Ezila 3 - Luganuzi Luswanu Kuli Wanhu Wose 2002

Wuhembi wukwanza kanyhi

¹ Ale mu mwezi wo mupunghati lono Waisilayeli wose wali wakondya kuwuya no kuceha mu makaya gawo, wose wakekongholela ha Yelusalemi.

² Yoshuwa u mwana wa Yozadaki ne wakohani wayagwe, na Zelubabeli u mwana wa Shelatiyeli, hamonga ne wanduguze wakazenga cikumbicilo co Muwaha Mulungu we Waisilayeli, so vilavywa vinyanywe. Nha vyono nyandikwe mu wulajilize wa Musa u munhu wo Mulungu.

³ Nawo wose wono wawuya ku wulawa ku wuhamywe hamba wawe wali wakali wena woga so wanhu wono wekalaga mu yisi yiyo. Ninga hamba nhavivyo, wakazenga cikumbicilo i hanhu hono cali cizenjigwe ha mwamulizo. Hanyuma wakawa kwanza kumulavizya Muwaha Mulungu vilavywa vinyanywe vyono wavilavyaga mu mazuwa gono gali gawajigwe, hakali mitondo ne cinyamihe.

⁴ Wakayinoza sikukuu ye vibanda nha vyono yinha mu wulajilize. Na mu vilo vyose, wakawa wakulavya vilavywa nha vyono vyasakagwa mwi'zuwa lilyo.

⁵ Hamonga ne vilavywa vivyo, walavyaga kanyhi ne vilavywa vinyanywe vye nhondo zose, ne vilavywa vye sikukuu, mu ndawo yo mwezi mupya, na vyono walavyaga mu wihangulize wawo, lono wamuhembaga Muwaha Mulungu wawo. Hamonga ne vilavywa vyawo vyono wamulavizyaga ko welecele Muwaha Mulungu nha vyono wali wendezwe weneco.

⁶ Hamba nha wawe wali wakali nanza ku wuzenga Nyumba yo Mulungu, ninga wakanza du lwa kamonga kumulavizya vilavywa vinyanywe Muwaha Mulungu mwi'zuwa lilongozi lya mu mwezi wo mupunghati.

Wanze wo kuzenga kanyhi Nyumba yo Mulungu

⁷ I wanhu wakalavya zipesa ho walipwe misahala i wazenji ne wasesa zimbawo. Wakalavya ne zindigwa ne ving'wegwa ne mafuta, ho vitegulwe mu makaya ga Tulo na Sidoni, wakavikawe ne zimbawo ze mihagata ku yisi ya Lebanoni, nazo zimbawo zizo zikaletwa mu nzila ye lilenga sunga ha Yopa. Na zizi zose ziketumwa so wulajilize wo mutemi Koleshi wa ku Pelisiya.

⁸ Ale waza kufika mwezi we kejete wa mu mwaka we kejete, ku wulawa lono wawuyila ku Yelusalemi, wakawa kwanza mulimo wo kuyizenga Nyumba yo Mulungu. Zelubabeli, na Yoshuwa hamonga ne wandugu zawo wa mu 'si, ne Wakohani wose, ne Walawi, na wose wono wawuya ku Yelusalemi ku wulawilila ku wuhamywe, wakelunza hamonga mu mulimo wuwu. Iwalawi wono wali waficile myaka makumi mejete hamba kuciza, wawo wo wawikwa wawe wo walanjilizi mu mulimo wuwo wo kuyizenga Nyumba yo Mulungu.

⁹ Yoshuwa mulawi, hamonga ne wanagwe ne wanduguze, na Kadimiyeli, ne wanagwe, (wo lulelo lwa Hadaviya) nawo wakenjila mu wulanjilizi (wo kuyizenga Nyumba yo Mulungu. Ne Walawi wa mu lulelo lwa Henadadi wo wawatazaga)

¹⁰ Nawo wanhu wali weza kwanza kuwuzenga musinji we Nyumba yo Mulungu, wakohani wakavwala vivwalo vyawo vye cikohani, wakasola ne zindulele mu miwoko yawo, wakema hanhu hawo, I Walawi nawo wa mu mhuga ya Asafu, wakasola misesele yawo, nawo wakema baho. Wakawa kumwimbila no kumukumya Muwaha Mulungu nha vyono yali yilajilizwe mu vilo vyo mutemi Dawudi.

¹¹ Wakemba wakumukumya Muwaha Mulungu. Wembaga no kuwuyajiza wuyajiza wakutya. “U Muwaha Mulungu muswanu, kuli Waisilayeli. No lusungu lwakwe lwa cibitilila.” Wose wakawa kwimba wazozize kwe vilungo wakumukumya Muwaha Mulungu, so mulimo wo musinji wono wali wanzwa, wo kuyizenga Nyumba yo Mulungu.

¹² Ninga wenji wa muli Wakohani i wakombi, hamonga ne Walawi, ne walongola wa mu zindelo, wono wali wakondya kuyiwona Nyumba yo Mulungu ye katali, na lono walangaga musinji we Nyumba yiyo yo Mulungu vyono wukuzengwa, hobaho wakawa kwanza kulila wazozize muno. Ninga wanji wono wali baho wazozaga wusangalale wuwaha.

¹³ Hali hasina nyimanya ya munhu kusuma kutemanula lizozo lyo wusangalale na lye cililo, ku soko lizozo lyono lyali baho, lyali yiwaha no kuhulikwa hanhu hose.