Hoseya 13 - Luganuzi Luswanu Kuli Wanhu Wose 2002

Wuling'anizi we ndumilizo kuli Isilayeli

¹ Vipango vyono vyapuluta, lono wo mulango wa Efulayimu walongaga, ninga we milango yinji ya Isilayeli wogopa, wakawa wamulanjile Efulayimu. Ninga wanhu wetuma wubi so kumuhemba Baali, na ku soko yiyo, wofwa.

² Sunga nalu wakucila kwituma wubi, wakwinozeza vihwani ho wavihembe. Wakwinozeza vihwani vya fweza, vinozwe ne miwoko ye wanhu kwe mahala gawo weneco. Nawo wakutya, “Ale muvilavizyaje makumbiko!” Alu wanhu ho wovinonela wule vihwani vivyo, i vihwani vyono vine futa ye zindama!

³ Holeka wanhu awa wokwajilila nhe nghungulyosi lya hakali mitondo, nhe buhe yono yikunyala musunho. Wowa kotya mawaje gono gapemheluswaga ne civulavumbi mu cuga. Kanyhi kotya lyosi lyono likulawa ha mafigwa.

⁴ Muwaha Mulungu yakutya, “Ane yo nene Muwaha Mulungu wenyu, mono namuwusenyi Misili. Musina Mulungu yunji langa nene du.” Ane yo nene du mono nili muponyi wenyu.

⁵ Nane nghamudimenyi mu yisi nghavu ya mu nyika.

⁶ Ninga lono mwali mweza kwinjila mu yisi swanu, yono mukulya no kwiguta, hodu imitima yenyu yikekumya no kusemwa 'ne.

⁷ Holeka ku soko yiyo, nane nomuhungucilenyi nha simba. Nolambalala hasi, nimutejezenyi nha suwi mu zinzila zenyu.

⁸ Nane nomuhungucilenyi nhe dubu lyono litajile wana wayo, kanyhi nomudemulanjenyi. Nomuhawanjenyi kotya simba, no kumudemulanjenyi vidodo vidodo kotya nimu ya mu mbago.

⁹ “Nane nomongomezenyi anye nyo Waisilayeli! Nayo nani mono kosuma kumutazenyi?

¹⁰ Mukalomba mutemi ne walongola, ninga woliponya nhawule likungugo?

¹¹ Nane nghamupelelenyi watemi mwi'kuwo lyangu, ninga kanyhi niwawusiza mu wukali wangu.

¹² “Wubi wa Isilayeli ne masutya gakwe, vyose vyandikwe no kuwikwa ciwutwa.

¹³ Isilayeli yena cilejeho co kwikala mumi. Ninga yo nghani yo wulele kuwihwesa havivi, hambi nha yenha mugalika mono yali mu cidaha co kulelwa, ninga kawa kulemelela mu'nda yo nyina.

¹⁴ Nane hamba si nowaponya wanhu we liwala lili, mu yinze ye lifwa, hamba kuwaponya mu vilungo vye lifwa. Agwe go lifwa, wulete lihuhuji lyako! Nagwe go yinze ye lifwa, wulete magazo gako! Nane hamba si nowawonela lusungu yaye wanhu wawa.

¹⁵ Nayo Isilayeli, hamba yawe yaficile nhe mabalwe, ane noleta mbeho ya kucilima kulawa mu nyika yono yili moto, nayo yonyaza mivwilo yawo ye malenga, hamonga ne masima. Nayo yolovipemhelusa vinhu vyose vyono vikwendeza.

¹⁶ Nayo Samaliya yinojeye yilipicizwe, ku soko yo kundeka 'ne. Ne wanhu wakwe wolofwa ku wulugu, ne wana wawo wagalika, wolowa kubamilizwa hasi, ne wacekulu wono wena mida, awo nawo wolotumbulwa.”