Wukumbucize wo Wulajilize 31 - Luganuzi Luswanu Kuli Wanhu Wose 2002

Yoshuwa yakuhalila mulimo wa Musa

¹ Nayo Musa yakajendelela du kuwalonjela wanhu wa Isilayeli yakutya,

² “Nye wandugu zangu, ane nakondya kuficila luno myaka yigana limonga na makumi mejete go wikale wangu. Holeka hamba si nosuma kujendelela kuwa mutonji wenyu kanyhi. Hamonga na zizo, Muwaha Mulungu, yakondya kunonjela nha vyono ane si nosuma kulowoka likolongo lya Yoludani.

³ Holeka Muwaha Mulungu, u Mulungu wenyu, yo mweneco du yo komutonjenyi, kanyhi kogongomeza i makungugo gono gekaye mumo, anye ho muyisole yisi yawo yiwe yenyu. Nayo Yoshuwa yo kowa mutonji wenyu, nha vyono Muwaha Mulungu yalonga.

⁴ Nayo Muwaha Mulungu kowongomezeza lukulu wanhu wawo, nha vyono yanoza kuli Sihoni na Ogu i watemi we Waamoli, yakayongomeza sunga ne yisi yawo.

⁵ Muwaha Mulungu komupelenyi cisumisumi ho muwasume, kanyhi muwatendele nha vyono namulajilizenyi muwatendele.

⁶ Mweze ne vilungo ne nhumbula yo wutung'ati, mulece kuwa no woga hamba kuwogopa yaye. Hambi Muwaha Mulungu, u Mulungu wenyu, nha yali hamonga nanye, si komucepucilenyi, hamba si komulecenyi yaye.”

⁷ Hanyuma Musa yakawa kumucema Yoshuwa, yakawa kumulonjela ha mwande ye wanhu wose Waisilayeli yakutya, “Weze ne vilungo ne nhumbula yo wutung'ati, hambi nha yo gwegwe mono kowatonga wanhu wawa sunga wayisole yisi yono Muwaha Mulungu yawehuwiza walezi wawo.

⁸ Nayo Muwaha Mulungu, mweneco yo kokutonga kanyhi kowa hamonga nagwe. Nayo si kokucepucila hamba kukuleka yaye. Holeka wulece kutununhika mu nhumbula yako hamba kuwa na woga yaye.”

Lilajilizo lyeze kusomwa mu mwaka wo mupunghati, mu myaka yose

⁹ Hodu Musa yakawa kulyandika Lilajilizo lyo Mulungu, yakawa kuwapela i Wakohani Walawi, wono wali wo walanjilizi we Lisanduku lye Cilagane co Muwaha Mulungu, hamonga ne wanyamhala wose we Waisilayeli.

¹⁰ Yakawa kuwalajiliza yakutya, “Mu mwaka wo mupunghati, wo wukombozwe wa mu myaka yose kolo wafika, ale, mweze kusoma lilajilizo lili kwe lizi yiwaha mwi'daha lye sikukuu ye vibanda.

¹¹ Weze kuwasomela wanhu Waisilayeli, lono wehanguliza mu wuhembi, i hanhu ho wuhembelo wakumuhemba Muwaha Mulungu, u Mulungu wenyu.

¹² Weze kuwakongholela wose, i wanhu mututu walume ne wacekulu, hamonga ne wana, hamonga ne wajenzi wose wono wekalane nanye mu makaya genyu. Wose ho wasume kwihulicila weneco kwe makutu gawo, weyijize kumupela cogopo Muwaha Mulungu, u Mulungu wenyu, kanyhi ho wasume kugebata mejizo gakwe ko wihuwilwa.

¹³ Na mu nzila yiyi, i wana wenyu wono wakali nazihulika ze Lilajilizo lili, lyo Muwaha Mulungu, u Mulungu wenyu, ho wasume kulihulika. Nawo ho weyijize kumuhulika Muwaha Mulungu, mu vilo vyawo vyose vya mu wikale wawo, wa mu yisi yono yili ku nhumbi ye likolongo lya Yoludani yono moyitema.”

Malajilizo ge ndumilizo go Muwaha Mulungu kuli Musa

¹⁴ Hanyuma Muwaha Mulungu yakawa kumulonjela Musa yakatya, “Vilo vyo wikale wako vyasigala vicefu, holeka wumucemaje Yoshuwa winjile nayo mwi 'Hema lyono lyelile, ho nimupele malajilizo vyono yowa yimunojeye yetume.” Ale du, Musa na Yoshuwa wakawa kwinjila mwi 'Hema lyono lyelile.

¹⁵ Nayo Muwaha Mulungu yakawa kwilajilila hali wene mwisumbili lye livunde lyono lyali limile ha mulango we Lihema lyono Lyelile.

¹⁶ Muwaha Mulungu yakamulonjela Musa yakatya, “Alu agwe Musa, weza wuli behi no kufwa, na lono kowa wakondya kufwa, hodu wanhu hamba si wowa wehuwilwa kanyhi kuli'ne, kanyhi wocibena ne cilagane cangu cono nalagana nawo. Wondeka, wawe kuhemba milungu yo wulambi yono yili mu yisi yono wene wokwinjila.

¹⁷ Na kolo zizi zikwijela, nane nowakolelwa likuwo, niwalece wongomele. Ne magazo menji go wizine gowaziza, nawo baho ho wolomanya vyono gago gose gakuwejelela, vyono ane no Muwaha Mulungu wawo, si nili hamonga nawo kanyhi.

¹⁸ Nane hamba si nolowataza yaye, hambi nha wakondya kwituma wubi so wuhemba milungu yinji.

¹⁹ “Aluno wulwandikaje lwimbo luluno, wuwejize wanhu wa Isilayeli, u lwimbo lulu ho luwe wuhomelezi wa kuli'ne, kuli Waisilayeli.

²⁰ Ho yiwe kolo nawenjiza mu yisi yono yina moso, yisi yono nehuwiza vyono nowapela i walezi wawo, nawo kolo walya vya mumo weguta, kanyhi wajina, ninga woloyiwuyila milungu yinji wayihembe no kuyitumamila, wolondeka no kucibena cilagane cangu kuli wene, hambi lu kanyhi nha wakondya kwiguta.

²¹ Ninga kolo i zimbi zikuwaziza hamonga ne magazo mawaha, ale, u lwimbo lulo lolohomelela nha wuhomelezi kuli wene. Ninga hamba nhavivyo nghondizye kuzimanya za mu mahweso gawo sunga na lono nghali hamba nawafisa mu yisi yono nawehuwiziza.”

²² Nayo Musa yakawa kulwandika lwimbo lulo mwi'zuwa lilyo, no kuwejiza i Waisilayeli.

²³ Hanyuma Muwaha Mulungu yakawa kumulonjela Yoshuwa u mwana wa Nuni yakamutya, “Ale, weze ne vilungo ne nhumbula yo wutung'ati. Hambi nha yo gwegwe mono kowatonga i wanhu wawa Waisilayeli sunga wuwenjize mu yisi yono nawehuwiziza, nane nowa nili hamonga nagwe.”

²⁴ Nayo Musa yakalyandika mu citabu Lilajilizo lyo Muwaha Mulungu ko wulanjilile wuwaha muno, ho yalece kuyisemwa nghani yinji yo yose.

²⁵ Nayo yali yeza kukondya kulyandika Lilajilizo, yakawa kuwacema i wakohani Walawi wono wali wo walanjilizi we Lisanduku lye Cilagane, yakawatya,

²⁶ “Ale, solenyi citabu aci cono candicigwe Lilajilizo lyo Muwaha Mulungu, muciwice ha lubavu lwe Lisanduku lye Cilagane co Muwaha Mulungu, u Mulungu wenyu, ciwe kwikala baho nhondo zose, ho ciwe wuhomelezi kuli wanhu wakwe.

²⁷ Ane manyile vyono wali cibede kanyhi wasina cihuliko hamba hadodo bwete. Hambi nha manyile vyono wasina cihuliko hali Muwaha Mulungu mu wulawa mu mikalile yangu yose. Kanyhi manyile du vyono wocila kuwa wasina cihuliko sunga na hono niwe nakondya kufwa.

²⁸ Holeka aluno wakongholelaje ha mwande yangu, i walongola wose we milango yose ye Waisilayeli, hamonga ne wanyamhala wose, ho sume kuwalonjela zizi. Nane nghusaka wulanga ne yinze, viwe vihomelezi vyawo.

²⁹ Ninga nane manyile du vyono, kolo nakondya kufwa, wanhu wawa wowa wabi, kanyhi hamba si wozisaka na zono nawejiza. Na mu vilo vyono vyokuza, wolokwitang'anila ne magazo mawaha, hambi nha wolowa wakondya kumukoza likuwo Muwaha Mulungu, so wituma zimbi zono si zinojeye hali mwene.”

U lwimbo lwa Musa

³⁰ Nayo musa yakemba zinghani zo lwimbo lulu ha mwande ye Waisilayeli, lono wali wehanguliza, nawo ho waluhulicize, yakatya,