Wukumbucize wo Wulajilize 7 - Luganuzi Luswanu Kuli Wanhu Wose 2002

I wanhu wo Mulungu

¹ “Muwaha Mulungu, u Mulungu wenyu, komutegulenyi sunga ko ku yisi yono moyisola yiwe yenyu, nayo kogawinga makungugo menji gono gali mu yisi yiyo gawuce. Hamonga ne makungugo mupunghati mawaha, gono gali vilungo kuciza anye, likungugo lye Wahiti, ne Wagiligashi, ne Waamoli, ne Wakanani, ne Wapelizi, ne Wahivi, ne Wayebusi.

² Na kolo Muwaha Mulungu, u Mulungu wenyu, yakumukombolelenyi wanhu wawo mu miwoko yenyu, nanye kolo mwakondya kuwasuma, munojeye muwongomezeze lukulu. Mulecele lukulu kwilumbaniza nawo, hamba mulece kuwawonela lusungu.

³ Kanyhi mulecele lukulu kwitolanila nawo.

⁴ Hambi hono munoze nhavivyo, i wana wenyu nha wokwejelezwa na wene, sunga wamusemwe Muwaha Mulungu, hanyuma wawe kuhemba milungu yinji. Na hono zizo zijele kuli'nye, Muwaha Mulungu komukolelwenyi yikuwo, sunga yamongomezenyi nyenye wose lwa kamonga.

⁵ Holeka mugamwagulaje makumbicilo gawo, mugabenanjize ne masumbili gawo ge mabwe, kanyhi mugatemanje ne Maashela gawo, muvikongojeze ne vihwani vye milungu yawo viseswe.

⁶ Muzitumaje zizi, vyono anye muli wanhu wo Muwaha Mulungu, u Mulungu wenyu. Hambi Muwaha Mulungu nha yakamuhagulenyi anye mu wulawa mu wanhu wa mono'nze yose, muwe nghungugo yono yili wene so mweneco.

⁷ “Ninga Muwaha Mulungu si yakamuhagulenyi anye vyono mwali muli wenji mucizize i makungugo ganji gose, aa, ng'o, hambi nha mwali muli nghungugo ndodo du muno, mono yinze.

⁸ Ninga Muwaha Mulungu yakamwendenyi du, kanyhi yakasaka yafisilize wihuwizo wakwe, wono yawehuwiza i walezi wenyu. Na yiyi yo yaleka yakamuwusenyi ku yisi ya Misili, kwe vilungo vyakwe viwaha, yakamunozenyi muwe welecele, mu wulawa mu wuwanda wa ku Misili, wa kuli mutemi Falawo.

⁹ Kanyhi mweze kukumbucila vyono Muwaha Mulungu, u Mulungu wenyu, yo Mulungu monga du, kanyhi mwihuwilwa. Mono kosuma kukamisa cilagane cakwe, no kulajila lusungu lwakwe luwaha kuli ndelo maelufu na maelufu ga wono wamwendile, kanyhi webate ne malajilizo gakwe.

¹⁰ Ninga hamba si kokangamyanga yaye kuwalipiciza wose wono si wamwendile.

¹¹ Holeka muzikamisaje zose zono mwakondya kwijizwa. Kanyhi mugebate ne malajilizo gose gono nimulonjelenyi izuwali.”

Wulugutwe wa kuli ze cihuliko

¹² “Na hono mugahulice malajilizo gaga mugakamise no kugetuma ko wihuwilwa, u Muwaha Mulungu, u Mulungu wenyu, nayo kojendelela kucikamisa cilagane cakwe cono yacinoza nanye, kanyhi komulajilenyi no lusungu lwakwe luwaha, nha vyono yawehuwiza walezi wenyu.

¹³ Nayo Mulungu komwendenyi, kanyhi komulugutizenyi, ho monjelezece no kuwa na wana wenji. Kanyhi koyilugutiza ne migunda yenyu, ho mutuje wuhemba winji ne divayi, ne mafuta. Kanyhi komulugutizenyi yamupelenyi mitugo minji ne zingholo. Komupelenyi wulugute wuwu wose, mumo mu yisi yono yawehuwiza walezi wenyu nha vyono komupelenyi.

¹⁴ Na howa hasina kanyhi munhu wo wose mono yinze yiyi, mono kowa no wulugute nha nyenye. Kanyhi muli nyenye, howa hasina mulume hamba mucekulu mono si kolela wana, hamba mutugo wono si wukulela yaye.

¹⁵ Hambi Muwaha Mulungu nha yo komucitilenyi muli matamwa ge mawala gose. Kanyhi hamba si koleka matamwa mabi gamuzizenyi, gono gamutujenyi lono mwali muli ku Misili, langa kogaleka gawatuje i walugu wenyu.

¹⁶ Ninga langa, mugongomezezaje lukulu makungugo gose gono Muwaha Mulungu, u Mulungu wenyu, yakumukombolelenyi, langa mulecele lukulu kuwawonela lusungu hamba hadodo. Kanyhi mulecele lukulu kuyihemba milungu yawo, hambi nha yowa mutego kuli'nye.

¹⁷ “Kanyhi mu madaha go gose, mulecele lukulu kuwogopa, hamba kuwehwesa wanhu wawa vyono wenji muno si nha nyenye, holeka lunji simosuma kuwasuma no kuwawinga wawuce.

¹⁸ Mulece kuwogopela lukulu, ninga mukumbucile zono yetuma Muwaha Mulungu, u Mulungu wenyu, kuli Falawo mutemi wa Misili, sunga na kuli wanhu wakwe wose.

¹⁹ Kanyhi mukumbucile ze litamwa lyo kogofya lyo wukoma, lyono mwaliwona nyenye nyo weneco ne meso genyu, ne mapoto, ne mezino mawaha, no wusume, ne vilungo, vyono Muwaha Mulungu, u Mulungu wenyu, yetumila yakamuwusenyi mu yisi ya Misili. Na mu nzila yiyo du, yakawongomeza Wamisili. Holeka kowongomeza ne wanhu wawa wose, wono aluno anye mukuwogopa.

²⁰ Hambi nha kowaletela woga wuwaha, sunga muwongomezeze lukulu wose wono wotiza no kwihundika.

²¹ Holeka anye mulecele lukulu kuwa no woga ku so wanhu wawa, hambi Muwaha Mulungu, u Mulungu wenyu, nha yali hamonga nanye. Mwene nha yo Muwaha Mulungu mono Yalawiliciye, kanyhi yo mweneco du mono yanojeye wanhu wamogope.

²² U Muwaha Mulungu, u Mulungu wenyu, kogawinga hadodo hadodo makungugo gago hali'nye mu nghango vyono mowa kucila kwinjila mu'si. Nanye si mosuma kogongomeza lwa kamonga yaye. Ku soko hono munoze nhavivyo, i malimu ga mu mbago nha gokwinjipa mu yisi yenyu, no kumogofyenyi.

²³ Kanyhi Muwaha Mulungu komukombolelenyi i walugu, no kuwogofya, sunga kolo mwawongomezeza wose lukulu.

²⁴ Muwaha Mulungu komukombolelenyi watemi wawo wose. Nanye muwawulaje, nawo wawe kusemwelwa lukulu. Hasina hamba yunji wowose mono kosuma kumwimilenyi, langa sunga kolo mwawongomezeza wose lukulu.

²⁵ Muviticimizaje mu moto, i vihwani vye milungu yawo viseswe. Hamba mulecele lukulu kusulumila fweza, hamba zahabu, vyono vili muli vyene, mulecele lukulu kuvisola viwe vyenyu. Hono munoze nhavivyo, wowa mutego kuli'nye, hambi Muwaha Mulungu, nha siyawendile u wuhemba vihwani viseswe.

²⁶ Kanyhi, mulecele lukulu kuvisola vivyo vihwani vye milungu viseswe, no kuvileta mu zikaya zenyu. Hono munoze nhavivyo, u wulijitwe wono wuli muli vyene, womuwuyilenyi nyenye. Holeka, munojeye muyikomale no kuyinyalaha, milungu yiyi ye vihwani viseswe, hambi nha vili mu wulijitwe wo Muwaha Mulungu.”