Ezekiyeli 2 - Luganuzi Luswanu Kuli Wanhu Wose 2002

¹ “Gwe go munhu, ta winuce, hambi 'ne nha nghusaka kulongana nagwe.”

² Na lono lizi lyali likali likulongana nane, hobaho muhe wo Mulungu yakenjila muli'ne, yakanyimya wima. Hanyuma kanyhi nghahulika lizi lijendeleye likutya,

³ “Gwe go munhu, ane nghukutuma kuli wanhu wa Isilayeli. Hambi nha wambedegala no kundeka, kanyhi vyo wakali wakumbedegala du, nha vyono wali wambedegaye i walezi wawo.

⁴ Wasina cihuliko, hamba si wanyogopile 'ne yaye. Holeka nane nghukutuma wubite wukawamanyize vyono ane no Muwaha Mulungu nghuwalonjela.

⁵ Hono wakuhulice hamba ng'o, ninga wowa wakondya kumanya vyono muwizi kawaziza.

⁶ “Ninga agwe go munhu, wulecele lukulu kuwogopa hamba kuzogopa zinghani zawo. Ninga wumanye nha vyono hamba mabijili ne mamivya gakuhome nagwe kowa nha mono wikaye hono ho zili zi'nje. Ninga 'gwe weze wukamile, wulecele lukulu kuwogopa i wabedegazi wawo, hamba kuzogopa nghani zawo.

⁷ Nagwe kowalonjela zose zono nokulonjela, hono wakuhulice hamba wabeze, ninga agwe wuwalonjele du. Hambi wene nha wali cibede muno.

⁸ “Ninga agwe go munhu, wuhulice ta zono nghukulonjela. Nagwe wulanjilile, wulece kuwa wuli mubezi nhe wanhu wawo. Ale, wahame mulomo wako, wulye cono nokupela.”

⁹ Hobaho nghawona muwoko wugoleywe, na langa ta, wibate citabu cipalinje.

¹⁰ U muwoko wuwo, wukawa kucitandakula citabu cico cipalinje, nane nghawona cali cina mandiko mbavu zose. I cililo co wusungu cali candicigwe mumo hamonga no wugule!