Wukumbucize wo Wulajilize 5 - Luganuzi Luswanu Kuli Wanhu Wose 2002

Malajilizo yikumi

¹ Musa yakawakonghola hamonga i Waisilayeli, yakawalonjela yakatya, “Anye nyo Waisilayeli, alu nghumunenenyi, muhulicize malajilizo gono nghumulajilizenyi izuwali. Mugeyijize, sunga mumanyile lukulu nha vyono mwakondya kugakamisa gose.

² Kanyhi mumanyile nha vyono, Muwaha Mulungu, u Mulungu wetu, yanoza cilagane ne walezi wetu he 'tunda lya Sinayi,

³ ninga si yacinoza cilagane cico ne walezi wetu du, langa sunga na sese wose mono cili womi izuwali.

⁴ Kanyhi mukumbuciye na vyono Muwaha Mulungu, yalonganila nanye ciwonelela, ku wulawilila mwi'tunda, mu wulawa muciligati yo moto.

⁵ Na vyono mwi'pango lilyo, ane nghema haciligati yenyu no Muwaha Mulungu, ho nimulonjelenyi zono mwene yazilongaga. Hambi anye nha mwawogopaga moto, kanyhi hamba si mwali musume kubita kwi'tunda kucanyha. Nayo Muwaha Mulungu yakatya,

⁶ ‘Ane yo nene Muwaha Mulungu, u Mulungu wako, mono nakuwusa mu yisi ya Misili, kono wali wuli mu wuwanda.

⁷ Wulece kuwa na milungu yinji, langa nene du.’

⁸ “Wulece kwinozeza cihwanicizo ciseswe, hamba cihwani ce cinhu co cose cono cili ku wulanga, hamba cono cili mono yisi, hamba cono cili mu malenga kusi ye yisi.

⁹ Wulece kuvitumamila vihwani vye milungu vye liwala lyo lyose, hamba wulece kuvihemba. Hambi ane no Muwaha Mulungu, u Mulungu wako, nha nili Mulungu wo wivu, mono si nosuma kwisumaniza na yunji wo wose. Nane nghuwalipiciza wana wubi we malezi wawo, sunga ko ku lulelo lwe kadatu na lwe kane lwa wono wasulile.

¹⁰ Ninga nghuwawonela lusungu maelufu na maelufu wono wanyendile, kanyhi wagebate ne malajilizo gangu.

¹¹ “Wulece kulitumamila litagwa lyo Muwaha Mulungu wako mu zi nzila zimbi, hambi Muwaha Mulungu, nha komulipiciza munhu wo wose mono ya kulitumila litagwa lyakwe mu zinzila zimbi.

¹² Weze kulikumbucila lizuwa lye Sabato wulisiwanule.

¹³ Mu vilo mutandatu weze kwituma no kukondelezeza lukulu milimo yako yose.

¹⁴ Ninga lizuwa lyo mupunghati yo Sabato yo Muwaha Mulungu, u Mulungu wako. Holeka mwi'zuwa lilyo, wulece kwituma mulimo wunji, gwegwe, hamba mwanago we cilume hamba we cicekulu, hamba wetumami wako we cilume hamba we cicekulu, hamba mitugo yako, hamba mujenzi wako mono yali hako. I wetumami wacehe mwi'zuwa lilyo, nha vyono nagwe kowa wucehile.

¹⁵ Hambi nha yikunojeye weze kukumbucila vyono nagwe wali wuli muwanda mu yisi ya Misili, kanyhi na vyono, ane no Muwaha Mulungu, u Mulungu wako, nakukombozeza mu nzila ye vilungo vyangu viwaha hamonga no wusume. Na yiyi yo yikuleka ane nghukulajiliza wulikamise lizuwa lye Sabato.

¹⁶ “Wuwogopaje sogo no nyina yako, nha vyono nghukulajiliza, ane no Muwaha Mulungu, u Mulungu wako, ho wusume kutuga wumoteswe, na kanyhi ho wusume kwikala vilo vinji mono yisi yono nghukupela.

¹⁷ “ ‘Wulece kuwulaga munhu.

¹⁸ “ ‘Wulece kusenyha.

¹⁹ “ ‘Wulece kuhiza.

²⁰ “ ‘Wulece kulavya wuhomelezi wo wulambi kuli muyago.

²¹ “ ‘Wulece kumusulumila mugolece wo muyago, hamba kaya yakwe, hamba mugunda wakwe, hamba mwitumami wakwe, hamba ng'ombe yakwe, hamba ndogowe yakwe, hamba cinhu co cose co muyago.’

²² “Aga go malajilizo gono yamulajilizenyi nyenye wose lono mwali mwikongholeye he'tunda. Lono yalonjela nanye kwe lizi lye vilungo mu wulawilila mu moto, na mu mavunde matitu tuku. Nayo yakamulajilizenyi malajilizo gaga du, hamba si yonjeleza kanyhi nghani zinji yaye. Hanyuma yakawa kugandika malajilizo gago mu mbawo nyejete ze mabwe, yakawa kumhela nene.”

Woga we wanhu

²³ “Nanye mwali mweza kulihulika lizi likulawilila mu wutitu, lono litunda lyakaga moto, hobaho i walongola wenyu hamonga ne wawaha wenyu we milango yenyu wose, wose wakanyiziza,

²⁴ wakanyitya, ‘Cakondya kuwona vyono, Muwaha Mulungu, u Mulungu wetu, kelajila u Wuwaha wakwe hamonga no lukumyo lwakwe, lono cimuhuliciye yakulonga mu wulawa mu moto! Holeka izuwali, cakondya kumanya vyono, munhu wo wose kojendelela du kuwa mumi, hamba yiwe Mulungu kakondya kulongana nayo.

²⁵ Alu kanyhi nhawule cijendelele kwiyinjiza mwi'fwa? Hambi moto wuwo wo kogofya nha wocongomeza. Hambi nha citumbiye vyono cofwa du, hono cimuhulice Muwaha Mulungu, u Mulungu wetu yakulonga nase kanyhi.

²⁶ Alu mwene, mbeka ho yuli munhu wo wose we nghuli, mono yekala mumi mono yahulika Mulungu mumi yakulonjela mu wulawa mu moto?

²⁷ Holeka gwe Musa, gwegwe du yo weze kumuhuliciza u Muwaha Mulungu, u Mulungu wetu, muli zose zono kolonga. Hanyuma nagwe ho kuwa kuza kucilonjela zono mwene yakulonjeye. Nase cozihuliciza du no kuzituma.’

²⁸ “Nayo Muwaha Mulungu, yali yeza kuzihulika zizo zono mukazilonga, nayo yakanonjela yakatya, ‘Ane nazihulika zose zono wanhu wawa wakuzilonga, nane nghuwona vyono wakulonga mbeka.

²⁹ Na hono mbeka nhondo zose wawe kwihwesa nhavivi! Na hono mbeka wawe wanyogopile, no kuwa ne cihuliko kuli'ne nhondo zose, muli ze malajilizo gangu, nawo wojendelela kuwa no wumoteswe muli zose, ne wana wawo cibitilila.

³⁰ Holeka alu wubite wukawalonjele wawuye mu mahema gawo.

³¹ Ninga agwe Musa, weze wuli baha du hamonga nane, nane nokulajiliza wulajilize wangu wose, hamonga ne malajilizo. Nagwe wubite wukawejize wawo wanhu, wagebate no kugakamisa mumo mu yisi yono nghuwapela.’

³² “Holeka anye nyo Waisilayeli, mumanyile lukulu vyono munojeye muzikamise no kwituma zose zono Muwaha Mulungu, u Mulungu wenyu yamulajilizenyi. Kanyhi mulecele lukulu kuwubedegala wulajilize wakwe.

³³ Mweze mwina cihuliko muli zose, ho musume kutuga wumoteswe, na kanyhi ho musume kwikala vilo vinji, mu yisi yono moyisola yiwe.”