Ezekiyeli 5 - Luganuzi Luswanu Kuli Wanhu Wose 2002

Ezekiyeli yakuziceta zimvwili zakwe

¹ U Muwaha Mulungu yakatya, “Gwe go munhu, wusole mumaje mukali, wuzicete zindevu zako hamonga ne zimvwili zako. Na kolo waziceta, wuzisole wuzipime wuzito wayo, hanyuma wuzitemanule mafungu madatu.

² Wusole lifungu limonga, wuziticimize mu moto, wuziticimizize mwi'kaya mugati, lono milewo yamalika. Hanyuma kanyhi wulisole lifungu linji, nazo wuzidumulanje no mumaje wako, akuno wukujenda, lono wukuwuka mwi'kaya. Ne lifungu lyono lisigaye, nazo wuzigumile mucanyha ziyagale mu mbeho, nane nozityatilila no mumaje wangu.

³ Ninga hamba nhavivyo, wusigaze mvwili nyhefu, wuziwope mwi'cindo lye myenda yako.

⁴ Hanyuma yayo kanyhi, wusole mvwili nyhefu za muli zizo, wuzigumile mu moto wuzilece zitakamile. No moto wolowa muli zene, wutandale mwi'kungugo lyose lya Isilayeli.”

⁵ Muwaha Mulungu yakatya, “Langa, ta, ali lyo likaya lya Yelusalemi, lyono naliwika haciligati ye yinze, hamonga ne ma'si ganji gose gono galipilime.

⁶ Ninga Yelusalemi yagabedegala malajilizo gangu, nokwilajila vyono yene yo 'mbi muno si nhe ma'si ganji gono galipilime. Hambi Yelusalemi nha yalema kuwibata malajilizo gangu, hamonga no wulajilize wangu.

⁷ Holeka anye wa mwi'kaya lya Yelusalemi, alu muhulicize zono nghulonga, ane no Muwaha Mulungu. Alu vyono mwakondya kugabedegala malajilizo gangu, hamba kuwibata yaye no wulajilize wangu, alu, mweyambalila nyenye nyo weneco, mweyinjiza mu magayo, si nhe makungugo go gose gono gamupilimenyi. Hambi nha mwayityatya myoto ye makungugo ganji.

⁸ Holeka luno ane no Muwaha Mulungu, nghumulonjelenyi vyono, ane nawa nili mulugu wenyu. Nomulipicizenyi ko wulipicizwe wono i wanhu we makungugo gose wowuwona calinze.

⁹ Ku soko aluno mukwituma zinghani zose zono si zikunyendeza. Holeka nane noyilipiciza muno Yelusalemi mu nghango yono nghali nayitendela ne lizuwa linji, mu nghango yono si nilayitendela kanyhi yaye.

¹⁰ Na mu ndipicizwa yiyo, iwalezi wa mu Yelusalemi, wololya i wana wawo, nawo wana wololya walezi wawo. Nolomulipicizenyi no kumwiyagazizenyi mu malanga gose, kanyhi holowa hasina hamba yunji mono yalasigala mumi.

¹¹ “Holeka ane vyono nili Mulungu mumi, azi zo nghani zo nghutya. Hambi 'nye nha mwayavufya Nyumba yangu ku soko ye zimbi zenyu, hamonga ne zinghani ze cevu zono mukwituma. Holeka nane nomulecenyi hamba si nomuwonelenyi lusungu yaye.

¹² Lifungu lilongozi lye wanhu wako, wofwila mwi'kaya so matamwa na so nzala, lifungu lye kejete, awo wolowulajilwa kunze ye likaya no mumaje, nawo we lifungu lye kadatu lye ndumilizo, noloweyagaziza mwi'beho liwaha, hanyuma nowatyatilila no mumaje wangu.

¹³ “Nanye baho ho mololiwonela nhondo likuwo lyangu hamonga no wukali wangu, sunga lono nolowa nayimala nhunduji yangu nene no mweneco. Na kolo zizi zejela, baho nanye nhondo, ho molomanyila vyono ane no Muwaha Mulungu yo nene mono nonjile zizo kuli 'nye, vyono ngholigwe likuwo muno so wula wihuwilwa wenyu.

¹⁴ No munhu wo wose wa mu nghungugo zose wono wamupilimenyi, mono kowa kukola baho, kolowa musecenyi.

¹⁵ “Na Kolo nasimba no kukolwa likuwo no kumulipicizenyi, i makungugo gose gono gamupilimenyi, golokwibatwa no woga wuwaha muno. Wolomulanjenyi nha muli wanhu we 'wifyo, kanyhi wolomulijenyi.

¹⁶ Nane noloyicepula ndigwa yenyu yiwe nyhefu, nzala yimwaganenyi. Nanye molotamiswa muno ne nzala, molowa nha mukugumwa ne zisonga zinghali muno, zono zikumongomezenyi.

¹⁷ Nane nolomugumililenyi nzala mbaha, hamonga ne malimu ga mu mbago gawawulaje wana wenyu. Kanyhi nolomugumililenyi matamwa, ne mafwa, hamonga no wulugu wumuwulajenyi muno. Nene no Muwaha Mulungu nalonga.”