Esita 5 - Luganuzi Luswanu Kuli Wanhu Wose 2002

Esita yakuwanozeza sikukuu Hamani no Mutemi

¹ Mwi'zuwa lilongozi lya Esita lyo wuleka kulya, yakavwala mwenda wakwe mutali we citemi-temi, yakawa kwinjila mu nyumba yo mutemi, yakema yalanjile ku nyumba ye ligoda lyo wutemi he'lango lye likaya.

² Nayo mutemi yali yeza kumuwona Esita yemile hanze ye lilango, yakendezwa muno. Hobaho yakawa kuyisola nghome yakwe ye zahabu, yakawa kumusonha Esita. Nayo Esita yakapamiza cisonje ce nghome yiyo.

³ Mutemi yakamutya Esita, “Esita nhawule? Nonjelaje cono wukusaka, nane nokupela, hamba yiwe nusu yo wutemi wangu, ane nokupela du.”

⁴ Esita yakamutya mutemi, “Hono wuwe wukwendezwa Gwe go mutemi, nolumba muno, hono gwegwe, hamonga na Hamani, zuwali cinyamihe muwe wajenzi wangu, nozize sikukuu so nyenye.”

⁵ Mutemi yakamulajiza Hamani yaze mbelambela, ho wabite kotya wajenzi wa Esita. Hobaho mutemi hamonga na Hamani, wakabita ku sikukuu kwa Esita.

⁶ Na lono wang'wezaga divayi, Mutemi yakamuwuza Esita yakatya, “Nonjele co cose cono wukusaka nane nokupela. Nowuvumila wulombe wako, nane hamba yiwe nusu yo wutemi wangu, nokupela.”

⁷ Esita yakamupitula yakamutya,

⁸ “Gwe mutemi, hono wutemi wako wuwe wudahile kumbonela lusungu no kumhela cono nolomba, ale nane nokwendezwa muno. Ane kanyhi mitondo, nomunozezenyi sikukuu yinji, gwegwe hamonga na Hamani ho muwe wajenzi wangu kanyhi. Nane baho mitondo langa, ho nolonga cono nghusaka wumhele.”

Hamani yalamula kumuwulaga Moledekayi

⁹ Nayo Hamani lono yawukaga ha sikukuu ya ha Esita, yali yena nyemo muno muno. Ninga yakamuwona Moledekayi he'lango lyo kwinjilila mu nyumba yo wutemi. Hamani yaza kola behi na Moledekayi, Moledekayi si yenuka hamba kulajila cogopo kuli Hamani, nha vyono wulajilize wali wulajilize. Hamani yakatuga yikuwo no wukalale wuwaha muno ku soko ya Moledekayi.

¹⁰ Ninga hamba nhavivyo, yakajendelela du sunga yakafika ku kaya yakwe. Yakawacema wawaha wayagwe ku kaya yakwe, yakamucema no mugolece wakwe Zeleshi yaze yawe yali hamonga nawo.

¹¹ Yakawalajila wayagwe wugoli wono yena nawo, hamonga ne wanagwe wose, na vyono mutemi yawona viswanu, yamuhagula yawe mulongola muli wawaha wose, na vyono luno yena mwelecele hali mutemi kuciza wayagwe wose.

¹² Hamani yakajendelela kulonga yakutya, “Lanje, sunga nalu Esita mugolece wo mutemi kanoza sikukuu so nene no mutemi du, sunga ne mitondo yandalice kanyhi mbite hamonga no mutemi.

¹³ Ninga zizi zose zonghwila cici waco, lono nane vyo nghali nghumuwona ayulya Muyahudi Moledekayi yekaye he'lango lye likaya lyo wutemi.”

¹⁴ Baho mugolece wakwe hamonga ne weyendi wayagwe, wakamupela mahweso wakatya, “Nhawule si wukumunozeza mabici gono matali go kumutumbicila, mabici go wutali wa mita makumi mejete? Ne mitondo hakali mitondo muno, wumulombe mutemi ho yakukombolele Moledekayi yatumbikwe. Nagwe mitondo lono wukubita ku sikukuu, ho wubite wusangalaye.” Hamani yakawona vyono lihala lili yiswanu. Hobaho, yakawa kuhimbila mabici gago go kumutubicila Moledekayi.