Wukumbucize wo Wulajilize 29 - Luganuzi Luswanu Kuli Wanhu Wose 2002

Lisanduku lye Cilagane lyo Muwaha Mulungu, hamonga ne wanhu Waisilayeli, mu yisi ya Mowabu

¹ Azi zo nghani ze cilagane, cono Muwaha Mulungu yamulonjela Musa, yazinoze kuli Waisilayeli mu yisi ya Mowabu. Ne cilagane cici cali cilagane cinji naco ne cilagane acilya, cono Muwaha Mulungu yacinoza kuli wene kwi'tunda lya Sinayi.

² Nayo Musa yakawa kuwacema wanhu wose Waisilayeli, yakawa kuwalonjela yakutya, “Mwaziwona nyo weneco ne meso genyu, zono Muwaha Mulungu yazinoza kuli Falawo mutemi wa Misili, na kuli wetumami wakwe, sunga na mu yisi yakwe yose.

³ Kanyhi mukaviwona vitanjilo ne mezino mawaha go wogofye, gono Muwaha Mulungu yagetuma.

⁴ Ninga sunga nalu, Muwaha Mulungu si yamulecenyi mumanye zono zamwijelelenyi kuko ku Misili.

⁵ Nayo Muwaha Mulungu, yakamutonjenyi mu nyika myaka makumi mane, ninga, i myenda yenyu hamba malatu genyu, si vyasakala yaye.

⁶ Kanyhi mwali musina ndigwa yo kulya, hamba divayi, hamba cing'wegwa co kugala, ninga Muwaha Mulungu yakamupelenyi visakwa vyenyu vyose, ho yamwijizenyi vyono u mwene yo Mulungu wenyu.

⁷ Nase cali ceza kufika bahano, u mutemi Sihoni wa ku Heshiboni, no mutemi Ogu wa ku Bashani, wakaza wacihome. Ninga, ase cikawasuma.

⁸ Cikayisola yisi yawo cikawagawila we milango ya Lubeni na Gadi, ne nusu yayo, cikawapela wo mulango wa Manase.

⁹ Holeka muzibate muno ko wihuwilwa zinghani zose ze cilagane cici, ho musume kutuga wumoteswe muli zose zono mowa kwituma.

¹⁰ “Alu izuwali, mwimile hali Muwaha Mulungu, u Mulungu wenyu, nyenye hamonga ne walongola wenyu, ne wawaha wenyu, ne wanhu wenyu we cilume, na

¹¹ we cicekulu, ne wana, hamonga ne wajenzi, wono mwikalane nawo, wono wakumutenyelenyi zingwagu no kumunejelenyi ne malenga.

¹² Nanye lu muli baha izuwali, ho mucivumile cilagane cici cono Muwaha Mulungu, u Mulungu wenyu, yakucinoza nanye, kanyhi muwubocele no wulajilize wayo.

¹³ Nayo Muwaha Mulungu ho yamuwicenyi zuwali muwe muli wanhu wakwe, nayo yawe Mulungu wenyu, nha vyono yamwihuwizizenyi nyenye, na vyono yelahiza kuli walezi wenyu, Abulahamu na Isaka na Yakobo.

¹⁴ Kanyhi Muwaha Mulungu, hamba si yakucinoza cilagane cici hamonga no wulajilize wayo na nyenye du.

¹⁵ Langa yakucinoza cilagane cici kuli sese wose mono cimile hali mwene izuwali, hamonga kanyhi na kuli wana wetu wono wakali nalelwa.

¹⁶ “Mukumbucile mikalile yenyu vyono yali yinha lono mwali muli ku Misili, na vyono yali yinha lono mwakolaga haciligati ye makungugo ganji.

¹⁷ Mwaviwona i vihwani vyawo vinozwe kwe mabici hamba kwe mabwe, hamba kwa fweza, hamba kwa zahabu.

¹⁸ Holeka mulanjilile, yilece kuwa yunji wa muli nyenye, munhu mulume, hamba mucekulu, hamba wana, hamba wo mulango wowose mono mwimile bahano izuwali, yamulece Muwaha Mulungu, u Mulungu wetu, yahembe milungu ye makungugo ganji. Hambi yiyi nha yokwihwana ne lisina lyono likuwiluka no kulela sumu nghali.

¹⁹ Kanyhi mulanjilile, halece kuwa na yunji wa muli nyenye zuwali, mono yakuzihulika zizi zo wilahize na vyono yikusakwa, kanyhi mwene ho yezivye, no kwihwesa vyono hamba yalece kuzityatya, zose zomuwela swanu du, hanyuma mwene yawe kubita na zakwe. Mumanye vyono nghani yiyo, yomongomezenyi nyenye wose i wabi ne waswanu.

²⁰ Hambi Muwaha Mulungu nha si komunenela u munhu mono yenha nhavivyo. Langa likuwo lyakwe lyokwaka muno muli munhu yuyo. Ne malijito gose gono gandicigwe mu citabu cici, gomugwila, sunga Muwaha Mulungu yawe yakondya kumongomezeza lukulu munhu yuyo.

²¹ Nayo Muwaha Mulungu komusiwanula no kumuletela magazo hamonga ne malijito gose gono gandicigwe mu cilagane, gono gandicigwe mu citabu cici ce mejizo go Muwaha Mulungu ho liwe yifundo kuli milango yose ye Waisilayeli.

²² “Nawo wo lulelo lwa mu nyuma, ne wana wenyu, hamonga ne wajenzi wono wekaye ma'si go kutali, wolowona magazo no wugaye wono Muwaha Mulungu yaviletile mono yisi yenyu.

²³ Ne migunda yenyu yolobabala hamba kulela cinji kanyhi, yoloticimizwa no moto we cibiliti no mwino. Yolowa yisina hanji kanyhi hono hosuma kuhadikwa cinhu co cose, hamba mahanze bwete, si galacindika mumo yaye. Yisi yenyu yolokwihwana nhe yisi ya Sodoma na Gomola, hamba nhe yisi ya Adima na Zeboyimu, zono Muwaha Mulungu yazongomeza lono yali yakolwa ne likuwo.

²⁴ Baho, ne makungugo gose golokwiwuza gawe kutya, ‘Alo nhawule Muwaha Mulungu kazinoza zizi mu yisi yawo?’

²⁵ Ne lipitulo nalyo lyolowa nhavi, ‘Ku soko vyono i wanhu wo Muwaha Mulungu, wabena cilagane cono wacinoza no Muwaha Mulungu, u Mulungu we walezi wawo, lono yali yakondya kuwawusa mu yisi ya Misili.

²⁶ Nawo wakayihemba no kuyitumamila milungu yinji, yono ku wulawa na katali wali wakali nayihemba, i milungu yono Muwaha Mulungu yawalemeza walece kuyihemba.

²⁷ Holeka Muwaha Mulungu yakawakolelwa likuwo yiwaha i wanhu wakwe, yakawa kuwaletela mu yisi yawo malijito gose gono gandicigwe mu citabu.

²⁸ Muwaha Mulungu yakawakolelwa likuwo yiwaha muno muno, na mwi'kuwo lilyo liwaha, yakawawusa mu wulawa mu yisi yawo, yakawa kuweyagaziza wose mu yisi yo wujenzi, na vyo yina sunga nalu.’

²⁹ “Hozili nghani zinji zono Muwaha Mulungu, u Mulungu wenyu, yazihundice, ninga yakacigubulila Wulajilize wakwe. Holeka nase ne wana wetu, yicinojeye ciwibate muno wulajilize wuwu, sunga ko ku cibitilila.”