Ezila 9 - Luganuzi Luswanu Kuli Wanhu Wose 2002

Ezila yakumanya zo wutole wo kwihanzahanza na wono si Wayahudi

¹ Zizi zali zeza kukondya kwituma, wanji wa muli walongola wa Isilayeli, wakanyiziza no kunonjela vyono, i wanhu hamonga ne wakohani ne Walawi, siwasuma kwisiwanula ne wanhu we zi'si zono zali ziwapilime, ze Waamoni, Wamowabi, Wamisili hamba Wakanani, Wahiti, Wapelizi, Wayebusi, ne Waamoli. Wajendelela kwituma wubi wono i wanhu wawa wetumaga.

² Nha vyono Wayahudi, wakondya kutola wacekulu wono si Wayahudi. Holeka wanhu wo Mulungu wetipiza mu wubi. Kanyhi walongola ne wawaha, wali wo walongozi kwitipiza.

³ Nane Ezila, nali neza kuzihulika zizi, nghakalala muno, nghawa kuvidemulanga ne vivwalo vyangu, nghekulanga ne zimvwili zangu, hamonga ne zindevu zangu, ko wusungu wuwaha muno. Nghekala hasi nghawa nhijinhice ko wukalale wuwaha.

⁴ Nekala baho du no wusungu wangu, sunga i mapango go kulavizya vilavywa vye cinyamihe gakafika. Ne wanhu wono wogopa zono Muwaha Mulungu wa Isilayeli, yazilonga, so wubi wa wono wawuya ku wulanga ku wuhamywe, wakenghogholela wose hamonga.

⁵ Cipango co wulavye we cilavywa ce cinyamihe cali ceza kufika nghenuka ne vivwalo vyono videmuce, nghafugama, nghalomba, akuno nimwaliye ne maganza gangu Muwaha Mulungu, u Mulungu wangu.

⁶ Nghawa kumulomba nghutya, “Gwe Muwaha Mulungu, ane nghwiwonela cevu muno hamba kukwinulila ne meso gangu. Hambi wubi wetu nha wacila muno. Nawo wonjelecela sunga ko ku wulanga.

⁷ Ase co wanhu wako, cetuma wubi winji hali'gwe, ku wulawilila mu vipango vye walezi wetu sunga nalu. Na ku soko yo wubi wetu wuwo, sese hamonga ne watemi wetu, ne wakohani wetu, cikegwiliza mu miwoko ye watemi we zisi ze cijenzi. Cikawulagwa no kuhizwa, sunga cikasolwa nha cili wafungwa. Cakondya kukozwa cevu ciwaha muno muno nha vyono yinha zuwali.

⁸ Gwe Muwaha Mulungu na mu cipango cici cidodo du, wasuma kucimotya no kucitaza, na wanji wa muli sese, cakondya kuwuka mu wuwanda, no kuceha baha i hanhu hono helile cipolile. Waciwusa ku wuwanda, wacipela wumi.

⁹ Na mbeka cali cili wawanda, ninga agwe si wacileka cijendelele mu wuwanda. Langa wawanoza watemi wa ku Pelisiya wendezwe kucikombola cize ku Yelusalemi no kuyizenga kanyhi Nyumba yako yono yakumulwa, lyono lyali lyeza yitongo, kucipela na sese wikalo wono wupolile mu muno mono yisi ya Yuda na Yelusalemi.

¹⁰ Alu 'gwe go Muwaha Mulungu, cotya wule 'mbi lono zizi zose zejela? Nalulu nha cakondya kanyhi kugabedegala malajilizo gako,

¹¹ gono wacipelela mu nzila ye wawizi. Wakacilonjela vyono, yisi yono cobita cikayiteme, yo yisi yo wubi winji, ku soko i wanhu wono wekalaga mumo, wali wakondya kuyimemya wubi, hamonga ne makomaza.

¹² Kanyhi wawizi wawa, wakacilonjela vyono, cilecele lukulu kwitolanila ne wanhu wawe hamba kuwalondolela mulamu hamba kuhanga nawo wumoteswe hamba kuwega mikalile yawo, hono mbeka ciwe cikusaka kwikala viswanu mu'si, kanyhi nase ho cize ciwalecele we zindelo zetu wuhazi we yisi yiyi cibitilila.

¹³ Hamba no wulipicizwe wa kuli'se, wono wetumwa no Muwaha Mulungu so wubi ne masutya getu, cimanyile vyono agwe go Mulungu wetu, wacilipiciza hadodo du vyono si cali cinojeye cilipicizwe, kanyhi wacileka cijendelela kuwumipa.

¹⁴ Alu cosuma nhawule kugabedegala malajilizo gako, ho citolanile kanyhi ne wanhu wawa i wabi? Hambi nha cimanyile vyono hono citume nhavivyo, agwe go Muwaha Mulungu kokalala nhondo ho wucongomezeze lukulu hamba yunji si kosigala yaye.

¹⁵ Ninga agwe go Muwaha Mulungu wa Isilayeli, agwe yo wuli we ling'ani, hambi nha kucileka cikale cili womi. Holeka nase cikunena wubi wetu ne masutya getu hali'gwe, hamba si cinojeye kuza na ha mwande yako.”