Ezekiyeli 6 - Luganuzi Luswanu Kuli Wanhu Wose 2002

U Muwaha Mulungu yakuwuhosa wuhembi we vihwani

¹ Muwaha Mulungu yakanonjela yakatya,

² “Gwe go munhu, ale, wugalangaje matunda ga Isilayeli, wugalonjele zono nghukulajiliza.

³ Wugalonjelaje matunda ga Isilayeli vyono ganojeye gazihulice zinghani zo Muwaha Mulungu. Gahulice zono ane no Muwaha Mulungu, nghugalonjela matunda, ne vigongo, hamonga ne makolongo, ne malolo. Vyono ane nohongomeza no mumaje hanhu baha hose hono wanhu wakuvihembela vihwani.

⁴ I makumbicilo gawo golomwagulwanga, ne vikumbicilo vyawo vyo kufusiza wuvumba, navyo vyolotulwangwa. Ne wanhu wose, wolowulajilwa ha mwande ye vihwani vyawo.

⁵ Nane noloyiyagaza mivimba ye Waisilayeli ako na ako. Nologeyagaza mafupa ge mivimba yawo, gapilime vikumbicilo vyawo.

⁶ Sunga ne makaya gose ge Waisilayeli, golokongomezezwa lukulu, ne makumbicilo gawo hamonga ne vihwani vyawo, vyose vyolotulanjililwa lukulu. Navyo vikumbicilo vyawo vyo kufusiza wuvumba, vyose vyolopondanjizwa no kwiyagazwa, ne vinhu vyose vyono wowa wanozize, navyo vyolokwajililila lukulu hamba kwijela kanyhi yaye.

⁷ Ne wanhu wolowulagwa mbavu zose. Na wose wono walasigala womi, wawo wolomanya vyono ane nili Muwaha Mulungu.

⁸ “Ninga nolowasigaza wanji walece kuwulagwa, nawo wawo wono wolosigala,

⁹ wolokwiyagalila mu zinghungugo zinji, wakekale kuko nha wafungwa. Nawo lono wowa wali kuko, wolonghumbucila lono wali mugati ye makungugo, no kumanya nha vyono yo nene mono niwalipicize no kuwakoza cevu, ku soko yo wuwula wihuwilwa wawo. Hambi nha wakondya kundeka 'ne, no kwenda vihwani si nha nene. Holeka ku soko yiyo, wolowa wakondya kwiyavufya weneco ku soko yo wubi, hamonga ne makani ge cevu gono wetumaga.

¹⁰ Nawo nhondo ho wolomanyila vyono yo nene Muwaha Mulungu, na vyono sunga ne zinghani zangu kuli wene si zali za bwete yaye.”

¹¹ Muwaha Mulungu yakanyitya, “Gwe Ezekiyeli, wutowe maganza, wuyisambe yisi kwa vilungo! Hanyuma wulile ko wusungu muno ku soko ye mabi gose ge Waisilayeli, hamonga ne makani ge cevu gono wagetumaga. Nalu wose wofwa no wulugu, hamonga ne lizala ne matamwa.

¹² Nawo wono wali ku zi'si zo kutali, wotamwa no kufwa, nawo wono wali baho behi, wowulagwa no wulugu. Nawo wono wowa wakali wasigaye, awo lizala lyowakopola. Nawo wose woliwona likuwo lyangu vyono linha.

¹³ Ne mivimba yawo wose, yolowa yiyagaye mu vihwani vyawo, yipilime vikumbicilo vyawo. Kanyhi yinji yolowa yiyagaye mu vigongo vyose vitali, sunga na mu matunda gose. Sunga na mu masina ge mibici yose yono yidedewaye, na mu mibici yose yo munghola ye mahamha menji. Sunga ne hanhu hose hono wene walavizyaga makumbiko gawo ge vilavywa vinyanywe kuli vihwani vyawo. Na ku soko yiyo wose ho wolomanyila vyono ane yo nene Muwaha Mulungu.

¹⁴ Heya mbeka, nane nolowugolola muwoko wangu niyongomeze yisi yawo. Nolowugolola muwoko wangu, niyinoze yisi yawo yiwe yibalangu, ku wulawilila kwi nyika lya ku lubavu lwa kutakama, sunga ko kwi'kaya lya Libula lyono lili ku lubavu lwa kusumuka. Hamba si nolohasigaza hanji ho hose hono wekaye Waisilayeli. Na mu nzila yiyo, wose ho wolomanyila vyono ane yo nene Muwaha Mulungu.”