Esita 6 - Luganuzi Luswanu Kuli Wanhu Wose 2002

Umutemi yakumuhumbiliza Moledekayi

¹ Mu cilo cicilya, mutemi hamba si yagona nhongo yaye, hobaho yakalajiliza wawaha wose wa mu yisi yakwe, hamonga ne vitung'ati wose wa mu wutemi wakwe, wamuletele citabu ce mandiko ge zinghani zamu yisi yakwe, ho mitondo yaco wayisome ha mwande yakwe.

² Mu wusome we zinghani zizi, zikapamiza za Moledekayi, mono yamusugula mutemi, ho yalece kuwulagwa ne wetumami walya i wejete, Bigula na Teleshi, i wetumami wapaswe, wono wali wali mu wilecele wo wulanjilizi we likaya lyo mutemi.

³ U mutemi yakawawuza yakatya, “Alu mu nghani yiyi camuhumbiliza cinhuci Moledekayi.” Nawo wetumami wakwe wakatya, “Hasina hamba cinji cono yahumbilizwa yaye.”

⁴ Mutemi yakawawuza kanyhi yakatya, “Koyuli yunji kanyhi mu wetumami wangu mwi'kaya?” Baho Hamani nayo yakawa kwinjila mu, luwa ya kunze lyo mutemi, yali yaza, ho yamulombe mutemi yamukombolele Moledekayi yakatumbikwe, hambi mabici nha gali gakondya kuhimbilwa.

⁵ Wetumami wakamutya Mutemi, “Hamani yali baha yalindiye ho yakuwone.” Mutemi yakawatya, “Mumulonjele yahelele.”

⁶ Hamani yakawa kwinjila. Nayo mutemi yakamutya Hamani, “Hoyali munhu yunji mono nghusaka kumuhumbiliza muno muno, alu noze wule kuli munhu yuyu?” Hamani yakehwesa mu nhumbula yakwe yakatya, “Alu nani mono mutemi yadahile kumuhumbiliza muno muno, hono si nene du?”

⁷ Holeka yakamupitula mutemi yakamutya,

⁸ “Mutemi, wulajilize mwenda muswanu we citemi temi, wuletwe so munhu yuyu, hamonga ne vivwalo vyono kuvwalaga gwegwe. Lajize no wihambo we citemi temi wuwuwicile mu Fwalasi yako.

⁹ Hanyuma wumusole munhu we lilumbo wa muli wetumami wako wawaha, yamuvwice munhu yuyo vivwalo vivyo, hanyuma yamupandize mu Fwalasi, yamupilimye mwi'kaya lili, akuno yakujenda yakulalika yakutya, ‘Ale, mulanje vyono mutemi yakumuhumbiliza mono yakusaka kumuhumbiliza, u munhu mono yakwendezwa nayo!’ ”

¹⁰ Lulo lulo mutemi yakamutya Hamani, “Ale mbela, wusole vivwalo vyo wutemi, hamonga ne Fwalasi, wukamupele Moledekayi u Muyahudi lilumbo lilyo. Wumunozeze zose zono wulonjile, yilece kucepuka hamba nghani monga. Komwagana mwene yali ahalya ha mulango we likaya.”

¹¹ Hamani yakasola vivwalo hamonga ne Fwalasi yakamuvwika Moledekayi. Nayo Moledekayi yakekala mu Fwalasi. Nayo Hamani yakawa kumupilimya Moledekayi mwi'kaya akuno yakulalika yakutya, “Ale, mulanje vyono mutemi yakumuhumbiliza munhu mono yakusaka kumuhumbiliza, munhu mono yakwendezwa nayo!”

¹² Moledekayi yakawuya kanyhi ha mulango we likaya. Ninga mwene Hamani yakawa kutuluka yakumangha yakubita ku kaya yakwe, akuno yawugubicize wusu wakwe ko wukalale wuwaha.

¹³ Yakawalonjela weyendi wayagwe hamonga na Zeleshi u mugolece wakwe, zose zono zimwijeleye. Lulo Zeleshi mugolece wakwe, hamonga ne weyendi wayagwe, wakamulonjela wakatya, “Yuyu Moledekayi mono wakondya kulemwa kuli mwene, hono yawe Muyahudi, agwe si komusumila lukulu, langa mwene yo kokusuma.”

Hamani yakuwulagwa

¹⁴ Nawo lono wali wakali wajendeleye kulonga zizi, wetumami wapaswe wa mu nyumba yo wutemi, wakaza mbelambela kumusola Hamani, yabite ku sikukuu ya kwa Esita.