Ezekiyeli 8 - Luganuzi Luswanu Kuli Wanhu Wose 2002

Wugubulilwe we kejete wa Ezekiyeli kulawa kuli Mulungu

Wuhembi we Vihwani mu Yelusalemi

¹ Na mwi'zuwa lye hano, lya mu mwezi wo mutandatu, wa mu mwaka wo mutandatu, wa mu wuhamywe wetu, mwi'zuwa lilyo, wakawa waza walongola wetu wo wuhamywe wetu, wakulawa ku yisi ya Yuda, wakawa wacehile ha kaya yangu hamonga nane. Nane nghawona vilungo vyo Muwaha Mulungu vyanyiziza nhinicizo kwe vilungo muno.

² Nane nali neza kugalamila kucanyha, nghagubulilwa, nghawona hwani ya munhu yakwijela nho wijele wo moto. Ne hwani yiyo, ku wulawilila ha ciwino sunga ko ku migulu, yejelaga nha moto. Na mu wulawilila ha ciwino sunga ko kucanyha, yali yinha wijele wo wubulile wo wung'alale nha cuma ca shaba nghusulwe muno.

³ No munhu yuyo, yakagolola cihwani co muwoko wakwe, yakanyibata mu cizukwi ca mu mutwe wangu. Na mu wugubulilwe wuwu, u Muhe wo Mulungu wukanyinula mu mwanya mucanyha, wukanhegula sunga ko ku Yelusalemi. Wukambika ha mulango wo lubavu lwa kusumuka, wo kwinjilila mu Nyumba yo Mulungu, i hanhu hono hali hawicigwe cihwani cono cali ce liwifyo muno hali Mulungu.

⁴ Na baho nghayiwona kanyhi nhojo yo Mulungu we Waisilayeli, nha vyono nayiwona mwi'zuwa lilyo lono nali nili he kolongo lya Kebali.

⁵ Na lulo baho, u Mulungu yakanonjela yakatya, “Gwe go munhu, ale wupituce ta wulanje ku lubavu lwa kusumuka.” Nane nali neza kupituka, nanje nhavi, nghaciwona cihwani cono cali ce liwifyo muno hali Mulungu, ciwicigwe behi ne cikumbicilo ca ha mulango wo kwinjilila mu Nyumba yo Mulungu.

⁶ Mulungu yakanonjela kanyhi yakatya, “Gwe go munhu, wule, wukuziwona zono wakwituma? Wulanje ta zinghani ze mawifyo zono wetumaga baha i wanhu wa Isilayeli, wakuminga 'ne ho mbite kutali ne hanhu hangu hono helile. Ninga hamba nhavivyo agwe wugole du, kogawona ne makani ganji menji ge mawifyo gono gacizize na gaga.”

⁷ Hanyuma yakawa kusola, yakanhegula sunga ko ku mulango wo kwinjilila mwi'kumbo lya kunze, yakandajila lilanga lyono lyali yitobole mwi'jinji.

⁸ Yakanonjela yakatya, “Gwe go munhu, ale wuhimbe baho mwijinji.” Nane nali neza kuhimba, nghawona baho mulango.

⁹ Nayo yakanonjela kanyhi yakatya, “Ale, winjile mugati, wuziwone zimbi zono zili mumo. Zinghani ze cevu zono wanhu wa Isilayeli wazitumaga bahano.”

¹⁰ Ale, baho, nane nghawa kwinjila mugati, nghawa kuzilanga za mumo. Nghawona mu majinji mbavu zose wukakate wa wutakalang'onyo wa manhu menji du, nha cinji mazoka, hamonga ne malimu menji du i mavufywe. Hamonga ne mang'onyo-ng'onyo menji du gono Waisilayeli wagahembaga.

¹¹ Nghawawona ne walongola makumi mupunghati we Waisilayeli wono wali wali baho, hamonga na Yazaniya u mwana wa Shafani. Nawo wawa wose wali webate viya vyo kufusiza wuvumba, munhu na cakwe mu miwoko yawo. Ne lyosi lyo wuvumba lyabitaga kucanyha.

¹² Nayo Mulungu yakambuza yakatya, “Gwe go munhu, wule, wukuziwona ta zono wakwituma cinyele i walongola we Waisilayeli? Wuwalangaje ta, wose wakuhemba mu nyumba yono yimemile vihwani. Akuno wakwikojela wakutya, ‘Mulungu nha si yakuciwona! Hambi nha yakondya kuyileka yisi.’ ”

¹³ Hanyuma kanyhi Muwaha Mulungu yakanonjela yakatya, “Ane nghukulonjela nha vyono, koziwona zinghani nyinji ze mawifyo zono zicizize zizi.”

¹⁴ Yakasola kanyhi yakanhegula ku mulango wa ku lubavu lwa kusumuka we Nyumba yo Mulungu, yakawa kundajila wacekulu wono wakulila, ku soko ye lifwa lyo mulungu mono yakucemwa Tamuzi.

¹⁵ Baho yakambuza yakatya, “Gwe go munhu, wule, wukuziwona zizo? Ninga nghukulonjela nha vyono wukali, ninga koziwona zimbi muno muno zono zicizize na zizi.”

¹⁶ Hanyuma kanyhi, yakawa kusola, yakawa kunhegula sunga ko kwi'kumbo lya haciligati ye Nyumba yo Mulungu. Na baho naho, nghawawona wanhu waficile kotya nha wanhu makumi mejete na wahano nhavi, wemile behi no mulango we hanhu hono helile, haciligati ye cikumbicilo no mulango. Wali wemile wahapituciye migongo i hanhu hono helile, akuno wakugundama walanjile ku lubavu lwa kucilima wakulihemba lizuwa.

¹⁷ Muwaha Mulungu yakanonjela kanyhi yakatya, “Gwe go munhu, wule, waziwona zizo? Awa i wanhu wa Isilayeli, hamba si wakucilwa yaye ne zinghani ze bwete, zo wituma zinghani zizi ze mawifyo, zono wuziwene baha. Hamonga no kuyimemya wubi yisi yose. No kuzitumila zizo zose bahano mono Nyumba yangu. Ne nghani yiyi yikucila kunghoza likuwo 'ne. Kanyhi lanje vyono, wakucila kunhovula muno mu nzila yono 'mbi muno muno.

¹⁸ Ninga wuwalekaje 'gwe, hambi nha wowuwona wukali we likuwo lyangu. Nane si nowaleka hamba kuwawonela lusungu yaye. Nawo hamba wandilile kwe mazi mawaha muno muno, ane hamba si nowahuliciza yaye.”