Ezekiyeli 4 - Luganuzi Luswanu Kuli Wanhu Wose 2002

Ezekiyeli yakunoza cihwanicizo co wupilimwe wa Yelusalemi

¹ U Muwaha Mulungu yakatya, “Gwe go munhu, wusole litofali wuliwice ha mwande yako, hanyuma wulikwale cihwani ce likaya lya Yelusalemi mucanyha yalyo.

² Hanyuma wulinozeze cihwani co wupilimwe walyo, wuwicile ne makweme galipilime, wuliwicile ne majinji ne zinghambi ze wasilikale, wuliwicile ne matinde go kulimwagulila likaya, mbavu zose.

³ Hanyuma kanyhi, wusole siniya ya cuma, wuyisimye yiwe nhe 'jinji lya cuma haciligati yako ne likaya. Nagwe wulidome likaya. Nalyo likaya lyowa nha lyakondya kupilimwa no wulugu, nagwe kowa yo gwegwe mono walipilima no kulihoma. Na cici cowa co citanjilo kuli nghungugo ya Isilayeli.

⁴ “Hanyuma wuwe kugona hasi, wugoneye muwoko wako wo kucekulu, nane nokudinghuza uwubi wose we nghungugo ya Isilayeli. Nagwe kowa wuli baho du wuli mu wusungu ku soko yo wubi wawo, sunga vipulute vilo magana madatu na makumi 'cenda.

⁵ Hambi nha nakondya kukutemezezya'gwe lizuwa limonga limonga liwe nha wo mwaka monga monga, sunga lono wulipicizwe wawo wulamalicila.

⁶ Nagwe kolo wazikondya zizo, wipitucizaje kanyhi, wugonele ku lubavu lo kulume vilo makumi mane, so wubi wa Yuda. Nayo yowa nhavivilya du, lizuwa limonga limonga, lyowa nha wo mwaka monga monga wo wulipicizwe wawo.

⁷ “Nagwe kogadomya meso gako gawe gawulanjile wupilimwe we likaya lya Yelusalemi. Hanyuma wuliyunzize likaya muwoko wako, wuwe kuliwilila.

⁸ Nane nokuwopa no lubano, ho wulece kusuma kupituka-pituka wulanje ako na ako, sunga wuvifisilize vilo vye milewo yako.

⁹ “Alu, wusole ngano ndodo, ne shayili, ne zinandala, ne zifwili, no wuhemba, hamonga no muhoni. Vivyo vyose, wuvihanze mu ciya cimonga, winozeze mukate. Na yiyo yowa yo ndigwa yako mu vilo vivyo vyose vye magana madatu na makumi'cenda, lono kowa wukali wugoneye ku lubavu lwako lo kucekulu.

¹⁰ Nagwe yowa yikunojeye wulye cipimo ca wuzito wa gulamu magana mejete na makumi madatu du, zo mukate wuwo mwi'zuwa limonga. Nawo wuzito wuwo wa gulamu zizo, wokukwila, nagwe kowa wigute sunga i mitondo yaco.

¹¹ Kanyhi yowa yikunojeye wuwe kung'wa malenga macefu macefu du, nha cinji, weze kung'wa vikombe vyejete du mwi'zuwa limonga.

¹² Kanyhi yikunojeye wusole mavi go munhu gono makavu, wupembele moto wono kowukasicila mukate wuwo. Hanyuma wuwe kuwulila ha meso ge wanhu wose.”

¹³ U Muwaha Mulungu yakatya, “Ne nghani yiyo yo yikulajila vyono Waisilayeli wowa kulya zindigwa zono nyavufywe, kolo neza kuweyagaziza mu zi'si zi njenzi.”

¹⁴ Ninga nane nghamutya, “Gwe go Muwaha Mulungu, ng'o, ye! Hambi 'ne ku wulawa katali nha nghali sineyavufya hamba hadodo. Kanyhi ku wulawa wudodo wangu sunga nalu, nghali sinalya yaye, nyama ya nimu yo yose yono yifwiliye, hamba yono yiwulagwe ne malimu ga mu mbago. Hamba nghali sinalya ndigwa yo yose yono nyavufywe.”

¹⁵ Nayo Mulungu yakamhitula yakatya, “Ale, viswanu, na hono yili nhavivyo, hodu, nokuleka witumamile matope ge ng'ombe si 'nhe mavi go munhu, wunyanyile mukate wako wuwo.”

¹⁶ Kanyhi yakatya, “Gwe go munhu, ane nolicepula ligawo lye zindigwa lya mu Yelusalemi. Ne wanhu wono wali mumo, wologazika muno no kwihwelela, vyono lulo, ndigwa yono wolowa kulya, hamonga ne malenga gono wolowa kung'wa, vyose vyolowa kwamula kupimwa mu cijelo, hanyuma ho wawa kuvitumamila.

¹⁷ Na mu mapango gago, i wanhu wa Isilayeli wolowa na wanjile wuwaha muno wa ndigwa, hamonga ne malenga. Na ku soko yiyo, wologanda muno ku soko yo wubi wawo.”