Wukumbucize wo Wulajilize 32 - Luganuzi Luswanu Kuli Wanhu Wose 2002

¹ “Nye nyo'si no wulanga, muhulicize zinghani zangu, muteje makutu kuli zono nghulonga.

² Hambi mejizo gangu, nha golagala nha mabanhi ga mvula, gogwisa buhe mu yisi, zinghani zangu zomuzizenyi nha vibanhi vya mvula mu mahanze madece, nha mabanhi ga mvula mu vilimwa.

³ Nane nolikumya litagwa lyo Muwaha Mulungu, ne wanhu wakwe wolonga zo wuwaha wakwe.

⁴ “Muwaha Mulungu yo mukamisi wenyu mono yali vilungo, mono si kasinjisikaga, kanyhi yali ling'ani muli zakwe zose. Mulungu wenyu mwihuwilwa kanyhi yo we mbeka.

⁵ Ninga anye si muli wehuwilwa, musina cambuzi hamba no kuwucemwa wanagwe, muli nghungugo nyituma wubi kanyhi muli walambi.

⁶ Alu anye nyo wanhu walele, kanyhi mono musina lilumbo, mukwihwesa nzila yiyo yo swanu lo yo kumwitumamila Muwaha Mulungu? Ninga, mwene yo sogo yenyu kanyhi yo muwumbi wenyu, yo mwene mono yamunozenyi ho muwe yikungugo.

⁷ “Alu ta mwihwesaje zono zapuluta, ze vilo vye katali, muwawuzaje ta walezi wenyu, wamulonjelenyi zono zejela mu vilo vyawo, muwawuzaje ta ne wakombi, wamulonjelenyi ze katali.

⁸ Muwaha Mulungu mono yalawiliciye muli vyose, yuyo yo yawagawila zi'si makungugo gose. Yakawagawila wanhu no wikalo wawo. Mwene yawawicila mipaka, mu nghango ye liwalo lye wanhu wo Mulungu.

⁹ Ninga yakehagulila we ndelo ya Yakobo wawe wanhu wakwe.

¹⁰ “Yawawona lono wayumbayumbaga mu nyika kunhu kubi, kumemile mavulavumbi gose, ninga mwene yawacitila no kuwadima nha vyono yadahile kwidima mweneco.

¹¹ Yakawa nha 'ndi yikulanjiza mana gayo ku wuguluce, yikugakumbatila mu mabawa gayo, Muwaha Mulungu nayo vyo yawakamisaga Waisilayeli.

¹² Muwaha Mulungu yo yawatonga wanhu wakwe hamba hasina mulungu yunji mujenzi mono yamutaza yaye.

¹³ Muwaha Mulungu yakawapela i hanhu hose hono henuce, weneco wahateme, wakalya malimwa gose ga mu migunda. Wakabakula no wuci mu matalawe, wakalya, ne mafuta gakalawa mwi'bwe.

¹⁴ Zing'ombe zawo hamonga ne zimhene zawo zikalavya mele menji muno. Nawo wakawa wagoli we zingholo, ne zimhene ne zing'ombe ziswanu zono zijinile. Kanyhi wakawa no wusaje wuswanu, hamonga ne divayi.

¹⁵ “Wanhu wo Muwaha Mulungu, wakagolipa muno, wakajina muno, wakawa wena ndigwa nyinji. Ninga kanyhi ho wakawa wafyuzi wakamuleka Mulungu wawo mono yawawumba, wakamulema u muponyi wawo mono yali vilungo.

¹⁶ Wakamupela Muwaha Mulungu wivu so milungu yawo mijenzi, no wubi wawo wono wetuma, wukamukoza Muwaha Mulungu likuwo.

¹⁷ Wakayilavizya vilavywa i milungu yo wulambi, i milungu mipya yono hamba ne walezi wawo wali si wayimanyile yaye. I milungu yono Waisilayeli wali wakali hamba nayitumamila yaye.

¹⁸ Wakamusemwa Muwaha Mulungu wawo, u mukombozi wawo mono yali vilungo, mono yawapela wumi.

¹⁹ “Nayo Muwaha Mulungu yali yeza kuziwona zizo, hodu yakakolwa likuwo, yakawa kuwaleka wanagwe we cilume na we cicekulu.

²⁰ Yakawa kutya, ‘Alu hodu, nane hamba si nojendelela kanyhi kuwapela wutazi. Hanyuma ho mbone cono cowagana, i wanhu wawano wono wasina cihuliko, kanyhi si wehuwilwa.

²¹ Wanghoza likuwo ku soko ye milungu yawo mijenzi, nane hamba si nghwendezwa yaye ne milungu yawo yiyo, milungu yono mbeka hamba si milungu yaye. Holeka nane notuma likungugo linji liwakoze nawo likuwo. Nowanoza nawo wawone wivu ne likungugo lyo wulele.

²² Likuwo lyangu nane lyokwaka nha moto nalyo lyovitakamiza vinhu vyose mono'nze. Lyovificila na vyose vyono vili hasi ku yinze ye wafu, no kuyitakamiza ne misinji ye matunda.

²³ “ ‘Holeka nane nowaletela magazo mawaha kanyhi nowaguma ne zisonga zangu zose.

²⁴ Nawo wofwa ku soko ye nzala ne mhungo, wofwa ku soko ye matamwa mabi. Noleta malimu ga mu mbago gawahawanje, ne mazoka gono gena sumu, gawalumanje.

²⁵ Nawo wulugu wowaletela mafwa mawaha mu zinzila no wogofywe wowagana mu zikaya zawo, i wazelelo hamonga ne wahinza, wose wofwa, ne wagalika wose ne wakombi, hasina mono kosigala.

²⁶ Nane nowongomezeza wose lukulu, hawe hasina yunji hamba monga mono kolowakumbucila kanyhi.

²⁷ Ninga hamba nhavivyo, si nolowaleceleza i walugu wawo waze welumbe, wawe kutya wawasuma wanhu wangu. Na kumbe nene no mweneco yo nizinozize zizi zose.’

²⁸ “Waisilayeli lyo likungugo lye walele wasina hamba wizuce yaye.

²⁹ Hamba si wakusuma kumanya i sokoci yono yilecile wakusumwa, hamba kumanya bwete cono ciwejeleye yaye.

³⁰ Hamba kumanya vyono wali wanhu elufu monga, ninga munhu monga du kawasuma. Na wanhu elufu yikumi wasumwa na wanhu wejete du? Muwaha Mulungu, u Mulungu wawo, yakondya kuwaleka, Mulungu wawo we vilungo, yakondya kuwagumila.

³¹ I walugu wawo nawo nha wamanyile vyono milungu yawo yisoceye, na vyono hamba si yihwanile no Mulungu we Waisilayeli.

³² I walugu wawo nha wawahodanga, nha vyono Sodoma na Gomola. Wehwana zabibu zono zili cisungu, na zabibu zayo zina sumu.

³³ Wehwana divayi yono nozezwe sumu ye zinzoka.

³⁴ “Ninga mwene Muwaha Mulungu, yaziwene zizo zose zono walugu wawo wazitumile. Nayo yalindiye lipango lifice lyo kuwalipiciziza wawo walugu.

³⁵ Muwaha Mulungu kowalipiciza wulipicizwe wuwaha. Lipango lyofika du lyono wosumilwa lukulu, hambi lipango lyo wugaye wawo nha lili behi kuza.

³⁶ Muwaha Mulungu kowaponya wanhu wakwe, kolo yeza kuwawona vyono walemegwa. Nayo kowawonela lusungu, wose wono wakumwitumamila mwene. Kolo yakondya kuwawona vyono mbeka wakondya kulemwa.

³⁷ Muwaha Mulungu kowawuza wanhu wakwe yawe kutya, ‘Alo milungu yono mwali muyitumbiye, yili hayi kanyhi?

³⁸ Yono mwayilisa vilavywa vyenyu vyono vijinile, mukayipela ne divayi ho ying'we. Ale ta, na yize le, yimupelenyi lu wutazi, yiwe kuli'nye wutizizo wenyu.

³⁹ “ ‘Alu mulanje! Ane yo nene Mulungu du nili wene, hamba hasina mulungu yunji kanyhi, langa nene du. Yo nene mono nghuwulaga, kanyhi nghuwumifya, nghutajila nghomele kanyhi nghuponya. Na hasina munhu mono konyimila muli yono nghwituma.

⁴⁰ Na mbeka vyono yo nene Mulungu mumi, nghunyasula muwoko wangu, nghwilahiza,

⁴¹ nha vyono nowunola mumaje wangu we limuli, nanje hono ling'ani yikwitumwa hamba ng'o. Nowalipiciza walugu wangu, nowalipiciza wono wakusula.

⁴² Nozing'wesa zisonga zangu ne sakami yawo, no mumaje wangu nawo, wowawulaga wose wono wakusula. Nane si nosigaza hamba monga, muli wawo wono wakwisumaniza nane, sunga na we zinghomele, ne wafungwa, wose wofwa du.’

⁴³ “Nanye nyo makungugo, muwapele lukumyo i wanhu wo Mulungu, hambi Mulungu nha kawalipicizaga wose wono wakuwawulaga. Kawalipicizaga walugu wakwe. Langa i wanhu wakwe, kawanenelaga wubi wawo.”

⁴⁴ Musa na Yoshuwa u mwana wa Nuni, wakalwimba u lwimbo lulu, i Waisilayeli ho wasume kuluhulika.

Malajilizo ge ndumilizo ga Musa, kuli wanhu

⁴⁵ Musa yali yeza kukondya kuwejiza wanhu i mejizo go Muwaha Mulungu,

⁴⁶ hanyuma kanyhi yakawa kuwatya, “Muzikamisaje mu zinhumbula zenyu ze malajilizo gaga gono nali kumulonjelenyi izuwali. Muwejize ne wana wenyu, nawo ho wawe ne cihuliko ne cogopo, kuli mejizo gago go Muwaha Mulungu.

⁴⁷ I mejizo ga gano, si nghani za bwete du yaye, langa wo wumi wenyu. Holeka munojeye mugatyatye, ho mosuma kuwa na vilo vinji vyo wikale wenyu, mu yisi yiyo, yono yili ku nhumbi ye likolongo lya Yoludani, yono mokwinjila muyiteme.”

⁴⁸ Na mwi'zuwa lilyo, Muwaha Mulungu yakamulonjela Musa yakatya,

⁴⁹ “Ale, wubite mu matunda ga Abalimu, mu yisi ya Mowabu yono vidomile ne likaya lya Yeliko. Wubite mucanyha ye litunda lya Nebo, wuyilanje yisi yose ya Kanani, yono nghuwapela i Waisilayeli, wuyiwone vyono yinha.

⁵⁰ Nagwe kofwila kuko kucanyha ye litunda lilyo, nha vyono nduguyo Haluni nayo yafwila mucanyha ye litunda lya Holi.

⁵¹ Hambi anye wose vyono muli wejete, nha mwambedegalila ha mwande ye Waisilayeli. Hambi, lono mwali muli ha malenga ga Meliba, behi ne likaya lya Kadeshi mu nyika ya Zini, agwe nha wambedegalila ha mwande ye wanhu wa Isilayeli.

⁵² Holeka luno koyilanjila meso du yisi yiyo, mu wulawa mwi'tunda, yisi yiyo yono nghuwapela wanhu wa Isilayeli, ninga agwe si kokwinjila mu yisi yiyo ng'o.”