Wukumbucize wo Wulajilize 26 - Luganuzi Luswanu Kuli Wanhu Wose 2002

Vilavywa vye nhwanga

¹ “Nanye kolo mwakondya kwinjila mu yisi yono Muwaha Mulungu, u Mulungu wenyu, yakumupelenyi no kwikala mumo,

² ale, wose muli nyenye, mweze kusola mikalo milongozi kulelwa, muli vye vilimwa vyenyu vyose vyono movituga wulawa mu migunda yenyu. Muvitajile mu zinhoto, muvitegule i hanhu ho wuhembelo.

³ Hanyuma mumubitile mukohani mono kowa yali baho mu vilo vivyo, mumulonjele muwe kutya, ‘Alu nhondo ho camanya vyono Muwaha Mulungu, u Mulungu wetu, yakondya mbeka kucinjiza mu yisi yono yawehuwiziza i walezi wetu vyono kocipela sese.’ ”

⁴ “Nayo mukohani kocibocela citoto cico wulawa mu miwoko yako, yaciwice ha mwande ye cikumbicilo co Muwaha Mulungu, u Mulungu wenyu.

⁵ Nagwe wuwe kulonga hali Muwaha Mulungu, u Mulungu wako, wuwe kutya nhavi; ‘U mulezi wangu yali Mwalamu, mono yawasola we mhuga yakwe wose, wakahamila ku Misili. Nawo wali wacefu muno lono wabitaga kuko, ninga hanyuma yayo, wakonjelezeka muno, kanyhi wakawa yikungugo yiwaha, kanyhi wali vilungo muno.

⁶ Nawo Wamisili wakacigaza muno, wakacitumya milimo ciwandawanda.

⁷ Nase cikamulilila Muwaha Mulungu, u Mulungu we walezi wetu, yacipele wutazi, nayo yakacihulika, yakawona na vyono cikugazwa muno, na vyono cikwitumywa muno, na vyono cikwiwonelwa ne Wamisili.

⁸ Nayo yakaciponya kuko ku Misili kwe vilungo vyakwe viwaha. Yetuma mapoto mawaha, na nghani zo wizine muno, hamonga no wogofye wuwaha muno muno.

⁹ Yakacileta sunga bahano mono yisi yiyi yono yina moso mwinji.

¹⁰ Holeka nane luno, nghumulavizya Muwaha Mulungu nhwanga yiyi ye vinhu vilongozi kulelwa, vyono yamhelile.’ “Hanyuma wuciwice cico citoto hali Muwaha Mulungu no kuhemba.

¹¹ Munojeye mumulumbe Muwaha Mulungu, u Mulungu wenyu, so vinhu vinji viswanu vyono yamupelenyi, hamonga na we zimhuga zenyu wose. Holeka muwaceme Walawi, hamonga ne wajenzi wono mwikalane nawo, ho waze muhanje nawo mu sikukuu yiyo.

¹² Na ha ndumilizo yo mwaka we kadatu wa mu myaka yose, mweze kuwapela zaka ya mu vilimwa vyenyu vyose, i Walawi, ne wajenzi, ne wana wono wasina walezi wawo, hamonga ne wacekulu wafwile. Ho mhuga zose, wawe wena ndigwa yono yowakwila. Nanye kolo mwakondya kuzituma zizi zose,

¹³ ale, ho mumulonjele Muwaha Mulungu muwe kutya, ‘Hasina hamba zaka yoyose kanyhi yono yisigaye mu kaya yangu, hambi nha nakondya kuwagawila vyose i Walawi, ne wajenzi, ne wana wono wasina walezi wawo, hamonga ne wacekulu wafwile, nha vyono wacilajiliza citume. Si mbedegaye, hamba kugasemwa malajilizo gako ga muli ze zaka.

¹⁴ Hamba si niluvizye niyilye yiyo zaka yaye, lono nili mu cililo. Hamba si niyilavizye kunze ye kaya yangu, lono nali nili mu wavufywe yaye hamba si niyilavizye liwe yikumbiko kuli wafu ng'o. Langa nghakuhulika gwegwe du go Muwaha Mulungu, nane nakondya kwituma nha vyono wandajiliza nitume, kuli zo wulavya zaka.

¹⁵ Holeka go Muwaha Mulungu, alu wulanje wulawa hanhu hako hono helile kuko ku wulanga, wuwalugutize wanhu wako Waisilayeli, hamonga ne yisi yiyi swanu muno yono yina no moso mwinji, yono wacipela, nha vyono wawehuwiza walezi wetu.’ ”

I wanhu wo Muwaha Mulungu

¹⁶ “Alu izuwali Muwaha Mulungu, u Mulungu wenyu, yakumukong'onhezenyi mugebate malajilizo gakwe gose. Holeka mugebate, kwe zinhumbula zenyu zose na kwe mitima yenyu yose.

¹⁷ Nalu izuwali mwakondya kumumanya Muwaha Mulungu, u Mulungu wenyu, sunga luno, mwehuwiza nha vyono momuhulika mwene, no kwibata malajilizo gakwe gose, hamonga no kwituma zose zono yakuzilajiliza.

¹⁸ Nayo Muwaha Mulungu, izuwali kakondya kumubocelenyi, mweza muli wanhu wakwe, nha vyono yamwihuwizenyi. Holeka nayo aluno yakumukong'onhezenyi muno, mugebate malajilizo gakwe gose.

¹⁹ Nayo komunozenyi muwe yikungugo yiwaha muno, kuciza makungugo ganji gose gono yagawumba, nanye molikumya no kulitogoza litagwa lyakwe. Kanyhi mowa wanhu wakwe nha vyono yehuwiza.”