Isaya 12 - Luganuzi Luswanu Kuli Wanhu Wose 2002

Lwimbo lo Wulumbe

¹ Ne lizuwa lyolokuza lono wanhu wolokwimba wawe kutya, “Nghukulumba 'gwe go Muwaha Mulungu! Hamba wuwe wali wungholeywe likuwo, ninga aluno wusindamice, wulece kungholelwa kanyhi likuwo.

² Mulungu yo mhonelo yangu nomwitumbila mwene, hamba si nokogopa cinji yaye. Hambi Muwaha Mulungu, nha yo kamhelaga 'ne vilungo no wusume, kanyhi yo muponyi wangu.

³ Ne wanhu wo Mulungu wasangalalaga lono yawaponya, nha vyono malenga ge mbeho gamusangalazaga mono yena nyhilu mwizuwa likali.”

⁴ Ne lizuwa lyolokuza lono wanhu wolokwimba wawe kutya, “Mulumbenyi Muwaha Mulungu! Mucemelezenyi yamutazenyi! Mugalonjele makungugo gose ze metumo gakwe! Muwalonjele zo wuwaha wakwe!

⁵ Mwimbilenyi Muwaha Mulungu so metumo gakwe mawaha gono yetumile. Ne wanhu wose wazihulice zo lukumyo lwakwe.

⁶ Muwalekaje wose wono wekaye mu Sayuni, wembe ne mazi mawaha wawe kutya, Mulungu mono yelile we Waisilayeli, yo muwaha, kanyhi yekalane ne wanhu wakwe.”