Ezekiyeli 3 - Luganuzi Luswanu Kuli Wanhu Wose 2002

¹ Mulungu yakatya, “Gwe go munhu, ale wulye citabu cici, hanyuma ho wubite wukalongane ne wanhu wa Isilayeli.”

² Hobaho nghahama mulomo wangu, nayo yakawa kundisa i citabu cico.

³ Hanyuma kanyhi yakatya, “Gwe go munhu, wulye citabu cico cono nghukupela, wucimemye mu mulomo wako.” Nane nghawa kucilya, naco cikawa cili muzinzi muno mu mulomo wangu nha wuci.

⁴ Hanyuma kanyhi Mulungu yakanonjela yakatya, “Gwe go munhu, wubite kuli wanhu wa Isilayeli wukawalonjele zose zono nghulonjeye.

⁵ Nane hamba si nghukutuma kuli wanhu wono wakulonga milonjele mijenzi ng'o, langa nghukutuma kuli Waisilayeli.

⁶ Na hono nali nghutume, kuli makungugo gono gena milonjele mikamu, yono nagwe si wuyimanyile yaye awo langa wali wakuhulice zono wukuwalonjela.

⁷ Ninga muli wanhu wa Isilayeli, howa hasina hamba yumonga mono kokuhulika yaye. Kanyhi hamba na nene siwosuma kuhulika yaye. Hambi wose nha wasina cihuliko, kanyhi wali cibede.

⁸ Ninga nane nokunoza nagwe wuwe wusina cihuliko kuli wene, kanyhi wuwe wuli nghakamo nha vyono wene wenha.

⁹ Kanyhi nokunoza wuwe wusikame nhe 'bwe, kanyhi wuwe wukangaye nhe alimasi. Holeka wulece kuwogopa wawo i wanhu wabedegazi.”

¹⁰ Mulungu yakajendelela kunonjela kanyhi yakatya, “Gwe go munhu, zinghani zangu zose zono nghulonjeye wuzikumbucilaje, kanyhi wuzibate mu nhumbula yako.

¹¹ Hanyuma wuwabitile wayago wono wahamywa, wuwalonjele zono nghuwalonjela ane no Muwaha Mulungu. Nawo hono wakuhulice hamba walece kukuhulika, ayo yowe yo nghani yawo.”

¹² Hobaho u muhe wo Mulungu wukanyinula, nane nghahulika kunyuma yangu, wukolome wa yizi yiwaha likulonga likutya. “Nhojo yo Muwaha Mulungu, yilumbizwe ku wulanga kucanyha!”

¹³ Hanyuma, nghahulika cihumbi ciwaha ce mabawa ge viwumbwa vyumi, lono vyepumunhaga mu mwanya, hamonga ne lizozo lye maguludumu. Lizozo lilyo, likawa nhe lizozo lye litulo.

¹⁴ No muhe wo Muwaha Mulungu, wukanyiziza kwe vilungo viwaha wukanyasula. Na lono muhe wakwe wanyasulila kwe vilungo, nghahulika wusungu muno sunga nghakolwa ne likuwo.

¹⁵ Hodu nghawa kubita ku Teli-abibu, ha nhumbi ye likolongo lya Kebali, hono wekalaga i wahamywa, nghekala baho vilo mupunghati, akuno memile no wizine wa kuli zono naziwona no kuzihulika.

Muwaha Mulungu yakumuwika Ezekiyeli yawe mulindilizi

¹⁶ Vyali vyeza kupuluta vilo mupunghati, u Muwaha Mulungu yakalonga nane kanyhi yakatya,

¹⁷ “Gwe go munhu, ane nghukuwika wuwe mulindilizi we nghungugo ya Isilayeli. Nagwe wubite wukawalonjele ze suguzi zangu zose zono nghulonjeye.

¹⁸ Nane lono nghumulonjela u munhu mubi vyono kofwa so wubi wakwe, nagwe hono wulece kumusugula yayipitule mijendele yakwe ho yeponye, ale, u munhu yuyo mbeka kofwa so wubi wakwe. Ninga nane nokuwala gwegwe vyono nagwe wuli musutyi, yo gwegwe mono wumwambuze yafwe.

¹⁹ “Ninga hono wumusugule munhu mubi nayo ho yalece kuwunena wubi wakwe, ale, munhu yuyo, kofwila mu wubi wakwe, nagwe kokwiponya wumi wako, kowa wusina wuhoswe yaye.

²⁰ “Na hono munu we ling'ani yetume zo wubi, nane hono mbice cikobazo hali mwene nagwe hono wuwe si wumusugye yaye, ale munhu yuyo kofwa. Kofwa kusoko yo wubi wakwe. Nane hamba si nozikumbucila yaye ne ziswanu zono yazituma. Ninga nane nokuwala 'gwe, vyono wuli musutyi, hambi nha yo gwegwe mono wumwambuze yafwe.

²¹ Na hono wumusugule munhu muswanu vyono yalece kwituma zo wubi, nayo yakuhulice, no kuleka kwituma zo wubi, ale, yuyo kowumipa, nagwe kokwiponya wumi wako, hamba kowa wusina wuhoswe yaye.”

Ezekiyeli yakuwa yali cibwibwi

²² Vilungo vyo Muwaha Mulungu vikanyiziza, nghahulika yakunonjela yakutya, “Ale, Ezekiyeli, winuce wubite kwi'lolo, nane nokulonjela kuko zono nghusaka nghulonjele.”

²³ Ale, nane nghawa kubita kuko kwi'lolo. Na kuko nghaluwona lukumyo lo Muwaha Mulungu, nha vyono naluwona halulongozi ha nyenje ye likolongo lya Kebali. Nane nghawa kugwa hasi wugubama,

²⁴ Ninga u muhe wo Mulungu wukanyiziza wukanyinula no kunyimya wima. Nayo Muwaha Mulungu yakanyitya, “Gwe Ezekiyeli, alu wuwuye ku kaya yako, wubite wukedindile mu nyumba.

²⁵ Nagwe go munhu, wokuwopa ne milejehe, nagwe hamba si kosuma kanyhi kulawila kunze kuli wanhu.

²⁶ Nane nolunamatiza lulimi lwako mu malaka gako ho wuwe cibwibwi, ho wulece kusuma kuwasugula i wanhu wawa i wabedegazi.

²⁷ Na hanyuma kolo nghulonga nagwe, no kuludohola lulimi lwako kanyhi, ho wusume kulonga, ale baho nhondo ho kowalonjela zono ane no Muwaha Mulungu nghuwalonjela. Na lulo wanji wa muli wene wohulika, ninga wanji wozibedegala zinghani zako, hambi nha wanhu we nghungugo yono yisina cihuliko yaye.”