wuwaha.

³ Nawo wanhu wono wali mu zinzila, wose wavwalile magunila. Wose wakulila muno muno mucanyha ye matembe na mu mabalangu.

⁴ Wanhu wa Heshiboni, hamonga ne wanhu wa Eleyale, nawo wakulila, ne cililo cawo cikuhulikwa sunga ko ku Yahazi. Sunga ne wasilikale wose wakucicima, no witumbilo wawo wawuka.

⁵ Nane nhumbula yangu yikuyikalalila muno Mowabu! Hambi wanhu wayo nha wakondya kutiziza ku cikaya ca Zowali, na ku Egilati-shelishiya. Wanji watiziza ku Luhiti, akuno wakujenda wakulila. Wanji watiziza ku Holonayimu wakulila wazozize.

⁶ Ne cikolongo ca Nimulimu, naco canyala, ne mahanze gono gacindice mu nhumbi yayo, nago gakondya kunyala, hasina cinji kanyhi cono cidedewaye.

⁷ Nawo wanhu hono wakulowoka likolongo lye mibici ye miyelezi, wavilowose vinhu vyawo kuko, waviponye.

⁸ Ne cililo cikuhulikwa mu mipaka yose ya Mowabu. Cililo cikuhulikwa mu vikaya vya Egilayimu na Beyelelimu.

⁹ Ne likolongo lya Diboni, lidunghuwaye sakami. Nayo Mulungu yakali yawawiciye wongomele wuwaha muno wanhu wawo wono wekaye kuko. Ne wanhu wose wono wakali wasigaye mumo mu Mowabu, wose wolowulagwa.