Hoseya 5 - Luganuzi Luswanu Kuli Wanhu Wose 2002

¹ “Ale, muhulicize zizi, anye mo wakuhani! Muhulicize nyo Waisilayeli! Muteje makutu genyu anye nyo we nyumba yo mutemi! Hambi nha munojeye nyenye mulavye ning'aniza ye mbeka. Ninga alu, wuling'anizwe womuwuyilenyi nyenye nyo weneco. Hambi nha mweza muli mutego ku Mizipa, no lwavu lono lugoloywe mwi'tunda lya Taboli.

² Ne yikombo yitali mwi'kaya lya Akasiya, nane nomulipicizenyi nyenye wose.

³ Hambi nha niyimanyile Isilayeli vyono yinha, holeka si yosuma kwihundika yaye hali'ne. Hambi nha yeza si nyihuwilwa yaye, sunga ne wanhu wayo hamba si wanojeye wahembe nene.”

Hoseya yakulavya suguzi kuli wukumbika vihwani

⁴ Wubi wono wanhu wetumile, wukuwemila ho walece kumuwuyila Mulungu wawo. Hambi wukumbika vihwani, nha wuwebate muno muno, holeka si wamumanyile no Muwaha Mulungu yaye.

⁵ No wiwoni we Waisilayeli, wukuhomelela muli wene. No wubi wawo wukuwakobaza no kuwagwisa, ne wanhu wa Yuda wakugwizana hamonga nawo.

⁶ Nawo wakusola zingholo zawo ne zing'ombe, ho wamulavizye Muwaha Mulungu likumbiko, nazo hamba si zikuwanoza ho wawe waswanu ng'o. Hamba si wosuma kumuwona Mulungu, hambi Mulungu nha yakondya kuwaleka wene.

⁷ Vyono wene wali si wehuwilwa hali Muwaha Mulungu, sunga ne wana wawo wali si wakwe yaye. Holeka nalu wene hamonga ne'si yawo, wokongomezwa musunho.

Wulugu wa Isilayeli na Yuda

⁸ Mutowe ndulele yo wulugu mu Gibeya! Ne zifuluti mu Lama! Nanye kuko ku Betaveni, mucenje so wulugu! Nanye mo wanhu wa Benyamini, mwinjile mu wihomi!

⁹ Lizuwa lyo wulipicizwe likuza, na Isilayeli yokongomezwa. Anye nyo Waisilayeli, zizi mbeka zokwijela!

¹⁰ Muwaha Mulungu yakutya, “Ane ngholigwe yikuwo ku soko wawaha wa Yuda, wenjila mu mipaka ya Isilayeli, no kuyihiza yisi yawo.” Holeka nane nowetila likuwo lyangu kotya malenga.

¹¹ Isilayeli yakugaya so wiwonelwe, hambi nha yakondya kwajiliza yisi yono yali ling'ani yakwe, vyono mwene yabita kulondola wutazi, kuli wono si wosuma kumupela wutazi wo wose.

¹² Holeka nane noleta wuhodanje kuli Isilayeli, no wongomezwe muli wanhu wa Yuda.

¹³ “Nayo Isilayeli yali yeza kuwona vyono yatamwa, nayo Yuda yali yeza kuziwona zinghomele zakwe, hodu Isilayeli yakawa kubita ku yisi ya Siliya kulondola wutazi kuli wutemi wuwaha, ninga hamba nhavivyo, nayo hamba si kosuma kuwaponya, hamba kuzinoja zinghomele zawo.

¹⁴ Nane nowahungucila wanhu wa Isilayeli na Yuda kotya simba. Nowahawanga no kuwaleka baho. Na lono nowa nakondya kuwasola, hasina munhu yunji kanyhi mono kusuma kuwaponya.

¹⁵ “Nane nowaleka wanhu wangu wagaye mu nghango yo wubi wawo, sunga waze wanondole 'ne. Na mumo lunji mu wugaye wawo, mo wolosuma kunondola wahidimbaye sunga wambone.”