Isaya 14 - Luganuzi Luswanu Kuli Wanhu Wose 2002

Wuwuye ku wulawa ku wuhamywe

¹ Ninga kanyhi Muwaha Mulungu, kolowawonela lusungu wanhu wakwe Waisilayeli, kolowahagula kanyhi wawe wanhu wakwe. Kolowagomola kanyhi wekale mu yisi yawo, sunga ne wajenzi wolokwinjila vikalane nawo.

² Sunga ne makungugo menji, golowataziliza i wanhu wa Isilayeli, ho wawuye ku yisi yono Muwaha Mulungu yawapela, na hanyuma kanyhi i makungugo gago, golowa nha wawanda, golowetumamila i Waisilayeli. Na wawo wono wawateka Waisilayeli, alu nawo woletekwa ne Waisilayeli no kuwatema wene wono wali wawewoneye.

Mutemi wa Babiloni yali mu yisi ye wafu

³ Muwaha Mulungu kolowaceheza wanhu wa Isilayeli mu wusungu wawo hamonga no wugazwe, na mu wuhinyizwe wo wituma milimo mizito yono wakudindimizwa wetume.

⁴ Nayo kolo yakondya kuwanozeza zizo, ale nawo womusekanga no kumuzwajiza wawe kutya, “Lanjenyi ta u mutemi mono yawakunhulangaga wanhu, alu yali hayi? Yakondya kugwa! Nalu, hamba si kolomukunhulanga yunji kanyhi!

⁵ Hambi Muwaha Mulungu nha yakondya kuvidumya i vilungo vye watemi wabi,

⁶ wono wawakunhulangaga wanhu kwa nzizila, no kujendelela kuwapela magayo i makungugo gono wali wakondya kugasuma.

⁷ Ninga nhondo lu, yinze yose yikusangalala vyono yatuga wutule, hamonga no mulamu. Ne wanhu wose wasangalala, wakwimba so nyemo.

⁸ Lanje, sunga ne mibici ye misonobali hamonga ne mibici ye mihagata, yose yikuwusangalalila wugwe wo mutemi mono yakondya kugwa. Vyono aluno nhondo, hasina kanyhi munhu mono kowa kuyitemanga yaye!

⁹ “Nayo yisi ye wafu, yikwiwikaniza yimubocele mutemi wa Babiloni. Yikusinhuswa ne myuhe ya wose wono wali wena vilungo mono'nze. I myuhe ye watemi yikuwuka mu magoda gayo go wutemi.

¹⁰ Ne myuhe yose yomulonjela yiwe kutya, ‘Alu nagwe wasocela cinya sese! Wehwana na sese!

¹¹ Wekalaga wukutogozwa ne mazi ge masumbi, ninga 'lu lanje, wuli mu yisi ye wafu. Ne zi semembe zolowa yo nyhingo yako, nazo zolowa funicizwe no mutote we manyongololo.’

¹² “Gwe go mutemi wa Babiloni, go nyelezi yono ying'alalaga hakali mitondo, alu hodu wagwiza ku wulawa ku wulanga! Ninga katali ho wali wugasumize makungugo, alu ninga wakondya kugwiswa sunga ho hasi.

¹³ Wukawa wina wuhile wo kubita kucanyha ku wulanga, wukaliwice ligoda lyako lyo wutemi mucanyha ye zinyelezi zono zili kucanyha muno muno. Nagwe wehwesaga nha vyono kolowa wutemile na mu matunda gono gali kusumuka kono milungu yikongholelaga.

¹⁴ Kanyhi wehwesaga nha vyono kobita ko kucanyha ye mavunde wihwane na Mono Yalawiliciye Muli Vyose.

¹⁵ Ninga 'lu kumbe ho wategulwa ku'si muno muno ku yisi ye wafu.

¹⁶ “Nawo wono wokulanga, wokukomalila ne meso, no kukulonga wakutya, ‘Mwene nye! Mbeka yuyu yo munhu mono yayisinjisa yinze, no kugacicimya ne matemi?

¹⁷ Mwene mbeka du, yuyu yo munhu mono yagongomeza makaya, no kuyinoza yinze yiwe nyika? Yo yuyu mbeka mono si yasaka hamba no kuwalecela wafungwa wakwe, yawakombole wawuye ku zikwawo?’

¹⁸ Lanje! Sunga ne watemi wose we yinze wazicigwe mu vitenjelo vyawo vye lilumbo,

¹⁹ ninga agwe, hamba citenjelo bwete wusina, no muvimba wako wotagwa du wuwolele kunze. Wowa wuli hamonga ne mivimba ye wasilikale wono wawulajilwa ku wulugu, nagwe kogumilwa hamonga nawo mwi'vwenjela lye mabwe, no kukanyanjilwa.

²⁰ Hambi agwe, nha wayihodanga yisi, wukawawulaga ne wanhu wako. Holeka nagwe hamba si kolozikwa nha vyono watemi wanji wazikwaga ng'o. Kanyhi na muli we mhuga yako wose i wabi, hasina hamba monga mono kolopona.

²¹ Holeka luno, mwiwikanizaje, mongomeze! Hambi i wana we cilume wo mutemi yuyu, nha wanojeye wawulagwe, ku soko yo wubi we walezi wawo. Kanyhi howa hasina hamba monga wa muli wene, mono kolotema mono'nze no kuzenga makaya.”

Mulungu koloyongomeza Babiloni

²² Muwaha Mulungu we mihanga yakutya, “Noyihoma Babiloni niyongomeze. Noyileka yili bwete, yisina hamba wana, hamba mono kowa mumi. Yo nene Muwaha mulungu vyo nghutya.

²³ Nane noyinoza Babiloni yiwe malamba ga malenga, ne matuwi gawe kwikala mumo. Kanyhi noyifwagula Babiloni ne liteyu lyono lyovifwaguliza vinhu vyose no kuvyongomeza. Yo nene Muwaha Mulungu vyo nghutya.”

Mulungu koloyongomeza Ashuli

²⁴ Muwaha Mulungu we mihanga yelahiza yakutya, “Mbeka, nha vyono nehwesa, na vyo yowa du. Na zono nali mbikanize kuzituma, zokwitumwa du.

²⁵ Nowongomeza Waashuli mu yisi yangu, ya Isilayeli, kanyhi nowakanyanjila mu matunda gangu. Nane nawawusiza wanhu wangu lubano lwe wanhu wa Ashuli, hamonga no mutegulo muwaha wono wadinghuye.

²⁶ Na gaga go mahweso gono nghuyihweseza yinze, ngoloye no muwoko wangu ho niwaling'anize makungugo gose.”

²⁷ Muwaha Mulungu yakondya kudumula nghani nha vyono zizi zose zofisilizwa. Mwene yawugoloye muwoko wakwe ho yalipicize. Na hasina munhu wo wose mono kosuma kumwimila.

Mulungu koyongomeza yisi ye Wafilisiti

²⁸ Azi nazo zo nghani zono zalongwa mu mwaka wono yafwila mutemi Ahazi.

²⁹ Nye nyo Wafilisiti, mulece kusangalala, mukutya hambi nghome yono mukatowelwa nha yabeneka, musina soko yo kusangalala nhavivyo. Mumanye nha vyono, lono nzoka monga yikufwa, yokuza kanyhi yono 'mbi kuciza yiyo yono yifwiye. Kanyhi mumanye nha vyono, ligangha lye lizoka, liganghasaga lizoka likali lyono ligulukaga.

³⁰ Nayo Muwaha Mulungu kowadima i wasocele wa muli wanhu wakwe, kanyhi kowaleka wekale wapolile. Ninga anye nyo Wafilisiti, Muwaha Mulungu kolomuletelenyi nzala mbaha muno, nayo yolomuwulajenyi nyenye wose, na holowa hasina hamba monga mono yalasigala mumi.

³¹ Holeka anye nyo Wafilisiti, mulile mu makaya genyu gose mulondole wutazi! Wose mogope! Hambi livunde lye manghundi, nha likuza likulawilila kusumuka, lipuga lye wasilikale wo wulugu, wakali, kanyhi wasina woga.

³² Alu hamba ciwapitule ciwe kutyaci i wanhu wono wacizize wakulawa ku Wafilisiti? Ninga ase cowalonjela du nha vyono Muwaha Mulungu yakondya kuyisimya Sayuni, i wanhu wakwe wono wakugazwa ho wasume kutiziza mumo no kuwa wapolile.