Esita 9 - Luganuzi Luswanu Kuli Wanhu Wose 2002

Wayahudi wakuwongomeza walugu wawo

¹ Likafika lizuwa lye kumi ne 'datu lya mu mwezi wa Adali, lizuwa lyono lyali lisiwanuywe ne walugu we Wayahudi, so wufisiliza lilajilizo lyo mutemi. Lizuwa lyono iwalugu, wali wetumbiye vyono wowasumiza Wayahudi. Ninga Wayahudi wakakawaniza mahweso ge walugu wawo no kuwasuma.

² Vipuga vyose vye Wayahudi, mu matumbi gose ga mu wutemi wuwu, wakewikaniza kwihoma no munhu wo wose mono yejelela kuwahungucila no kuwatamisa. Sunga wanhu wose wa mu matumbi gose, wakawa wakuwogopa Wayahudi, hakawa hasina hamba monga mono yejelela kuwahoma.

³ Na mbeka wawaha wa mu matumbi gose, hamonga ne walongola wawaha wa mu wutemi, wose wakema ku lubavu lwe Wayahudi no kuwataziliza. Hambi wose nha wamogopa Moledekayi.

⁴ Yikawa yamanyika na wose vyono Moledekayi yo yawa ne vilungo viwaha mwi'kulu, na vyono yajendelelaga kanyhi kutuga vilungo.

⁵ Na ku soko yiyo, Wayahudi wakanoza vyono wasakaga kuwatendela walugu wawo. Wakawahomanga ne migoha no kuwatemanga ne mimaje no kuwawulaga.

⁶ Mwikaya liwaha lya Susa, Wayahudi wakawawulaga wanhu magana mahano.

⁷ Hamonga na wawo, wakawa wali mumo ne wana yikumi wa Hamani u mulelwe na Hamedata, umulugu muwaha we Wayahudi, nha cinji, na Paleshadata, na Palifoni na Asipata,

⁸ na Polata na Adalia na Alidata na

⁹ Palemashita na Alisayi na Alidayi na Vayisata.

¹⁰ Hamba nhavivyo kwali kusina cinhu co cose cono waciteka.

¹¹ Mwizuwa lilyo, wakamulonjela mutemi liwalo lye wanhu wono wawulagwa ha Susa.

¹² Hobaho umutemi yakamulonjela Esita u mugolece wa mwi'kulu yakamutya, “Alu hono mu Susa du muli wene, Wayahudi wawulaga wanhu magana mahano, hamonga ne wana yikumi wa Hamani. Alu wukwihwesa mu matumbi ganji ma, wowa watenda wule! Hamba alu wukusaka cici kanyhi nane nghupele? Wunonjele co cose cono kosaka nane nokupela.”

¹³ Nayo Esita yakatya, “Go mutemi! Hono yiwe yikukwendeza mu wuwaha wako. Walekaje kanyhi Wayahudi mitondo, wetume mwi'kaya lya Susa, nha vyono wuwakomboye wetume zuwali. Kanyhi wulavye wulajilize vyono, i miwili yikumi ye wana wa Hamani, yitumbikwe mu mabici go kunyonjela.”

¹⁴ Nayo mutemi yakalajiliza zizi zose zitumwe, ne lilajilizo lili likamanyizwa mwi'kaya lya Susa. Ne miwili ye wana yikumi wa Hamani, yikatumbikwa calinze mu mabici go kunyonjela.

¹⁵ Lyaza kufika lizuwa lye likumi na yine lyo mwezi wa Adali, Wayahudi wa mwi'kaya lya Susa, wakekonghola kanyhi hamonga, wakawawulaga wanhu wanji wono wali waficile liwalo lyawo, wanhu magana madatu. Hamba nhavivyo siwasola vinhu mateka.

¹⁶ Wayahudi wono wekalaga mu matumbi ganji go wutemi, nawo wakewikaniza viswanu, no kwicita kuli walugu wawo. Wakehoma ne walugu wawo, wakawawulaga wanhu elufu makumi mupunghati na yihano, wanhu wono wali wawasulile. Hamba nhavivyo siwasola vinhu mateka.

¹⁷ Zizi zikejela mwizuwa lye kumi lya mu mwezi wa Adali. Ne mitondo yaco, mwizuwa, lye likumi na yine, hakawa hasina kanyhi wuwulaji, wakalinoza likawa yizuwa lya sikukuu du na nyemo.

¹⁸ Wayahudi wa ku Susa nawo, wakayinoza sikukuu yiyi mwizuwa lye kumi ne 'hano, vyono wali wakondya kuwongomeza i walugu wawo mwizuwa lye kumi ne 'datu, na lye kumi na yine. Ninga mwizuwa lye kumi ne 'hano, si wajendelela yaye.

¹⁹ Holeka, Wayahudi wose wono wekaye mu vitumbi vidodododo sunga lulu, wakuwa kulikumbucila lizuwa lilyo lye kumi na yine, lyo mwezi wa Adali. Vyono lyo lizuwa lyo wucehe na lye nyemo muno. Kanyhi lyo lizuwa lyo kunoza sikukuu, no kwihumbiliza kwe vipegwa munhu na muyagwe.

Sikukuu ya Pulimu (Nha cinji, yono yatowelwa kula)

²⁰ Nayo Moledekayi yakawa yakondya kuwa ne zinghani zizi zose nyandice, holeka, yakawategulila Wayahudi wose, we matumbi ge behi no kutali mu wutemi wa Pelisiya.

²¹ Kuwalonjela wagebate mazuwa gago, lizuwa lye kumi na yine ne kumi ne 'hano ga mu mwezi wa Adali, gawe mazuwa go wucehe mwaka kwa mwaka.

²² Vilo vivyo vyo vyawakumbucizaga i Wayahudi, lono wekombozeza kuli walugu wawo. Mwezi wuwu wo mwezi wono wakawaniza wukalale wawo, hamonga ne cililo cawo, gakawa mazuwa ga nyemo no luseko. Wakalonjelwa, wawe kugalanjilila mazuwa gaga, ho wawe kunoza zi sikukuu, no kwihumbiliza vipegwa na ndigwa munhu na muyagwe, no kuwakumbucila waciwa.

²³ Hobaho Wayahudi wakatyatya malajilizo ga Moledekayi, ne zi sikukuu zikawa kujendelela kunozwa mwaka kwa mwaka.

²⁴ Hamani u mwana wa Hamedata wo lulelo lwa Agagi, mulugu muwaha we Wayahudi, yali yatowa Puli, (nha cinji “Kula” nha vyono wayitezaga) no kuwika lizuwa lyo kuwongomeza Wayahudi. Yali yalamula kuwafwagulila lukulu.

²⁵ Ninga Esita yakamubitila mutemi, nayo mutemi yakalavya lilajilizo lyono lyamunoza Hamani yagazwe sunga yakafwa, u wufwe wono yali yawehweseze Wayahudi. Mwene hamonga ne wanagwe, wakatumbikwa, wakafwila mu mabici.

²⁶ Na yiyi yo soko yono yikuleka zi sikukuu zikucemwa Pulimu mu wulawa mu nghani yiyi Puli nha cinji kutowa kula. Ku soko ye baluwa ya Moledekayi, na ku soko ya zono waziwona weneco, na ku soko ya zose zono zawejelela.

²⁷ Nawo Wayahudi wakayinoza liwe yilajilizo kuli wene, hamonga ne wana wawo, sunga na kuli munhu wo wose mono kokwiyitya mwene Muyahudi, vyono mwipango lili, mu mwaka na mwaka, yinojeye wayinoze sikukuu yiyi, mu vilo vivi vyejete nha vyono wulajilize wa Moledekayi winha.

²⁸ Ne vilo vivyo vye Pulimu vinojeye vikumbucilwe, ne sikukuu yiyo yiwe kunozwa muli mhuga zose ze Wayahudi wose, wono wekaye mu zisi zose na mu makaya gose, mu zindelo zawo zose mu vilo vyose vyono vikuza.

²⁹ Hanyuma Esita u mugolece wa mwi'kulu, mwana wa Abihayili, hamonga na Moledekayi u Muyahudi, yakayandika baluwa, yono yali yina no wulajilize wakwe wose wa kuli ze sikukuu ya Pulimu, nha vyono yali yakondya Moledekayi kwandika.

³⁰ Ne baluwa yiyo, yikawa nyandicilwe Wayahudi wose. Ne nakala yayo, yikategulwa ku zisi zose vyono yigana limonga na makumi mejete na mupunghati, ze Pelisiya. Ne zibaluwa zizo, zali zina zinghani zo mulamu na zo wudimwe.

³¹ Nazo zikawa zikuwalajiliza, ho webate no kuyinoza sikukuu yiyo ye vilo vye Pulimu, wene hamonga ne zindelo zawo, nha vyono wali wakondya kuwusolela moto wuwo, so wibata i vilo vyo wuleka kulya, hamonga ne vipango vye cililo. Na zizi zose zikalajilizwa na Moledekayi Muyahudi, hamonga na Esita u mugolece wo mutemi.

³² Ne lilajilizo lya Esita lyo kukangaza ze sikukuu yiyo ya Pulimu, likandikwa mu citabu.