Wukumbucize wo Wulajilize 4 - Luganuzi Luswanu Kuli Wanhu Wose 2002

Musa yakuwasaka Waisilayeli wawe ne Cihuliko

¹ Hanyuma Musa yakawalonjela wanhu yakatya, “Mweze muli cihuliko kuli zo wulajilize wono nghumwijizenyi, nanye holeka mowumipa, sunga muyisole ne yisi yono Muwaha Mulungu, u Mulungu we walezi wenyu, yakumupelenyi.

² Ninga mulece konjeleza hamba kucepula muli zose zono nghumulajilizenyi. Langa mweze ne cihuliko du kuli malajilizo go Muwaha Mulungu, u Mulungu wenyu, gono nakondya kumulonjelenyi.

³ Hambi nha mwewonelela nyenye nyo weneco, zono Muwaha Mulungu yazituma he 'tunda lya Peyoli. Hambi nha yawongomezeza lukulu wose wono wahembaga Baali.

⁴ Ninga awalya wono wali wehuwilwa kuli Muwaha Mulungu, u Mulungu wenyu, awo wakali wali cawumi sunga nalu.

⁵ “Nane nha nakondya kumwijizenyi ze malajilizo gose, nha vyono Muwaha Mulungu, u Mulungu wangu yanonjela nitume. Holeka mweze ne cihuliko kuli malajilizo gago, mumo mu yisi yono mokwinjila no kuyisola yiwe yenyu.

⁶ Mugakamisaje ko wihuwilwa. Na mu nzila yiyo, i wanhu we makungugo ganji, mumo mo wowonela vyono anye muli wanhu we mahala no wizuce. Nawo kolo wakuzihulika zose ze malajilizo gaga, wotya, ‘Mbeka nghungugo yiyi mbaha, wo wanhu wono wena mahala no wizuce!’

⁷ “Na hasina likungugo linji lyolyose, hamba liwe yikungugo yiwaha nha vyono lyowa linha, lyono lyowa lina mulungu mono yali behi nawo, lono wakuhila cinji co cose kuli mwene. Ninga ase, Muwaha Mulungu, u Mulungu wetu, yali hamonga nase. Kanyhi kacipitulaga wulombe wetu lono cikumulomba wutazi wakwe.

⁸ Na kanyhi, hasina likungugo linji lyo lyose, hamba liwe yikungugo yiwaha nha vyono lyowa linha, lyono lyowa lina wulajilize we ling'ani, wono wihwanile no wulajilize wono nakondya kumwijizenyi anye izuwali.

⁹ Holeka mwiyihenje nyo weneco! Kanyhi mwilanjilile mulece kuzisemwa zose zono muziwene ne meso genyu, mu vilo vyenyu vyose vyo wikale wenyu. Kanyhi munojeye muwalonjele zizi, wana wenyu, ne wezukulu zenyu,

¹⁰ ze lizuwa lyono anye mwema ha mwande yo Muwaha Mulungu, u Mulungu wenyu, he'tunda lya Sinayi, lono yanonjelela ane Musa, yakunyitya, ‘Wakongholelaje wanhu hamonga, hambi nha nghusaka wahulice zono nghuhila kulonga, ho weyijize kuwa ne cihuliko kuli'ne, mu vilo vyawo vyose vyo wikale wawo. Kanyhi ho wawejize ne wana wawo, nawo ho watyatye luzu lwawo.’

¹¹ “Kanyhi muwalonjele wana wenyu na vyono mukabita mukema ha mwalambalo we litunda, lyono lyali yigubicizwe ne mavunde matitu tuku, gono galawaga lyosi yititu tuku, hamonga ne malambi go moto, gaficile ko ku wulanga.

¹² Kanyhi muwalonjele na vyono Muwaha Mulungu yalonganila nanye mu moto, na vyono nanye mwalihulika lizi lyakwe du, ninga si wamuwona yaye mumbwa yakwe vyono yenha.

¹³ Kanyhi na vyono yamulonjelenyi nha vyono munojeye mucikamise cilagane cakwe cono yacinoza nanye. Na vyono munojeye mugakamise i malajilizo gakwe yikumi, gono yagandika mweneco mucanyha ye vibawo vyejete vye mabwe.

¹⁴ Kanyhi Muwaha Mulungu, yanonjela vyono yinojeye nimwijizenyi wulajilize no wuling'anizi, wono munojeye muwukamise, lono muli mu yisi yono mokwinjila no kuyisola yiwe yenyu.”

Wusugulwe kuli zo wukumbika vihwani

¹⁵ “Nayo Muwaha Mulungu, lono yalonganila nanye mu wulawa mu moto he'tunda lya Sinayi, nanye hamba si mwawona mumbwa yakwe hamba futa yo yose.

¹⁶ Holeka mwiyihenje nyo weneco, kanyhi mulecele lukulu kwituma wubi so winozeza nyo weneco cihwani co cose ciseswe, ca mu futa ye cihwani co munhu mulume, hamba we cicekulu,

¹⁷ hamba cihwani ce nimu, hamba ce ndeje,

¹⁸ hamba cihwani ca cinji co cose cono citambalaga hasi, hamba somba.

¹⁹ Kanyhi mwilanjilile, mulece kukwegwa na vya ku wulanga, lizuwa, mwezi, ne zinyelezi, ho muvitumamile no kuvihemba. Muwaha Mulungu, u Mulungu wenyu, yawaleceye wanhu wanji vivyo vyose ho wavihembe.

²⁰ Ninga anye muli wanhu mono mwawuswa ku Misili, mwi kongojelo lyono likwaka moto mukali. Yakamuletenyi, ho yamunozenyi muwe wanhu wakwe, nha vyono mwinha izuwali.

²¹ Na ku soko yenyu, Muwaha Mulungu, u Mulungu wenyu, yakangholelwa likuwo. Yakawa kwilaha no kulonga, vyono ane, si nolowocela lukulu likolongo lya Yoludani, ninjile mu yisi yono yina moso, yisi yono yakumupelenyi 'nye.

²² Ane nofwila mono yisi yiyi du, hamba si nolowocela lukulu likolongo. Ninga anye molowoka muyisole yisi yiyo yono yina moso.

²³ Holeka mwilanjilile, mulece kusemwa cilagane cono Muwaha Mulungu, u Mulungu wenyu yacinoza nanye. Kanyhi mweze ne cihuliko kuli ze lilajilizo lyakwe, mulecele lukulu kwinozeza nyo weneco cihwani co cose ciseswe.

²⁴ Hambi Muwaha Mulungu, u Mulungu wenyu, nha moto wono wuticimizaga, yo Mulungu wo wivu.

²⁵ “Nanye kolo mwekala mu yisi vilo vinji muno, no kutuga wana ne wezukulu, mulecele lukulu kumusutizya Mulungu, so winozeza nyo weneco cihwani co cose ciseswe ca mu futa ye cihwani cinji. Hambi nghani yiyi, nha si yomunojeza Muwaha Mulungu, kanyhi yomukoza likuwo muno muno.

²⁶ Nane nghuwutambula wulanga ne yisi, viwe wuhomelezi kuli 'nye izuwali, nha vyono, hono mwikale si muhulice 'ne, hodu, mokwajililila lukulu ku wulawa mu yisi yiyi, hamba si molokwijela kanyhi yaye. Kanyhi hamba si mosuma kwikala vilo vinji, mu yisi yiyo yono yili ku nhumbi ya Yoludani yono moyisola.

²⁷ Muwaha Mulungu kolomwiyagazenyi, mwiyagalile mu makungugo ganji, na kuko, wayenyu wacefu du wo wolosigala wekale womi.

²⁸ Na kuko kono molokwiyagazizwa, molowa kuhemba milungu yono minozwe ne miwoko ye wanhu, i milungu ye mabici na ye mabwe, milungu yono si yosuma kuwona hamba kuhulika hamba kulya, hamba kunusa kose yaye.

²⁹ Na kuko nanye, molowa kumulondola Muwaha Mulungu, u Mulungu wenyu. Na hono muze mumulondole kwe nhumbula yose na ko mutima wose, molomuwona.

³⁰ Nanye kolo mwenjila mu magayo, ne zinghani zizo zose zakondya kumwaganenyi, nhondo, ho molomuwuyila Muwaha Mulungu, kanyhi ho molomuhulika.

³¹ Mwene Muwaha Mulungu, yo Mulungu wo lusungu. Hamba si kosuma kumulecenyi yaye, hamba kumongomezenyi, hamba kucisemwa cilagane cakwe cono yacinoza mweneco ne walezi wenyu.

³² “Mujele ta kuzilanga, ze vilo vyono vyapuluta, ze vilo vyono mwali mukali nalelwa. Zinghani zono zejela katali muno muno, lono Mulungu yamuwumbila munhu mononze. Kanyhi mulanje no wuwaha we yinze vyono winha. Wulenyi! Yowa yejela nghani yinji mbaha yono yinha yiyi? Hamba ho yuli yunji muyenyu, mono kowa yayihulika nghani yono yihwanile yiyi?

³³ Hamba ho hali hanji hono wanhu wahulika mulungu yakulonganila nawo mu moto, nha vyono nyenye?

³⁴ Hamba ho yuli mulungu yunji wo wose, mono yejelela yabite yakawawuse wanhu ku wulawa mwikungugo linji, kanyhi yawanoze wawe wanhu wakwe, nha vyono Muwaha Mulungu, u Mulungu wenyu yamunozezenyi nyenye ku yisi ya Misili? Hambi Muwaha Mulungu nha yazinozeza zose ha meso genyu, yetumamila vilungo vyakwe viwaha hamonga no wusume. Yaleta magazo, no wulugu, yakanoza vitanjilo, ne mezino, yakaleta nghani zo wogofye wuwaha muno muno.

³⁵ Muwaha Mulungu yazinoza zizi zose, ho yamulajilenyi vyono, hasina mulungu yunji kanyhi, langa yo mweneco du yo Mulungu yali wene.

³⁶ Kanyhi yakamunozenyi mulihulice lizi lyakwe ku wulawa ku wulanga, ho yamwijizenyi. Kanyhi yakamunozenyi ho muwuwone moto wakwe wono welile bahano hono hasi, nayo yakawa kulongana nanye mu wulawa mu moto wuwo.

³⁷ Nayo vyono yali yawendile i walezi wenyu, holeka yakamuhagulenyi nanye, na kwe vilungo vyakwe viwaha, yakamuwusenyi mu wulawa mu yisi ya Misili.

³⁸ Hanyuma yakagawinga ku mwande yenyu i makungugo gono gali mawaha, kanyhi gali gali vilungo muno kumucizenyi nyenye. Ho yasume kumwinjizenyi no kumupelenyi yisi yawo, yisi yono alu yeza yenyu.

³⁹ Holeka izuwali, mukumbucile, mulece kusemwa. Vyono Muwaha Mulungu, yo Mulungu mono yali ku wulanga sunga na mononze. Hasina mulungu yunji kanyhi wowose.

⁴⁰ Holeka mukamise malajilizo gakwe gono nghumulajilizenyi izuwali. Na mu nzila yiyo, holeka zenyu zose zojendelela viswanu, hamonga ne wana wenyu. Kanyhi holeka mojendelela kwikala mononze vilo vinji, vyono Muwaha Mulungu, u Mulungu wenyu, yakumupelenyi viwe vyenyu cibitilila.”

Makaya go wutizizo, ku cilima ya Yoludani

⁴¹ Hobaho Musa yakagasiwanula makaya madatu ku nhumbi ye cilima ye likolongo lya Yoludani.

⁴² I makaya gono munhu kosuma kutiziza mumo no kuwa yapolile, hono yawulaje munhu mhalanyuka hamba si yali yamusulile yaye. Munhu yuyo kosuma kwiponezya mwi'kaya limonga lya mu makaya gago, hamba si kowulagwa yaye.

⁴³ Likaya lya Bezeli lyono lyali lili mu yisi yo wuhihi, likawa so wo mulango wa Lubeni. Likaya lya Lamoti lyono lyali lili mu yisi ya Gileyadi, likawa so wo mulango wa Gadi. Nalyo likaya lya Golani, lyono lyali lili mu yisi ya Bashani, likawa so wo mulango wa Manase.

U wulolosezwe we soko ye malajilizo go Mulungu

⁴⁴ Musa yakawaloloseza i wanhu Waisilayeli ze malajilizo go Mulungu, hamonga ne mejizo gayo.

⁴⁵ Na zizi ziketumwa lono wali wakondya kuwuka ku Misili,

⁴⁶ lono wali wali mwi'lolo, ku cilima ye likolongo lya Yoludani, lyono vidomile ne cikaya ca Betipeyoli. Baho ho yawalolosezeza malajilizo gago. Mu yisi yo mutemi Sihoni, u mutemi we Waamoli, mono yali yatemile mu cikaya ca Heshiboni. Ninga Musa ne wanhu Waisilayeli wakamusuma lono wawucila ku Misili.

⁴⁷ Wakayisola yisi yiyo, hamonga ne yisi yo mutemi Ogu wa Bashani, u mutemi yunji muyagwe no mutemi Sihoni, mono nayo, yali mutemi we Waamoli mono yekalaga ku lubavu lwa ku cilima ye likolongo lya Yoludani.

⁴⁸ Ne yisi yiyi, yali ngazi muno, yikawa yilawiliye ku cikaya ca Aloweli ha mwejelele we likolongo lya Alinoni, yikawa yibitile sunga ko kwi'tunda lya Siliyoni, wo wutya, litunda lya Helemoni.

⁴⁹ Nayo yikawa yibitile du, sunga mu yisi yose yo lubavu lwa ku cilima ye likolongo lye Yoludani, sunga ko kwi'lenga lyo Mwino kutakama, sunga ko ku cilima mu mwejelele we litunda lya Pisiga.