Ezekiyeli 1 - Luganuzi Luswanu Kuli Wanhu Wose 2002

Wugubulilwe wulongozi kuli Ezekiyeli, kulawa kuli Mulungu

Ligoda lyo Mulungu lyo wutemi

¹ Ane mukohani Ezekiyeli mono nili mwana wa Buzi, nekalaga hamonga ne Wayahudi i wahamywa, he kolongo lya Kebali, mu yisi ya Babiloni. Ale, mwi'zuwa lye 'hano lya mu mwezi we kane, wa mu mwaka we makumi madatu, wulanga wukagubuka, nghagubulilwa no Mulungu.

² (No mwaka wuwo, wali wo mwaka we 'hano ku wulawa lono mutemi Yehoyakimu yategulilwa ku wuhamywe.)

³ Na lono nali nili ha nyenje ye likolongo lya Kebali, kuko ku Babiloni, nghahulika u Muwaha Mulungu yakulonga nane, ne vilungo vyakwe vikanyiziza.

⁴ Langa ta, nghawona libeho lyo mukukunzo likuza likulawilila ku lubavu lwe sumuka. No wubulile wo moto, wabulilaga mwi'vunde yiwaha, sunga no wulanga wose wukawa wudunghu mbavu zose. No wubulile wuwo wono wabulilaga, wukawa wukung'alala kotya nha shaba.

⁵ Na mugati ye libeho lilyo, yikaza hwani ye viwumbwa vyumi vine, vina futa yo munhu.

⁶ Na vyose vyono vine, vyali vina wusu wuli hane ne mabawa mane mane.

⁷ Ne magulu gavyo gali gagolocile, ne zinzayo ze magulu gavyo, zali nhe zinzayo ze magulu ge zing'ombe. Nazo zang'alalaga nha shaba nghusulwe muno.

⁸ Hamonga na zizo, kanyhi vyose vyono vine, vyali vina miwoko mine mine hasi ye mabawa gavyo, mabawa gose vyono mane.

⁹ Navyo viwumbwa vyose, vyali vigatandakuye mabawa gavyo, vigapamize cimonga ne ciyagwe. Na lono vyajendaga, vikawa vikujendana hamonga du akuno viyipamize ne mabawa gavyo, kanyhi hamba si vyapitukaga yaye lono vyajendaga.

¹⁰ Navyo viwumbwa vivyo vyose vyono vine, vyali vina wusu wuli hane, wono wisimajiye-simajiye. Ku mwande yayo vyali vina hwani ya wusu wa munhu, no lubavu lo kulume, vyali vina hwani yo wusu wa simba, no lubavu lo kucekulu, hwani yo wusu wa ng'ombe, na ku migongo yavyo, vyali vina hwani yo wusu wa 'ndi.

¹¹ Ne mabawa gavyo, gali matandakule gepamize, ciwumbwa ne libawa lye ciyagwe cono vihegame naco. Agalya i mabawa ganji mejete mejete, vyali vigubucize miwili yavyo.

¹² Navyo vyose vyali vilanjile mbavu zose vyono yine. Na ku soko yiyo, vyasumaga kubita ku lubavu lo lose kono u muhe wahilaga vibite, navyo ko vyabitaga, hamba kuwa na soko yo kupituka yaye.

¹³ Na muli viwumbwa vivyo vyumi, mwali mocili cinhu cinji cono cejelaga cihwanile mamuli, cono camulikaga ako na ako. No moto nawo wakaga no kulavya mamuli.

¹⁴ Navyo i viwumbwa vyumi, vyamanghaga ako na ako no kuwuya kotya limuli.

¹⁵ Nane lono nali nghali nivilanjile vilimu vivyo vyumi, nghawona maguludumu mane gapamize hasi mu muhangha, ha mhelo ye viwumbwa vivyo cimonga cimonga, nha cinji ciwumbwa ne guludumu lyaco.

¹⁶ Ne maguludumu gose, gali gehwanile, gang'alalaga nhe libwe lyo wuguzi wukamu muno. Nago maguludumu gose vyono mane, gali gena hwani monga, no wijele wo wunoze wago wali wihwanile, liguludumu mugati ye liguludumu liyagwe,

¹⁷ Maguludumu ho gasume kubiduka no kubita ko kose mu malanga gose vyono mane.

¹⁸ Ne migo ye maguludumu gago, yali yimemile meso gose.

¹⁹ Ne mapango go gose lono viwumbwa vivyo vyumi vyatulukaga, maguludumu gago nago, vyatulukanaga hamonga ne viwumbwa vivyo. Na lono viwumbwa vivyo vyumi vyagulukaga, ne maguludumu nago gagulukaga nhavivyo.

²⁰ Na lono i viwumbwa vivyo vyumi vyabitaga hanhu ho hose hono vyasakaga kubita, ne maguludumu nago gakanoza nhavivyo du, hambi i viwumbwa vivyo vyumi, nha vyo vyagalongozaga i maguludumu gago.

²¹ Holeka ku soko yiyo, i maguludumu ganozaga nha vyono viwumbwa vyanozaga, hono viwumbwa vivyo vyumi vituluce, nago maguludumu gatulukaga, na hono viwumbwa vime, nago maguludumu gemaga, na hono viwumbwa viguluce mucanyha, nago maguludumu gagulukaga nhavivyo.

²² Na mucanyha ye mitwe ye viwumbwa vivyo vyumi, mwali na hwani ya mwanya, yihwanile liwala lye libwe lyono linha lilole lyo kogofya.

²³ Na hasi yo mwanya, vikawa kwima viwumbwa vivyo vyumi, akuno vigoloye ne mabawa gavyo mejete mejete gepamize cimonga ne 'bawa lye ciyagwe, akuno vigubice miwili yavyo, ne mabawa ganji ga galya i mejete mejete gono gasigaye.

²⁴ Hanyuma nghahulika cihumbi ce mabawa gavyo lono vyagulukaga, cikawa cihwanile ne lizi lye lilenga, cihwanile nhe cihumbi ce wasilikale wenji wo wulugu, cihwanile ne lizi lyo Mulungu u Mudaha Vyose. Navyo vyali vyeza kutima hasi, vikagatenya mabawa gavyo,

²⁵ ninga hamba nhavivyo lizi likajendelela kuhulikwa mu wulawa mu mwanya wono wali ha mitwe yavyo.

²⁶ Na mucanyha yo mwanya wa mu mitwe yavyo, hali na cinhu cono cejelaga nhe 'goda lya nhojo, yinozwe ne vibwe vyo wuguzi wukamu vye liwala lye dedede. Na mwi'goda lilyo lye nhojo, cali cikaye cinji cihwanile futa ya munhu.

²⁷ Nghawona yiyo futa yo munhu yikung'alala kotya shaba, mugati yo moto. Yikawa kung'alala muno hanhu hose, no

²⁸ wung'alale we mawala gose gono yali yina, wali wihwanile ne mawala ge licilalyambwa. Na wuwu wali wo wijele we nhojo wono walajilaga nha vyono Muwaha Mulungu yali baho. Nane nali neza kuziwona zizi, nghagwa wugubama. Hanyuma nghahulika lizi lyo Muwaha Mulungu likunonjela likutya,