Hoseya 6 - Luganuzi Luswanu Kuli Wanhu Wose 2002

Wunene wo wukoci, we wanhu

¹ Wanhu wakutya, “Alenyi ciwuye kuli Muwaha Mulungu! Mwene yacitamisa yakondya, ninga yamanyile vyono kociponya! Yacipela zinghomele, ninga kociponya zinghomele zetu.

² Na mu vilo vyejete hamba vidatu, kocinula, nase cokwikala womi hali mwene.

³ Alenyi cimumanye Muwaha Mulungu. Mwene kokuza kuli'se lono wela hakali mitondo muno, nayo kokuza kuli'se kotya mvula ye mhinga yono yidedewazaga yisi.”

⁴ Ninga Muwaha Mulungu yakutya, “Isilayeli na Yuda, alo nghanici yono nomutendelenyi? Wendo wenyu kuli'ne wawuka musunho nha vyono nghungulyosi lye hakali mitondo, kotya buhe, yono siyitinyaga kunyala.

⁵ Ayi yo soko yono yaleka nghamutumilenyi wawizi wangu, hamonga no luganuzi lo wuling'anizwe, no wongomezwe kuli'nye. Na yono nghusaka kuli'nye yoyi.

⁶ Ane nghusaka wendo wenyu we mbeka kuli'ne, hamba si nghusaka makumbiko genyu ge zimitugo. Kanyhi ane nghuwona yili ciba hono wanhu wangu wamanye 'ne si nho kundavizya vilavywa vinyanywe.

⁷ “Ninga wene weza nha Adamu, wacibena cilagane cono calagana nane.

⁸ Gileyadi, lye 'kaya lyono limemile wanhu wabi ne wawulaji.

⁹ Ne wakohani wenha litewa lye wahizi wono watejeye munhu wamwibate. Wakwituma zo wuwulaji, sunga ko ku hanhu hono helile ku Shekemu. Kanyhi wakwituma wubi wuwo ne nyono du.

¹⁰ Kanyhi niyiwene nghani 'mbi yo wogofye muli Isilayeli, wanhu wangu wetajila mu wavu weneco, so wuhemba vihwani.

¹¹ “Nanye kuli'nye anye nyo wanhu wa Yuda, nakondya kuwika lipango lyo kumulipicizenyi, ku soko ya zizo zono mukwituma.