Esita 7 - Luganuzi Luswanu Kuli Wanhu Wose 2002

¹ Umutemi na Hamani, wakabita ku sikukuu ya kwa Esita,

² yono yali yanozwa nghanghulo ye kejete. Na lono wajendelelaga kung'wa divayi, mutemi Ahasuwelo yakamuwuza kanyhi Esita yakatya, “Gwe Esita go mugolece wa mwi'kulu, wukusaka nghutendele wule? Nonjelaje du, nagwe kosuma kucituga cinhu cico. Nane ndahile kukupela hamba yiwe nusu yo wutemi.”

³ Mugolece wa mwi'kulu Esita, yakapitula yakatya, “Gwe go mutemi, hono wuwe wendezwe mu wutemi wako, wubocele wulombe wangu. Wulombe wangu kuli'gwe, wowu, nghukulomba njendelele kuwa mumi ndece kufwa, ne wandugu zangu nawo, walece kufwa.

⁴ Hambi i wanhu wangu hamonga na nene, nha caguzwa ho ciwulagwe. Yali yiwe si nghani hono cali ciguzwe mu wuwanda, aho langa, nali nyamale du, si nali nghugaze so yiyo. Sunga nalu cili behi muno kuwulagwa no kongomezwa.”

⁵ Mutemi Ahasuwelo yakamuwuza mugolece wa mwi'kulu Esita, yakamutya, “Nani mono kosuma kunoza nhavivyo? Munhu yuyo yali hayi?”

⁶ Esita yakapitula yakatya, “U mulugu wetu, na mono yakucitamisa, yo yuyu Hamani, u munhu mubi muno muno!” Baho Hamani yakawa kumunugulila umutemi, hamonga no mugolece wa mwi'kulu Esita ko woga wuwaha muno.

⁷ Mutemi yakenuka akuno yakoligwe ne likuwo, yakalawila kunze mu busitani ye likaya. Hamani yakamanya vyono alu mutemi yakulondola no kwihwesa nzila yo kumulipiciziza so nghani yiyi. Hobaho Hamani nayo kono nyuma, yakawa kubita ha mwande ya Esita umugolece wa mwi'kulu, yakawa kumulomba Esita yamunenele ho yalece kuwulagwa.

⁸ Lulo Hamani yakegwisa ha magulu ga Esita yakulomba wunenelwe. Nayo mutemi yali yeza kuwuya mu nyumba, ku wulawa ku busitani, no kumuwona Hamani yagwiye, ha magulu ga Esita, yakazoza muno ko wukalale yakatya, “Wa! Alu Hamani yakumwibata kwa vilungo mugolece wangu ha meso gangu, ho vigone nayo mwi'kaya lyangu?” Mutemi lono yali yali mu wulonga zizi, wetumami i wapaswe, wo mutemi wakaza wakawugubiciza mutwe wa Hamani.

⁹ Hobaho mwitumami yumonga wa muli wawo wetumami wo mutemi, mono yacemwaga Halebona, yakatya, “Mbeka Hamani yali yakondya kuhimbila sunga ne mabici ku kaya yakwe, go kumutumbicila Moledekayi, mono yakuponya agwe go mutemi wumi wako. Ne mabici gago, gena wutali wa mita makumi mejete na nyejete!” Mutemi yakalajiliza yakatya, “Ale, mutumbicenyi Hamani mu mabici gago.”

¹⁰ Hobaho, Hamani yakawa kutumbikwa mu mabici gago gono yali yamunozeza Moledekayi. Lulo, ne likuwo lyo mutemi nhondo, ho likawa kupola.