Hoseya 14 - Luganuzi Luswanu Kuli Wanhu Wose 2002

Wulombe wa Hoseya kuli Isilayeli

¹ Ale, muwuyilenyi Muwaha Mulungu wenyu, anye nyo wanhu wa Isilayeli. Wubi wenyu wo waleka mukekobala no kugwa.

² Muwuyilenyi Muwaha Mulungu, no wulombe awu wuwe co cilavywa cenyu kuli mwene. “Gwe Muwaha Mulungu, wucinenelaje wubi wetu wose, kanyhi wubocele wulombe wetu nase cokukumya agwe nha vyono cehuwiza.

³ Hambi Ashuli nha sikociponya yaye, hamba fwalasi zo wulugu sizosuma kucitaza. Hamba sicolotya kanyhi kuli vihwani vyetu vye milungu, vyono vyene yo Mulungu wetu. Gwe Muwaha Mulungu, wulajile lusungu kuli wawo wono wasina ku wubito.”

Muwaha Mulungu yakwihuwiza mikalile mipya kuli Isilayeli

⁴ Muwaha Mulungu yakutya, “Nane nowagomola wanhu wangu wawuye kuli'ne nowenda kwe nhumbula yangu yose, hamba sinolowakolelwa likuwo kanyhi.

⁵ Nane nowa nha mvula mu'si nghavu kuli Waisilayeli. Nawo wosanula nhe 'luwa, kanyhi wohimbiza muno milela hasi, kotya mibici ya Lebanoni.

⁶ Nawo wokwikala no kujendelela kuwiluka wupya, no wuswanu wawo, wowa nho wuswanu we mizeyituni. Nawo wowa na mhunjile, yinhe miyelezi ya Lebanoni.

⁷ Na kanyhi wokwikala hasi yo wudimwe wangu, kanyhi wotula nha ngano. Nawo wowa na mhunjile swanu, nhe divayi ya Lebanoni.

⁸ Waisilayeli, wowa wasina kanyhi cinji co kwituma kuli vihwani, nolowupitula no wulombe wawo no kuwadima nolowacitiza no mubeho kotya mubici wono wudedewaye. Hambi nha yo nene mono nili mwamulizo wo wulugutwe wawo wose.”

Ze ndumilizo

⁹ Nghulomba, wono wena wizuce, wazitanje zizi zono zandicigwe baha, no kuziwika mu zinhumbula zawo. Nzila zo Muwaha Mulungu zo ze ling'ani, ne wanhu we ling'ani, wo wakuzityatya. Ninga wanyo wubi, wakukobala no kugwa, ku soko vyono siwaziceleleye yaye.