Hoseya 7 - Luganuzi Luswanu Kuli Wanhu Wose 2002

¹ “Mu madaha gono nghuhila kuwaponya wanhu wangu Isilayeli no kuwanoza wamoteswe kanyhi, ninga zono nghusuma kuwona muli wene, wo wavu wawo no wubi wono wakwituma. Wakwiyihiziza weneco wose, wakubena mu zikaya no kuhiza, wakuwahiziza wanhu mu zinzila.

² Hamba siwakwihwesa mu zinhumbula zawo, vyono nowukumbucila wubi wuwu wose, no wubi wawo wuwapilime, hamba si wihundice ho ndece kusuma kuwuwona.”

Wilumbanize wo kuyinozeza zimbi kaya yo wutemi

³ Muwaha Mulungu yakutya, “Wanhu wamukonga mutemi ne wawaha wakwe, ko wuhile wawo wo wubi.

⁴ Wene wose wakoci, kanyhi hamba si wehuwilwa. Ne likuwo lyawo, likwaka nha moto mu mafigwa, wono si mufwanghane, sunga muteleci kolo yakondya kuwutiwa wusaje we cisase, na kolo wakondya kutumba, ho wutelekwe.

⁵ Mwi'zuwa lye sikukuu yo wukumbucile wo wuwikwa mwi'goda mutemi, wakamunoza mutemi hamonga ne wawaha wakwe, wakang'wa muno divayi sunga wakagala.

⁶ Na mbeka wuhile wawo wubi, wukoleye nha moto mu mafigwa. Ne likuwo lyawo lifunghaga, na ko muno ku cilo, na kolo wela, lyakaga nha malambi ga moto.

⁷ “Mu moto we likuwo lyawo wakawawulaga walongola wawo. Ne watemi wawo wakawa kuwulagwa yumonga yumonga, ninga hasina hamba monga mono yakulomba wutazi kuli'ne.”

Isilayeli ne makungugo

⁸ Muwaha Mulungu yakutya, “Waisilayeli weza kotya mukate wono si mupitulwe. Wene wetumbiye makungugo gono gawapilime.

⁹ Hamba si wakumanya vyono witumbilo wawo wuwo wa muli wajenzi, wakondya kuwahiziza vilungo vyawo. Na vyono vilo vyawo viwale, ninga wene hamba si wakumanya yaye.

¹⁰ No wiwoni we Waisilayeli wukuwahomelela weneco, ninga muli zizo zose zono zejela, hamba siwasuma kumbuyila ane no Muwaha Mulungu, u Mulungu wawo.

¹¹ Isilayeli yakuyumbayumba ako na ako kotya nziwa ndele, wanhu wakwe ha lulongozi wakasaka wutazi kuli Misili, na aluno kanyhi wakumanyhila ku Siliya.

¹² Ninga ane notandaza lwavu ho niwagwize kotya ndeje za mucanyha. Kanyhi nowalipiciza ku soko yo wubi wono wetumile.

¹³ “Woyi he nye! Hambi nha wandeka 'ne, kanyhi wambedegala. Ninga walekaje, wokongomezwa du. Nali nyendile niwaponye, ninga wuhembi wono wakuhemba 'ne, wo wuhembi wo wulambi.

¹⁴ Hambi nha si wakusuma kulomba kuli 'ne kwe nhumbula yo winenenyhezi yaye, langa wakwigwisa no kwigalagaza hasi nha vyono wanozaga wono si wamumanyile Mulungu. Na lono wakulomba so wuhemba ne divayi, wakwisalanga-salanga mu miwili no kwipela nghomele nha wono si wamumanyile Mulungu. Nhondo hamba watye, wo wubedegazici waco wuwu.

¹⁵ Ninga hamba yiwe yo nene mono nawafunda, nghawakamya ne vilungo, hamba nhavivyo wene vyo wakunyihweseza zimbi du.

¹⁶ Vyo wakali du wakuwuya ne nyuma wakundeka, wakumutyatya mulungu wo wulambi, mono yasina vilungo. Waweza si wehuwilwa hamba hadodo, waweza nha wupinde wono si wukwiliye cinji. Hambi walongola wawo, nha wakulonga ko wivuni, ninga walekaje, wolofwa cifo cibi muno, sunga ne Wamisili wolowaseka.”