Hoseya 10 - Luganuzi Luswanu Kuli Wanhu Wose 2002

¹ Waisilayeli wali wenha kotya nha muzabibu wono wulelile zabibu nyinji muno. Mu nghango yo wumoteswe wawo, yikawa yo nghango yo wonjeleze wo kuzenga vikumbicilo vinji. Na mu nghango yo wulezi we yisi yawo vyono wali winha, ale, yo nghango yo wuswanu we masumbili ge mabwe maswanu gono wanoza, gono wahembaga.

² Ne wanhu wono nhumbula zawo nghoci, alu wogaya so wubi wawo. Mulungu kovibenanga vikumbicilo vyawo, no kugahodanga ne masumbili gawo.

³ Wanhu wawo siwotinya kutya, “Alu cisina mutemi, ku soko vyono sicikumogopa Muwaha Mulungu. Ninga hamba nhavivyo, u mutemi kocitumilaci?”

⁴ Wakulonga nghani zono zisina nhunizo, no kwihuwiza wihuwizo wo wulambi, no kwituma nghani zono zisina cambuzi. Ne ling'ani, yeza si ling'ani, yikuwiluka kotya mabalwe gono gena sumu mu mugunda wono wakondya kulimwa.

⁵ Ne wanhu wono wekaye mwi'kaya lya Samaliya, wotuga woga no kulila so wajilize we ndama ye zahabu ya ku Beteli. Wene hamonga ne wakohani wono wacitumamilaga cihwani cico, wolocililila muno. Wololila walaza kuwa wawusizwa nhojo yawo yo lukumyo.

⁶ Ne cihwani cico ce ndama, colosolwa sunga ko ku Ashuli, ciwe kodi kuli wutemi wa Ashuli. Nayo Isilayeli yolokolwa cevu no kuwona soni so nghani yayo yeneco.

⁷ No mutemi wayo kolosolwa kotya lifulo mucanyha ye malenga.

⁸ Na mucanyha ye cigongo ca Aveni, hono Waisilayeli wakuhemba vihwani, naho holokongomezwa. Mamivya ne mabalwe, vyolowiluka mu makumbicilo gawo. Ne wanhu wologalonjela matunda wawe kutya, “Mucihundikaje!” Ne vigongo wakutya, “Mucigubikaje!”

Muwaha Mulungu yakulonga zo wuling'anizi kuli Isilayeli

⁹ Muwaha Mulungu yakutya, “Waisilayeli siwakuleka kuwituma wubi kuli'ne, ku wulawa mu cipango co wubi wawo wa ku Gibeya. Holeka wulugu wolowagana ku wulawa ku Gibeya.

¹⁰ Nowebata wanhu awa wanya wubi niwalipicize. Ne makungugo golokwihanguliza hamonga ho gehome nawo, wololipicizwa so wubi wawo vyono winji.

¹¹ “Nayo Isilayeli yenha ndama yono yakondya kwijizwa, yono yendile kutowa wuhemba, ninga nghwihwesa vyono, ciba niyiwicile lubano mu singo yayo swanu, ho niyitonje yisume kwituma mulimo muwaha. Nomunoza Yuda yawe yo mukwega lisili, nayo Isilayeli yawe yo mutulanga malowanjila mu nyuma yo muyagwe.”

¹² Nane nghutya, “Muyilime yisi mhya, so nyenye nyo weneco, muhadice ling'ani no kududula wendo no wulugutwe wono wolawa mu wuhembi wenyu wa kuli'ne. Alu co cipango cenyu co kumbuyila, ane no Muwaha Mulungu wenyu, nane nokuza nimumwajilenyi wulugutwe wangu.”

¹³ Ninga anye mwahadika wavu, no kududula nhwanga yayo. Alu mwakondya kulya mikalo yono yikulawilila mu wulambi wenyu. Ku soko vyono mwali mwitumbiye matuka genyu go wulugu, ne wasilikale wenyu vyono wenji.

¹⁴ Holeka wulugu wolowaziza i wanhu wenyu, ne magomawakali genyu golokongomezwa. Yolowa nhe vilo vyo mutemi Shalimani, vyono yalyongomeza likaya lya Betalibeli ko wulugu. Wanyina za munhu, hamonga ne wana wawo, wakatowa sunga wakafwa.

¹⁵ “Azi zo zilejela kuli'nye wanhu wa Beteli, ku soko yo wubi wenyu wono mwetuma. No wihomi wulawa kwanza, mutemi wa Isilayeli kolowulagwa.”