Ezekiyeli 9 - Luganuzi Luswanu Kuli Wanhu Wose 2002

Yelusalemi yikulipicizwa

¹ Hobaho nghahulika Mulungu, yakucema ne 'zi yiwaha yakutya, “Anye nyo wanhu mono molyongomeza likaya, ale muze, muleteleze ne vitwalo vyenyu.”

² Hobaho baho du wakaza wanhu wali mutandatu, wakulawilila ku mulango we Nyumba yo Mulungu wo lubavu lwa kusumuka, akuno wose wadinghuye ne vitwalo vyawo. Na muli wene, mwali mo yuli yunji, mono yali yavwalile myenda ya bafuta, akuno yadinghuye cidawo co wino hamonga ne peni yo kwandicila. Na wose wakenjila, wakema ha cikumbicilo ce shaba.

³ Hanyuma ya zizo, nhojo yo Mulungu we Waisilayeli, yikenuka yikulawa mwi kelubi kono yikalaga, yikawa kubita sunga ha mulango we Nyumba yo Mulungu. Nayo Mulungu yakawa kumucema munhu yuyulya mono yali yavwalile myenda ye bafuta, yakawa kumulonjela yakamutya,

⁴ “Alu, wubite wukole muciligati ye likaya lyose lya Yelusalemi, wukawawicile vitanjilo mu vihanda vyo wusu wawo, wanhu wose wono wakuwona wusungu no kugazika mu zinhumbula zawo, ku soko ye makani ge mawifyo gono getumwagwa mwi'kaya lili.”

⁵ Nghamuhulika Mulungu yakuwalonjela awalya i wanji nawo yakuwatya, “Ale, nanye wose mumutyatyaje yuyo muyenyu, nanye mukole muciligati ye likaya muwawulaje wanhu wose, mulece kusigaza hamba monga yaye, hamba kumuwonela lusungu munhu wo wose ng'o.

⁶ Muwawulagaje i wakombi wose, ne wa wazelelo wose, ne wahinza wose, ne wanyina zo munhu wose, hamonga ne wana wadodo wose. Langa du mulanjilile, mulecele lukulu kuwapamiza wanhu wose, wono wena vitanjilo mu vihanda vyo wusu wawo. Ninga hamba nhavivyo, mwamulizizaje bahano du mono Nyumba yangu.” Hobaho nawo wakawa kwanziza baho, wakawawulaga walongola wose, wono wali wali baho ha Nyumba yo Mulungu.

⁷ Hanyuma, Mulungu yakawalonjela kanyhi yakawatya, “Alu muyavufyaje Nyumba yangu, muyimemye ne mivimba, hanyuma ho mulawanize mubite muketume nha vyono nonjile!” Hodu, hobaho wakawa kwanza kuwawulaga wanhu mwi'kaya.

⁸ Na lono mulimo wuwo wali wukali wujendeleye, ane no mweneco, nghawa sigaye baho nili wene du. Nane hobaho nghegwisa hasi wugubama, nghazoza nghatya, “Gwe go Muwaha Mulungu, alu hongo wayikolelwa muno likuwo Yelusalemi, sunga lu weza kusaka wuwawulaje wanhu wose wono wakali wasigaye mu Isilayeli?”

⁹ Ninga Mulungu yakamhitula yakatya, “I wanhu wa Isilayeli na Yuda, wetuma wubi muno. Hambi yisi yose nha yimemile wu wulaji, kanyhi wakondya kuyinjiza Yelusalemi mu wu wula cihuliko, wakondya kugabena malajilizo gangu. Kanyhi wakutya, ane no Muwaha Mulungu, nakondya kuyileka yisi yawo, na vyono ti, hamba si nghuziwona na zono wetumaga.

¹⁰ Ninga nane lu, hamba si nowawonela lusungu yaye, langa nowatendela wene, nha vyono nawo wawatendelaga wanji.”

¹¹ Hanyuma ya zizo, u munhu yuyulya mono yali yavwalile myenda ye bafuta, yakawa kuwuya, yakawa kumuloloseza Muwaha Mulungu yakutya, “Gwe go Muwaha Mulungu, ane nakondya kuzifisiliza zose zono wandajiza nizitume.”