Esita 4 - Luganuzi Luswanu Kuli Wanhu Wose 2002

Moledekayi yakulomba wutazi kuli Esita

¹ Moledekayi yali yeza kumanya vyono zizi zose zakondya kwitumwa, yakayidemulanga myenda yakwe ko wusungu wuwaha, yakavwala magunila, yakemwajila mavu mu mutwe wakwe, yakanza kupilima mwi'kaya lya Susa, yakawa kulila muno ko wusungu wuwaha,

² sunga yakawa kufika ha mulango muwaha wo kwinjilila mwi'kaya. Ninga siyasuma kwinjila, vyono kwali kusina wukombolwe kuli munhu mono yavwalile magunila kuhelela mwi'kaya.

³ Na ko kose kono lilajilizo lili lyali lyakondya kufika no kumanyika ne wanhu, kwali na cililo muli Wayahudi wose. Wakekapisa no kuvwala magunila no kulila ko wukalale wuwaha no kugona mu mavu.

⁴ Wahinza wono wamwitumamilaga Esita, hamonga ne wetumami wapaswe, wali weza kuwona vyono Moledekayi yanozaga, hobaho wakawa mulonjela Esita. Nayo Esita yakawa kuhangawa no kugazika muno. Yakasola myenda miswanu, yakamupela Moledekayi yavwale. Ninga Moledekayi yakalema kuyibocela.

⁵ Esita yakamucema Hataci u mwitumami wakwe, mono yali mupaswe mono yali yapejigwe no Mutemi yawe kumwitumamila milimo. Esita yakamutuma Hataci, yabite vikaduwane na Moledekayi, Moledekayi yamulonjele zose zono zijeye, na vyono zo zikuleka yakwituma nhavivi, na ku soko ci.

⁶ Hataci yakabita kwa Moledekayi, he'lango liwaha lyo kwinjilila mwi'kaya.

⁷ Moledekayi yakamuloloseza Hataci zose zono zali zamwijelela, na vyono Hamani yali yalamula kulavya sawo nyinji mu witumami wa mu wutemi wuwo, hono mutemi yalumbe kuwawulaga Wayahudi wose.

⁸ Moledekayi yakamupela Hataci ne baluwa ye lilajilizo lilyo lyono lyali lyalavywa mwi'kaya lya Susa, lyo kulajiliza vyono Wayahudi wose wawulagwe yakamulomba yamupele Esita, yamuloloseze na zizo zose, yamulonjele yabite kuli mutemi, yakamunene, yamulombe yawawonele lusungu Wayahudi, i wanhu wakwe Esita.

⁹ Hataci yakayitegula baluwa yiyo kwa Esita,

¹⁰ Esita nayo yakagomoleza wulajilize wuwu kwa Moledekayi.

¹¹ Wulajilize wuwo watezaga, “Munhu wo wose we cilume hamba we cicekulu, mono kokwinjila mwi'wanza lyo wutemi no kumuwona mutemi, lono si yacemigwe, munhu yuyo yimunojeye yawulagwe. Wuwo wo wulajilize, ne wanhu wose wawumanyile, ku wulawilila kuli watazi wo mutemi, sunga na kuli wanhu wose wa mu zi'si zose, wazimanyile zizi. Ninga ho yili nzila monga ndodo, yono yidahile kupitula wulajilize wuwu. Nha cinji, hono mutemi yasole nghome yakwe ye zahabu, no kumusonha munhu wo wose, hodu munhu yuyo wumi wakwe wojendelela. Alu mwezi monga wapuluta ku wulawa vyono mutemi yasonha ane ne nghome yiyi.”

¹² Moledekayi yaza kugabocela mahweso ga Esita, hobaho Moledekayi

¹³ yakamutegulila nonga yo kumusugula Esita, yakatya, “Wulece kwihwesa nha vyono agwe wuli musina mu wugazwe wuwu langa wa Wayahudi du, vyono agwe wuli mu nyumba yo mutemi.

¹⁴ Na hono agwe wunyamale hamba kunoza cinji mu nghani yiyi, ale, wumanye vyono wutazi wolawa kunji no kuwaponya Wayahudi, nawo wolopona, ninga agwe go mweneco kofwa, hamonga ne wanduguzo wose wokongomelela lukulu. Ninga hamba nhavivyo, nani 'mbi mono yamanyile, lunji yo yaleka agwe wukanozwa mu mapango nha gaga, wuwe mugolece wo Mutemi!”

¹⁵ Nayo Esita yakamupitula kanyhi Moledekayi yakamutya,

¹⁶ “Ale wubite wukawakonghole Wayahudi wose wa mwi'kaya lya Susa, mulece kulya, kanyhi munombele. Mulece kulya hamba kung'wa cinji vilo vidatu cilo ne misi. Nane hamonga ne wetumami wangu we cicekulu conoza nhavivyo. Hanyuma ane nomubitila mutemi, hamba niwe nha neza kuwukawaniza wulajilize. Hono nghufwa so yiyo, hodu lece mbite nghafwe lece yiwe nha vyono yowa.”

¹⁷ Moledekayi yakabita kwituma nha vyono yalonjelwa na Esita.