Ezekiyeli 7 - Luganuzi Luswanu Kuli Wanhu Wose 2002

Ndumilizo ye yisi ya Isilayeli yasejelela

¹ Muwaha Mulungu yakanonjela kanyhi yakatya,

² “Gwe go munhu, ayi yo nghani yono ane no Muwaha Mulungu nghuyilonjela yisi ya Isilayeli nha vyono. Ayi yo ndumilizo ye yisi yose ya Isilayeli!

³ “Gwe go yisi ya Isilayeli, indumilizo yako yakondya kuza. Nagwe koliwona likuwo lyangu, hambi 'ne nha nghukulipiciza ku soko ye zimbi zono wetumaga. Nane nokuling'aniza mu nghango ye mawifyo gako kuli'ne.

⁴ Nane nomulipicizenyi du, hamba si nomuwonelenyi lusungu yaye. Langa nomulipicizenyi du ku soko ye makani genyu ge mawifyo gono mwitumaga. Nanye baho nhondo ho molomanyila vyono ane yo nene Muwaha Mulungu.”

⁵ Kanyhi azi zo Muwaha Mulungu yakulonga yakutya, “Alu wulanje! Magazo mawaha gokuziza gakwilecela linji ne liyagwe.

⁶ Hambi zose nha zamalika. Na wuwu wo mudumo wazo. Nagwe hodu yo ndumilizo yako.

⁷ Ne ndumilizo yenyu yikuza kuli'nye nyo wanhu wose mono mwikaye mu'si. Ne lidaha lyasejelela, lono holowa hasina kanyhi wusangalale we zisikuku u mu matunda gono mugasiwanuye, langa holowa no wucelewale du.

⁸ “Nanye lu moliwona likuwo lyangu musunho. Hambi nha nghumuling'anizizenyi mu nghango ye metumo genyu. Nane nomuling'anizenyi mu nghango ye mawifyo genyu vyono genha.

⁹ Nane nomulipicizenyi du, hamba si nomuwonelenyi lusungu yaye. Langa nomulipicizenyi du ku soko ye makani genyu ge mawifyo gono mwetumaga. Nanye baho nhondo ho molomanyila vyono ane yo nene no Muwaha Mulungu, na vyono yo nene mono nghumulipicizenyi.”

¹⁰ Langa ta, lizuwa lye magazo lyeza kumuzizenyi 'nye nyo Isilayeli. Woyi he kuli'nye so magazo gago mawaha. Hambi wiwoni wenyu nha woduma.

¹¹ Ne magazo gago nha goleta zimbi muno. Holowa hasina cinji ca muli wene, cono colosigala yaye, hamba sawo, hamba lilumbo lyawo, hamba lukumyo lwawo.

¹² Lipango likuza. Nalyo lizuwa lyasejelela lono holowa hasina kanyhi munhu mono kolowa kugula cinji hamba mono kolowa kwambaza cinji. Hambi wulipicize wo Mulungu, nha wolowaziza wanhu wose.

¹³ Kanyhi holowa hasina musuluza wo wose mono kolosuma kuhaliza co cose cono yali yakondya kutaga. Hambi likuwo lyo Mulungu lulo nha lyolowagwila wanhu wose. Na mwi'pango lilyo, holowa hasina munhu mubi mono kololekwa yawumipe.

¹⁴ Hambi ndulele nha yololila ho yiwawikanize wanhu wose. Ninga hasina hamba munhu monga mono kololawila yabite ku wulugu yaye, hambi likuwo lyo Mulungu nha lyolowagwila wanhu wose.

Wulipicizwe we Waisilayeli so wubi wawo

¹⁵ Kunze kolowa wihomi mu zinzila. Namo mu zikaya molowa matamwa ne lizala. No munhu wo wose mono kolowa mu mawimbi mwi'daha lilyo, ayo kolofwila mu wihomi. Nayo mono kolowa mwi'kaya mwi'daha lilyo, nayo kolofwa so matamwa ne lizala.

¹⁶ Na wanhu wanji wolotiziza mu matunda nha nziwa zono zogofywa mu wikala mu malolo. Ne wanhu wose wolowulilila wubi wawo.

¹⁷ Ne miwoko yawo yose yolotimba, ne magulu gawo golocicima.

¹⁸ Nawo wolovwala magunila, akuno wakucicima so woga wuwaha muno. Woloyiceta mitwe yawo, wolokozwa cevu ciwaha muno.

¹⁹ Na kanyhi wolozigumilanga mu zinzila zahabu zawo hamonga ne zifweza zawo, hamba kuzisaka kanyhi yaye. Hambi nha hasina zahabu hamba fweza zono zosuma kuwaponya yaye, kolo wukali wo Mulungu wukuwaziza. Hamba si wolosuma kuzitumamila ho ziwegutye masulumizi gawo, hamba kuwegutya mu zinda zawo. Hambi zizo zi zahabu hamonga ne zifweza, nha zo zawatajila mu wituma wubi.

²⁰ Lulo, wedunhumulilanga mu wuswanu we vibwe vyawo vyo wuguzi wukamu, ninga wakavitumamila mu wunozeza vihwani vye mawifyo. Na yiyo yo soko yono yikaleka nayo Muwaha Mulungu, yakayinoza sawo yawo yiwe nha vinhu vyavufye kuli wene.

²¹ “Nane nolowaleka wajenzi waze wavitece, nawo wanhu wabi waze wayisole sawo yawo yose, wayavufye.

²² Nane hamba si nolowemila yaye wawo wahizi kolo weza kuyibena no kuyavufya Nyumba yangu.

²³ “Alu nghani zose zolowa zakondya kwitiwa, hambi yisi nha yolowa yimemile cililo ce mafwa, nago makaya golowa gali mu wulugu.

²⁴ Ale, nane mwi'pango lilyo ho nilagaletela baha i makungugo mabi muno, gaze gazisole zikaya zenyu. Sunga ne wanhu wenyu we vilungo, wolowula vilungo lulo, kolo nawatuma makungugo waze wahavufye i hanhu henyu hono muhembelaga.

²⁵ Wuhodanjice wolokuza. Nanye mololondola mulamu, ninga hamba si molowuwona yaye.

²⁶ Ne magazo golowa kuza getunjiliye gakwilecela linji ne liyagwe. Ne mapwepwe nago, golowa menji ako na ako. Nanye molowa kuwalomba wawizi ho wamulonjelenyi zono zokuza. Nawo wakohani, wolowa wasina nghani yo yose yo kuwejiza wanhu. Nawo wanyamhala, lulo wolowa wasina cono wowasugula wanhu.

²⁷ Sunga no mutemi nayo, kolowa kulila du, nayo u mwana wo mutemi kolowa yasina witumbilo kanyhi. I wanhu wose nawo, wolowa wakucicima du so woga wuwaha. Nane nomulipicizizenyi mu nghango yono nanye mwawaling'anizaga wanji. Na zizi zose zolomulajilenyi nha vyono ane yo nene Muwaha Mulungu.”