Wukumbucize wo Wulajilize 9 - Luganuzi Luswanu Kuli Wanhu Wose 2002

U wu wula cihuliko we wanhu

¹ “Muhulicize! Anye nyo wanhu Waisilayeli! Alu izuwali mwasejelela ku wulowoka likolongo lya Yoludani, mwinjile mu yisi yono yikaye makungugo mawaha, kanyhi gali vilungo kumucizenyi. Ne makaya gawo mawaha, gazenjeywe majinji matali muno gono gaficile ko ku mavunde.

² Ne wanhu weneco watali muno kanyhi wali vilungo, wakucemwa Waanaki, nghwihwesa mukondizye kuhulika yikulongwa vyono, hasina munhu mono kosuma kwisumaniza na wene.

³ Ninga anye alu, mowona nyenye nyo weneco vyono Muwaha Mulungu, u Mulungu wenyu, kowa yamulongolelenyi kotya moto wono wuticimizaga. Mwene kowasumiza ha mwande yenyu, nanye ho musume kuwawinga no kuwongomeza mbela mbela, nha vyono Mwene yehuwiza.

⁴ “Nayo Muwaha Mulungu, u Mulungu wenyu, kolo yakondya kuwawinga ha mwande yenyu, mulece kwiyitya vyono Muwaha Mulungu kamwinjizenyi ho muyisole yisi yiyi ko wiling'ano wenyu. Aa, ng'o, u Muwaha Mulungu kowawinga wanhu wawa, ku soko yo wubi wawo.

⁵ Kanyhi si vyono anye muli we ling'ani, mukwituma ze ling'ani, holeka yiwe Muwaha Mulungu yakumupelenyi yisi yawo. Langa mwene kowawinga ku soko yo wubi wawo. Yakuhila yajendelele kukamisa cilagane cakwe cono yacinoza kuli walezi wenyu, Abulahamu, Isaka na Yakobo.

⁶ Holeka yinojeye mumanyile lukulu nha vyono, Muwaha Mulungu si yakumupelenyi yisi yiyi yo moso ku soko yo wiling'ano wenyu. Ng'o yaye! Hambi nha muli wanhu mono musina cihuliko.

⁷ “Kanyhi mulecele lukulu kusemwa vyono mwamukoza likuwo Muwaha Mulungu kuko ku nyika. Ku wulawilila mwizuwa lyono mwawucila ku Misili, sunga mwizuwa lyono mwaficila bahano, mwamubeza Muwaha Mulungu.

⁸ Sunga na he'tunda lya Sinayi, naho nhavivyo mwamukoza Muwaha Mulungu likuwo, yakakolwa likuwo yakasaka yamongomezenyi wose.

⁹ Ane nghabita kwi'tunda kucanyha ho mbocele vibawo vye'bwe vyono vyali vyandicigwe cilagane cono Muwaha Mulungu yacinoza nanye. Nghekala kuko vilo makumi mane misi ne cilo, hamba kulya cinji hamba kung'wa malenga yaye, mu vilo vivyo vyose.

¹⁰ Hanyuma ho Muwaha Mulungu yakawa kumhela vibawo vyejete vya mabwe, vyono vyali vyandicigwe no muwoko wakwe mweneco, zinghani zono yalonganila nase wose he'tunda.

¹¹ Heya vyali vyeza kupuluta vilo vivyo makumi mane misi ne cilo, Muwaha Mulungu ho yakawa kumhela vivyo vibawo vyejete vye mabwe, vyono vyali vyandicigwe i cilagane.

¹² “Hanyuma Muwaha Mulungu yakanonjela yakatya, wutime hasi ye litunda musunho, hambi i wanhu wono wawawusa ku yisi ya Misili, nha wakondya kwiyihodanga weneco, no kwiyinjiza mu zinghani zimbi. Wakondya kuzileka zose zono nawalajiliza wetume, alu wenozeza milungu ye vihwani viseswe.

¹³ “Kanyhi Muwaha Mulungu yakanonjela yakatya, ‘Manyile vyono wanhu wawa, wena nhumbula yono yisina cihuliko.

¹⁴ Holeka lu 'gwe wulecele lukulu kunyimila. Ane neza kusaka kuwongomezeza lukulu wose, sunga hawe hasina kanyhi munhu mono kowakumbucila yaye. Nane nokunoza agwe wuwe sogo we likungugo yiwaha kanyhi lye vilungo kuciza vyono wenha wene.’

¹⁵ “Hodu, nane nghawa kutima hasi ye litunda, akuno ndinghuye ne vibawo vi vilya vyejete vye mabwe mu mawoko gangu, vyono vyali vyandicigwe i cilagane. Ne malambi go moto gakaga mu wulawa mwi'tunda.

¹⁶ Nane nghawona vyono mwali mwakondya kucibena cilagane cono Muwaha Mulungu, u Mulungu wenyu, yali yamunozezajenyi. Na kanyhi vyono mwali mwamusutizya Muwaha Mulungu, so winozeza nyo weneco cihwani ce ndama nyenjedulwe.

¹⁷ Hodu nane nghawa kuvigumila hasi ha mwande yenyu, i vibawo vyejete vye mabwe, navyo vikawa kutulanjika no kuzaganjika.

¹⁸ Ho baho nane nghagwa funama hali Muwaha Mulungu mu vilo makumi mane kanyhi misi ne cilo, hamba si nalizaga cinji, hamba kung'wa malenga, mu vilo vyose vivyo. Nane nazinoza zizi ku soko mwali mwakondya kumusutizya Muwaha Mulungu, mwamukoza likuwo.

¹⁹ Nghawa kogopa likuwo liwaha lyo Muwaha Mulungu, hambi nha yali yakalipe muno yasakaga ho yamongomezenyi nyenye wose. Ninga hamba nhavivyo, Muwaha Mulungu yakahulika kanyhi wulombe wangu.

²⁰ Muwaha Mulungu yakamukolelwa likuwo Haluni, yakasaka yamuwulaje. Nane nghamulombela na ku soko ya Haluni mwi'daha lilyo.

²¹ Nghawusola wubi wenyu, nha cinji yiyilya ndama nyenjedulwe yono mwali mwayinoza, nghawa kuyigumila mu moto. Nghayitakamiza, nghawa kuyitindya, yikawa nha manghundi, hanyuma, nghawa kugagumila manghundi gago mu cikolongo, cono cahulumaga cilawiliye mwi'tunda.

²² “Kanyhi mwamukoza likuwo Muwaha Mulungu, u Mulungu wenyu, lono mwali muli ha Tabela, na ha Masa, na ha Cibiloti-hatava.

²³ Na lono yamuletenyi ku wulawa ku Kadeshi-balineya, lono yamulajilizenyi mubite mukayisole yisi yono yali yamupelajenyi, ninga 'nye mukamubeza Muwaha Mulungu, hamba si mwamwitumbila, hamba kumuhulika kose.

²⁴ Holeka nane ku wulawa mwi'zuwa lilyo, nghamumanyenyi vyono musina cihuliko kuli Muwaha Mulungu.

²⁵ “Holeka nane nghawa kugwa funama hali Muwaha Mulungu, vilo vivyo makumi mane misi ne cilo, hambi nha nali nakondya kumanya vyono komongomezenyi wose.

²⁶ Nane nghawa kulomba nghatya, ‘Gwe go Muwaha Mulungu, wulece kuwongomeza wanhu wako, i wanhu wono wawaponya no kuwawusa ku yisi ya Misili kwe vilungo viwaha, na ko wusume wuwaha.

²⁷ Kanyhi nghukulomba wuwakumbucilaje i wetumami wako, Abulahamu, na Isaka na Yakobo. Holeka go Muwaha Mulungu, wulece kuwulanga wubedegazi wawo, no wubi wawo ne masutya ge wanhu wawa.

²⁸ Yilece kuwapela Wamisili cilejeho co kulonjela, wawe kutya, vyono siwasuma kuwenjiza wanhu wako, mu yisi yono wawehuwiziza. Kanyhi wotya, vyono wawasola wanhu wako wuwategule mu nyika ho wukawawulajile mumo, vyono wali wuwasulile.

²⁹ Hamonga na zizo, awano wo wanhu wono wawahagula ho wawe wako go mweneco, nagwe wukawawusa ku Misili kwe vilungo vyako viwaha na ko wusume wuwaha.’ ”