Hoseya 11 - Luganuzi Luswanu Kuli Wanhu Wose 2002

Wendo wo Muwaha Mulungu kuli wanhu wakwe wono wamulema

¹ Muwaha Mulungu yakutya, “Lono Isilayeli yali mudodo, nali nimwendile, nghamucema mwanangu yawuce ku Misili.

² Ninga nha vyono nacila kumucema, nayo vyo yakacila kundeka no kutyatya zakwe. I wanhu wangu wakawalavizya makumbiko Mabaali, wakafusiza wuvumba ivihwani.

³ Ninga ane yonene mono nawafunda Isilayeli wajende. Nawadinghula wanhu wangu mu mawoko gangu, ninga wene hamba siwamanya vyono ane nawaponya, no kuwadima.

⁴ Nane nghawakwega ko wuhile wangu na ko wendo wangu. Nghawasola no kuwakamisa kwe vilungo vyangu. Nghenama no kuwalisa.

⁵ “Ninga wene wakalema kumbuyila, holeka yiwanojeye wawuye ku Misili, nayo Mwashuli yo kowatema.

⁶ No wulugu wolokwinjila mu makaya gawo, no kugabenanga i malango ge likaya lyawo, wulugu wolowongomeza.”

⁷ Wene wakucila kuwuya ne nyuma. Ninga wololila ku soko yo lubano lono luli muli wene, hamba hasina munhu mono kololuwusa muli wene.

⁸ “Nosuma nhawule kukuleka 'gwe Isilayeli? Nosuma wule kukutaga? Hamba si nosumila lukulu kukongomeza, nha vyono nayongomeza Adima. Hamba kukunozeza nha vyono nayinoza Zeboyimu? Nhumbula yangu siyonghombola ho nitume zizo! Hambi wendo wangu kuli'gwe, nha wuwaha muno.

⁹ Holeka si nomulipicizizenyi mwi'kuwo lyangu ng'o. Hamba sinoyongomeza Isilayeli kanyhi. Hambi 'ne nha nili Mulungu, hamba si nili munhu yaye. Ane yonene Mono Yelile, mono nili hamonga nanye. Hamba sinomuzizenyi mwi'kuwo lyangu yaye, ho nimongomezenyi.

¹⁰ “Wanhu wangu wolonhyatya kolo nghukoloma nha simba kuli walugu wawo. Wolonyiziza musunho ku wulawa ku lubavu lwa kumwezi.

¹¹ Wolokuza ku wulawa Misili, wolokuza musunho nha ndeje, na ku wulawa ku Ashuli, wolokuza nha nziwa. Nane nolowagomola ku zikaya zawo kanyhi. Vyo nghutya ane no Muwaha Mulungu.”

Isilayeli na Yuda wakuhoswa

¹² Muwaha Mulungu yakutya, “Waisilayeli wamhilima hamonga no wulambi no wukonji. Ne wanhu wa Yuda nawo, wakali wakunema 'ne no Mulungu mwihuwilwa, Mono Yelile.