Ezila 4 - Luganuzi Luswanu Kuli Wanhu Wose 2002

Wimilwe wo kuyizenga kanyhi Nyumba yo Mulungu

¹ I walugu wa Yuda na Benyamini, wali weza kuhulika vyono awalya wono wawuya ku Yelusalemi ku wulawilila ku wuhamywe, wakuyizenga kanyhi ha Yelusalemi Nyumba yo Muwaha Mulungu, u Mulungu we Waisilayeli.

² Hobaho wakawa kumubitila Zelubabeli ne walongola wa mu zindelo zawo, wakawatya, “Cikulomba nase cimutazenyi kuyizenga Nyumba yo Mulungu, hambi na sese nha cikuwa kumuhemba Muwaha Mulungu, mono na nyenye mukuwa kumuhemba. Nase cijendelelaga kumulavizya vilavywa ku wulawa mu vilo vyo wuteme wa Mutemi Esale-hadoni wa ku Siliya lono yaciletela ho cikale baha.”

³ Nayo Zelubabeli, hamonga na Yoshuwa ne walongola wose wa mu zindelo ze wana wa Isilayeli wakawapitula wakawatya, “Kaa! Ase cisina wuhile na nyenye mucitaze kuyizenga Nyumba yo Mulungu, u Mulungu wetu. Ase cozenga sese co weneco du cili wene, nha vyono calajilizwa na Koleshi u mutemi wa ku Pelisiya.”

⁴ Hobaho i wanhu wono wekalaga mu yisi yiyo wakanza kuwogofya no kuwatukuwika mitima Wayahudi, no kuwemila walongola wawaha wo wutemi wa Pelisiya ko kuwafupa zisawo ho wasume kuwemila u wuzenji wuwu.

⁵ Nawo wajendelela kwituma nhavivyo mu vilo vyo wutemi wa Koleshi u mutemi wa Pelisiya, sunga na mu vilo vyo wutemi wa Daliyo u mutemi wa Pelisiya.

Wimilwe wo kuzenga kanyhi Yelusalemi

⁶ Ale, mu mwamulizo wo wuteme wakwe mutemi Ahasuwelo, i walugu wono wekalaga ku Yuda na Yelusalemi wakaleta baluwa yono yawasonjezaga Wayahudi.

⁷ Kanyhi na lono yali yatemile Alitashasita mutemi wa ku Pelisiya, Bishilamu na Miteledati, na Tabeli, hamonga ne wayawo wose, wakandika baluwa kuli mutemi Alitashasita. Baluwa yiyo, yali nyandice mu nonga ye Cialamu. Na lono yasomwaga hamwande yo mutemi, yamula kupitulwa mu nonga ye yisi yakwe.

⁸ Nayo Lehumu umulongola, hamonga ne Shemushayi u mwandici, nawo wakamwandicila mutemi Alitashasita, nayo yalolosaga zinghani za Yelusalemi yikutya,

⁹ “Baluwa yiyi yikulawa kuli Lehumu mulongola wa mwi'tumbi, hamonga na Shimushayi mwandici, na kuli wayawo wose, Mahakimu, na kuli walongola wono walawilila ku Eleki na Babiloni na ku Shushani, mu yisi ya Elamu.

¹⁰ Hamonga na wanji, wono Asebanipali we vilungo, yawahamya mu wulawa mu zikaya zawo, no kuwekaza mwi'kaya lya Samaliya, na mwi'tumbi lya ku lubavu lwa ku mwezi ye likolongo lya Efulata.”

¹¹ Baluwa yatezaga nhavi: “Kuli'gwe mutemi Alitashasita, baluwa yiyi yikulawilila kuli wetumami wako wa mwi'tumbi lya ku lubavu kwa ku mwezi ye likolongo lya Efulata.

¹² Gwe go Mutemi ase cikusaka wumanye vyono, mu wutemi wako, Wayahudi wono wawuya ku wulawilila ku wuhamywe, mu zi 'si zono zicipilime, alu wakondya kufika no kwikala mu Yelusalemi. Nalu wanza kanyhi kuzenga likaya lilya i libi lye cibede, lyono silikwendeza. Alu wanza kanyhi kuzenga majinji, nayo yikwijela vyono wogakondya mbela mbela hamonga no kuwunozeleza u musinji.

¹³ Holeka Gwe go Mutemi! Hono likaya lili lizengwe, ne majinji gayo gakwilanicile, ale, wumanye vyono, wanhu wopela kulipa kodi mu wutemi wako ne zipesa mu wutemi wako zocepuka.

¹⁴ Alu vyono ase cili hasi yo wutemi wuwu, 'gwe go mutemi, ase si cali cende kuwona agwe wukubedegalwa. Holeka ciwone viswanu cikusugule.

¹⁵ Wulondole mu vitabu vyono wetumamilaga i watemi walongozi. Na mumo komanya vyono mbeka likaya lya Yelusalemi wulawa katali, lyali lina cibede ciwaha, kanyhi watemi ne walongola wa ha mwamulizo, wawonaga wukamu na uzito wo kulitema. Na yo yaleka likaya lilyo likongomezwa.

¹⁶ Holeka ku soko yiyo ase cikukulonjela mbeka, hono cileceleze walizenje no kulinula likaya sunga ne majinji gayo gakondye, ale, wumanye vyono wutemi wako siwosuma kuwatema wanhu wayo no kulitema litumbi lya ku lubavu lwa ku mwezi ye likolongo lya Efulata.”

¹⁷ Nayo mutemi yakawagomolela lipitulo yakatya, “Kuli Lehumu u mulongola wa mwi'tumbi, hamonga na Shimushayi u mwandici na kuli wayenyu wose wono mwi'kaye nawo mwi'tumbi lye Samaliya, na wa kumhelo ya ku mwezi ye likolongo lya Efulata, mulamu kuli'nye.”

¹⁸ “Baluwa yono mwandetela yapitulwa mu nonga ya mu yisi yangu, nane nayisoma nghayizuka.

¹⁹ Nghalavya wulajilize wutandizi wunozwe, mbeka yejela vyono Yelusalemi ku wulawa katali, yaletaga makani menji mabi, gono si ganojeye mu wutemi wono wulongoleye. Kanyhi wali wamemile mazozo no kulema kutemwa.

²⁰ Watemi wono wali wali vilungo vyo kutema, wawo wakatema sunga ko kwi'tumbi lyo lubavu lwa ku mwezi ye likolongo lya Efulata, nawo wakakonghola kodi hamonga ne zisawo zinji.

²¹ Holeka aluno nghukulonjela, wulavye yilajilizo, wanhu wawo ho walece kujendelela kuzenga kanyhi, sunga lono nolowalajiliziza nene no mweneco.

²² Holeka wuzinozaje zizi mbela mbela ho kulece kwijela wuhodanjice wo wose mu wutemi wangu.”

²³ Ale, lipitulo lili lyo mutemi lyali lyeza kuwaficila wa Alitashasita, likasomwa ha mwande ya Lehumu na Shimushayi hamonga na wayawo wose. Hodu wakawa kubita musunho ku Yelusalemi no kuwalonjela Wayahudi walecele lukulu kujendelela kulizenga likaya.

Mulimo wo kuyizenga Nyumba yo Mulungu wukwanza kanyhi

²⁴ Mulimo wo kuyizenga Nyumba yo Mulungu wukema, sunga mu mwaka we kejete wo wutemi wo mutemi Daliyo mutemi wa Pelisiya.