Esita 3 - Luganuzi Luswanu Kuli Wanhu Wose 2002

Hamani yakuhila yawawulaje Wayahudi

¹ Vyali vyeza kupuluta vilo vicefu, mutemi Ahasuwelo, yakamupela wuwaha munhu yunji mono yacemwaga Hamani, yakamupela wuwaha wa mu walongola wose. Hamani yakawa mulelwe na Hamedata Mwagagi.

² Mutemi yakawalonjela iwawaha wose mu witumami wakwe, wamuhulice Hamani, wamwinamile no kumufugamila ha mwande yakwe. Na wose wakawa kwituma nha vyono walajilizwa, ninga Moledekayi yakalema kwituma zizi.

³ Wawaha wayagwe wakamuwuza Moledekayi, soko yono yikumunoza yalece kwituma wulajilize wo Mutemi.

⁴ Kenji muno wamusaka yetume zizi, ninga mwene siyawahulika. Yakawatya, “Ane nili Muyahudi,” holeka sinosuma kwinama no kufugama ha mwande ya Hamani. Hobaho wakamulonjela Hamani zizi, akuno wena ne mahwele hono Hamani kokwendezwa no wuwe wuwu wa Moledekayi.

⁵ Hamani yakakalala muno yali yeza kuhulika vyono Moledekayi yakulema kuwinamila no kumufugamila.

⁶ Yaza kumanya vyono kumbe Moledekayi Muyahudi, hobaho yakadumula nghani vyono yalece kumongomeza yali wene, langa ciba yawongomeze Wayahudi wose wono wali mu wutemi wose wa mu Pelisiya.

⁷ Mu mwaka we likumi na nyejete wo wutemi wa Ahasuwelo, mu mwezi mulongozi, wono wacemwaga Nisani, Hamani yakalajiliza yitowe kula, Pulimu, nha cinji nha vyono wayitezaga. Ho walamule lizuwa no mwezi, wono wakwitumila zizi ku Wayahudi. Wakalamula zitumwe mu mwezi we likumi na nyejete, wono wacemwaga Adali mwizuwa lye 'kumi na yidatu.

⁸ Hamani yakawa yamutegulila zizi Mutemi Ahasuwelo, yakatya, “Moyili nghungugo yinji yono yiyagaye mu wutemi wako mu matumbi gose. Wono wena myoto yono yisimajiye ne myoto yetu, hamba si yihwanile ne myoto ye wanhu wanji wo wose. Hamonga na zizo, siwakwenda kwibata no kwituma wulajilize wa mu yisi yako. Nane nghwitumbila vyono, sikowawonela soni ho wapegwe wulipicizwe wanhu wawa.

⁹ Holeka 'gwe mutemi, hono wuwe wendezwe, ale, wulavye wulajilize, i wanhu wawa wawulagwe. Na hono mbeka vyo wukutya, ane niwikanize kulavya kilo elufu, magana madatu na makumi mane za fweza, hamba kuciza, zinjizwe mu ciwutwa co wutemi ho zitumamilwe mu wudimi we yisi yiyi.”

¹⁰ Mutemi yakayiwopola nyamwidole yakwe, yono yayitumamilaga so wuwicila vitanjilo, mu malajilizo gono yasakaga getumwe mu yisi yakwe, yakamupela Hamani u mulugu we Wayahudi, u mwana wa Hamedata wa mu lulelo lwa Agagi.

¹¹ Mutemi yakamutya Hamani, “I wanhu hamonga ne zi sawo zawo, vyose vyako, holeka wuwatendelaje nha vyono wendile gwegwe.”

¹² Hobaho mwizuwa lye kumi ne 'datu lya mu mwezi mulongozi, Hamani yakawacema wandici wose wo mutemi, yakawasomela lilajilizo, nalyo likandikwa mu zinonga zose za mu yisi, na mu nzila yo wandice wono wetumamilwaga mu wutemi. Hanyuma yakawa kuzitegula kuli watemi, ne walongola wose. Yakawicila sayini ye litagwa lyo mutemi Ahasuwelo, hamonga ne citanjilo ce nyamwidole yakwe.

¹³ I wanhu wono watumwa, wakalisola lilajilizo lili, wakalitegula mu matumbi gose go wutemi wa Ahasuwelo. Lyali lina ne vitanjilo vyono vyalajilaga, vyono mwizuwa lye likumi ne 'datu lya mu mwezi wa Adali, Wayahudi wose wadodo ne wakombi, wacekulu ne wana, wose wanojeye wawulagwe. Yikalamulwa vyono, wose wawulagwe walece kuwonelwa lusungu. Ne zisawo zawo zose zisolwe.

¹⁴ Lilajilizo lili likeyagazwa hanhu hose calinze mu matumbi gose, ho wanhu wose wamanye no kwiwikaniza mwizuwa lilyo kolo lyeza kufika.

¹⁵ So wulajilize wo mutemi, nghani yiyi yikatandala hanhu hose mwi'kaya liwaha lya Susa. I wanhu wono watumwa, wakategula wulajilize wuwu mu matumbi gose. Mutemi Ahasuwelo, hamonga na Hamani, wakekala, wakawa wakujendelela kung'wa divayi, mu cipango cono likaya liwaha lya Susa lyali lili mu wihwelele wuwaha so lilajilizo lilyo.