Esita 2 - Luganuzi Luswanu Kuli Wanhu Wose 2002

Esita yakuwa mugolece wo mutemi

¹ Likuwo lyo mutemi Ahasuwelo lyaza kuwa lyamalika, yakajendelela kwihwesa metumo ga Vashiti, hamonga ne lilajilizo lyono yali yalitegula mu matumbi gose.

² Hobaho i watazi we watemi, wono wali wali behi no mutemi Ahasuwelo, wakamutya, “Alu nhawule wulece kumulondola muhinza yunji mutuvu mono yakali namanya walume, kanyhi mono muswanu ku wulangwe.

³ Wudahile kuwategulila lilajilizo lili, wawaha wose wa mu matumbi gako gose, wawalete wahinza i waswanu, we lizika lidodo, kanyhi watuvu, waletwe baha ha Susa, nagwe wuwawice mu nyumba yako, wawe hasi yo wulanjilizi wo mwitumami wako Hagayi mupaswe, u mwitumami wa mu nyumba yako, u mulanjilizi we wetumami wako wose we cicekulu. Walanjililwe no konjelezwa wuswanu wawo, wahinza wawo ho wajendelele kupegwa vinhu ne zindigwa zo kuwonjeleza uwuswanu ku wulangwe.

⁴ Nagwe baho ho kokwihagulila muhinza muswanu, no mutuvu kuciza wayagwe. Nagwe komusola yawe mugolece wako, wuwe kumuleka Vashiti.” Nayo mutemi yakawona vyono lihweso lilino yiswanu, nayo yakalityatya.

⁵ Naho baho ha Susa, yekalaga munhu yunji mono yacemwaga Moledekayi mwana wa Yayili, yali wa mu mhuga ya Benyamini mwana wa Kishi na Shimeyi.

⁶ Vipango vivilya vyono mutemi Nebukadineza wa Babiloni, yamusuma mutemi Yehoyakimu wa ku Yuda, yakawa kumuteka hamonga na wenji wa muli Wayahudi, ku wulawilila Yelusalemi, ale, mumo mwipuga lilyo, na Moledekayi nayo yali yali mumo.

⁷ Yakawa yena na, Esita, mono yacemwaga Hadasa mu nonga ye cihebelaniya mono yali mwana wo mwihwawe Abihayili. Yali muhinza muswanu ku wulangwe, we nhenje swanu muno muno. Walezi wakwe wali weza kufwa, Moledekayi yakamusola yakekalana nayo kotya mwanagwe.

⁸ Umutemi yaza kuwa yalilavya lilajilizo lililya, ale, wahinza wenji wakaletwa ku Susa, nayo Esita yakawa muyagwe na wawo wono waletwa. Esita yakawikwa mwi'kaya lyo wutemi mu wulanjilizi wa Hagayi mono yali yo mulanjilizi muwaha we nyumba ye wajitulwa.

⁹ Hagayi yendezwa muno na Esita so futa yakwe swanu. Yakalamula kumudima viswanu Esita mu nzila yo kumonjeleza wuswanu wakwe. Yakamupela zindigwa ziswanu no wugono wuswanu. Yakamuhagulila wahinza wanji wali mupunghati wo kumulanjilila muli visakwa vyakwe vyose.

¹⁰ Lulo Moledekayi yali yamulonjeye Esita, yalece kwimanyiza nha vyono mwene Muyahudi.

¹¹ Nayo Moledekayi yajendelaga behi ne nyumba yiyo yo wutemi ho yawone zono zikumwijelela Esita.

¹² Wudimwe wuwu wo kuwonjeleza uwuswanu we wahinza wawa, wukajendelela kwa mwaka monga. Nawo wapegwaga mu myezi mutandatu, mafuta ge manemane, hanyuma kanyhi mu myezi mutandatu yinji wapegwaga mafuta go kuwunoza muwili ho wuwe wutelemeye. Waza kuzikondya zizi zose, wakawa kwanza kumutegula muhinza yumonga yumonga, vikewone no mutemi Ahasuwelo.

¹³ Ne cipango lono cafika co kumutegula muhinza yumonga ha mwande yo mutemi, muhinza yuyo yakombolwaga yavwale viswanu nha vyono mweneco yasakaga.

¹⁴ Wawategulaga cinyamihe, na hono wela, wategulwaga kanyhi mu nyumba yinji yo kuwonjeleza wuswanu, yono yalanjililwaga na Shashingazi umupaswe, mono yali mulanjilizi we wajitulwa wo mutemi. No muhinza hono yawe yalawa ko mutemi, hodu, siyawuyajilaga kanyhi ko mutemi sunga hono mutemi mweneco, yalamule kumusaka kanyhi yawuyajile, no mutemi mweneco yo yatambulaga litagwa lyo muhinza yuyo, holeka yabite kanyhi yawuyajile.

¹⁵ Ale, lipango likawa lyafika lyo kumutegula Esita ko mutemi, Esita umuhinza wa Abihayili u mwihwawe wa Moledekayi, mono yali yamuhagula yekaye nayo kotya mwanagwe. Esita yendezaga muno muno ku wulangwe, kuli wose wono wamulangaga. Lipango lyakwe lyaza kuwa lyafika, mwene si yasaka cinji, langa yakavwala viswanu, nha vyono yalonjelwa na Hagayi umupaswe mono yali yo muwaha we nyumba yiyo.

¹⁶ Umutemi Ahasuwelo yali yafisa myaka mupunghati ya mu wuteme wakwe. Na mu mwezi we likumi, wono wacemwaga Tebeti, Esita yakategulwa ha mwande yo mutemi Ahasuwelo mwi'kaya lyakwe lyo wutemi.

¹⁷ Mutemi Ahasuwelo yakendezwa muno muno no muhinza yuyu Esita kuciza wanji wose. Yali yavwaliye viswanu, kanyhi yendezaga ku wulangwe. Mutemi yakamuvwaliza Esita mukumbo we citemi mu mutwe. Yakawa mucekulu mutuvu wa mwi'kulu, yakahalila hanhu ha Vashiti.

¹⁸ Baho umutemi yakanoza sikukuu mbaha so kumutuga Esita. Yakawalalika i wawaha ne vitung'ati wose hamonga ne wetumami. Baho yakawapela wucehe mu milimo yose, mu wutemi wakwe wose. Mwizuwa lilyo, yakawagawila vipegwa vinji, vyono vyali vye citemi temi.

Moledekayi yakuwutaza wumi wo mutemi

¹⁹ Lulo mutemi Ahasuwelo yakamuhagula Moledekayi ho yawe mulongola kwi'tumbi linji.

²⁰ Ninga ku lubavu lwa Esita, Moledekayi yali yajendeleye kuhundika vyono Esita Muyahudi. Moledekayi yakamulonjela Esita yayihundice nghani yiyi, kanyhi yalece kulonjela yunji wo wose, Esita yakamuhulika mu nghani yiyi, nha vyono yali yazoweye kumuhulika lono yali yakali mudodo, lono wali wekalane nayo ha lulongozi.

²¹ Mwipango lyono Moledekayi yali yapegwa wuwaha mwi'kaya lyo Mutemi, Bigutana na Teleshi, i wejete wa muli wetumami wapaswe wa he'kulu, wono walindilizaga ha mulango ha nyumba yo mutemi, wakakolwa ne 'kuwo wakalamula wamuwulaje mutemi Ahasuwelo cinyele.

²² Moledekayi yali yeza kuzihulika zizi, yakawa kumulonjela Esita mugolece wo mutemi, nayo Esita yakamulonjela mutemi vyono Moledekayi yo yali yazimanya zizi.

²³ Kukawa no wusunjililwe mu nghani yiyi, nayo yikejela vyono ya mbeka, holeka wetumami wawa i wejete, wakatumbikwa mu mabici go kuwulajila. Ne nghani ye wanhu awa, yandikwa ha mwande yo mutemi mu citabu ce zinghani za mu wutemi, zono zinojeye zikumbucilwe.